Ommy Dimpoz uri gukira uburozi yatanze ubutumwa bukomeye ku isabukuru ye

3 13-09-2018 - saa 14:51, Ishimwe Israel

Omary Faraji Nyembo [Ommy Dimpoz], umuhanzi wanditse izina mu muziki wa Tanzania yizihije isabukuru y’amavuko, atanga ubutumwa bukangurira abantu kwirinda urwangano n’amacakubiri.

Dimpoz yavukiye muri Tanzania ku wa 13 Nzeri 1987.

Uyu muhanzi amaze igihe aribwa n’umubiri kubera uburozi atazi igihe yaherewe. Uburwayi bwatangiye kugaragara mu bukwe bw’inshuti ye Ali Kiba bwabereye i Mombasa muri Mata, inzira y’igogora itangira kwifunga, yagira icyo amira akaribwa.

Muri Gicurasi 2018 yatangiye kunanirwa kumira ifunguro n’ibyo kunywa, yisuzumishije mu baganga muri Tanzania babura indwara. Guverineri wa Mombasa Joho Hassan [inshuti ye] yamushakiye abavuzi b’abahanga muri Kenya na bo birabananira.

Muri Kamena 2018 ni bwo yoherejwe muri Afurika y’Epfo aho yabazwe, anakorerwa inzira nshya y’igogora.

Ommy Dimpoz ari koroherwa aho ari i Nairobi ndetse yanashyize hanze amashusho ari kuririmba. Ubu ashobora kurya, kuvuga no kugenda.

Mu butumwa yanyujije kuri Instagram ku munsi yizihizaho isabukuru y’amavuko, Dimpoz yashimye Imana yamurinze mu minsi itambutse.

Yagize ati “Ndashima Imana ko yanyongereye igihe cyo kubona undi mwaka. Ibyo nanyuzemo nko mu mezi atanu ashize, iyo rutaba urukundo rw’Imana nari kuba mvugwa mu mateka.”

Dimpoz yavuze ko ubuzima buhindagurika kuko uyu munsi uba uri muzima, ejo ukaba urembeye mu gitanda.

Yagize ati “Ni yo mpamvu nahisemo kubasangiza ifoto yanjye nafatiwe mu cyumba nabagiwemo nubwo nzi ko atari byiza kuyitangaza ku mbuga nkoranyambaga. Intego yanjye ni ukwibukiranya ko nk’abantu tudakwiye kubana mu nzangano n’ubugome kuko tutazi icyo ejo hahishe.”

Yavuze ko ari mu bitaro hari igihe yihebye abona byarangiye ariko abona undi murwayi warashwe amasasu icyenda, abaganga baramuvura arakira.

Ati “Naribajije nti kuki natakaza ibyiringiro byo kubaho? Namenye ko kugera kure atari ko gupfa. Ni byiza ko dusengera abarwayi tukanabasura kuko banyura mu bihe bigoye.”

Yashimiye abamubaye hafi, abamusengeye barimo umuryango, abahanzi, abafana n’abaganga bamwitayeho. Yijeje abakunzi be ko azagarukana imbaraga nyinshi.

Ati “Ndashima Imana kuko ndi koroherwa. Imana ihe umugisha mwe mwese mwasengeye mu kwizera kwanyu.”

Umuhanzi Ali Kiba abinyujije kuri Instagram ye yifurije Dimpoz isabukuru nziza y’amavuko no gukira bwangu.

Ati “Uryoherwe n’umunsi wawe muvandimwe. Imana ni yo Muremyi w’indyarya n’aboroheje. Tugomba kuyishima kuko ifite uburyo ikora ibyayo kandi iradukunda twese. Komera!”

Dimpoz ufashwa na Rockstar Africa yari aherutse gusohora indirimbo yise ‘Yanje’ yakoranye na Seyi Shay wo muri Nigeria. Irimo n’Ikinyarwanda, yahishuye ko amagambo yacyo yayandikiwe n’inshuti ye The Ben.

Ommy Dimpoz aheruka i Kigali mu Ukuboza 2017, yari yaje aherekeje Ali Kiba waririmbye mu gitaramo cya East African Party cyabaye ku wa 1 Mutarama 2018.

Dimpoz ari mu bahanzi bamaze kwandika izina muri Tanzania na Afurika y'Iburasirazuba
Ommy Dimpoz yari amaze igihe arwaye nyuma yo kurogwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Munezero Benon 2018-10-01 03:01:32

Nishimiye gukira ommy

2
Soso 2018-09-20 02:32:25

Imana ishimwe ko yamworohereje, turamusabira azakire burundu. Ariko se ni iki kimwemeza ko ibyo arwaye bikomoka ku marozi?

3
tete 2018-09-13 09:11:51

nihashimwe Iyaguhanze niyo yakomeje kukurinda.abagome nimdyarya bazahecyenyera amenyo hanze yijuru bihorere Imana yabamwaje

Kwamamaza