Abaraperi Drake na Future bari mu bakomeye muri Leta Zunze Ubumwe za Amerika barezwe mu rukiko n’umugore uvuga ko yafashwe ku ngufu n’umwe mu bakora ahitwa Bridgestone Arena aho bakoreye igitaramo.

Uyu mugore utatangajwe amazina ku mpamvu z’umutekano we, avuga ko yitabiriye ibitaramo bibiri aba bahanzi bakoreye mu Mujyi wa Nashville wo muri Leta ya Tennessee, muri Kanama umwaka ushize agashukwa n’umwe mu bakora mu nzu yabereyemo igitaramo bikarangira afashwe ku ngufu.

Ikinyamakuru The People kivuga ko uwo mugore yareregeye urukiko mu ntangiriro z’iki cyumweru avuga ko mugabo witwa Leavy Johnson yamusanze aho yari ahagaze mu gitaramo akamusaba ko bajyana mu rwambariro akamuhuza na Drake na Future bari baririmbye muri icyo gitaramo.

Nyuma y’igitaramo uyu mugabo bivugwa ko yafashe ku ngufu uwo mugore ndetse akamukorera urugomo rwamusigiye ibikomere, yatawe muri yombi n’inzego zishinzwe umutekano. Ikirego uyu mugore yatanze mu rukiko kigaragaza ko Johnson wamufashe ku ngufu yari yarashyiriweho impapuro zimuta muri yombi ku byaha birimo ubugizi bwa nabi.

Uyu mugore yanditse asaba guhabwa indishyi z’akababaro zitari munsi ya miliyoni 25 z’amadolari kuko ngo Drake, Future, ubuyobozi bw’ahateguriwe igitaramo n’abandi batandukanye bagombaga kuba bazi neza ko uwo mukozi wabo ari uwo kwitondera ndetse ahigwa n’inzego zishinzwe umutekano.

Leavy Johnson ushinjwa gufata ku ngufu umufana mu gitaramo cya Drake na Future mu Mujyi wa Nashville, wafatiwe ahitwa Tampa muri Leta ya Florida, muri Mata uyu mwaka, ategereje kujyanwa muri Tennessee akaburanishwa ku cyaha cyo gufata ku ngufu cyiyongera ku bindi byatumaga ahigwa.

Umugabo ukekwaho gufata ku ngufu umufana mu rwambariro rwa Drake na Future bakoreye i Nashville


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved