IGIHE

Bebe Cool arashinjwa kunyereza amafaranga yari agenewe abana bafite agakoko gatera Sida

0 10-01-2019 - saa 16:50, Muvunyi Arsène

Umuhanzi akaba yaranahoze akorera Radiyo yitwa Simba, Moses Nsubuga uzwi nka Supercharger yashinje Bebe Cool kunyereza amashilingi ya Uganda miliyoni imwe n’igice yari agenewe abana babana n’ubwandu bwa virusi itera sida.

Ibi Supercharger yabivuze ku wa Gatatu tariki 09 Mutarama 2019, ubwo yari kureba ikiganiro cyatumiwemo Bebe Cool kuri BBS TV. Uyu mugabo uri mu bubashywe mu bahanzi bo muri Uganda yari ari kuvuga ku muziki na politiki.

Abinyujije ku rukuta rwe rwa Facebook, yavuze ko Bebe Cool afite ibitekerezo byiza, ariko amwibutsa ko hari amafaranga yari agenewe gufasha abana bafite ubwandu bwa virusi itera sida yanyereje mu myaka 10 ishize.

Ati “Ndi kurebe Bebe Cool kuri BBS TV, nakunze ibitekerezo bye n’uburyo aganira kandi ntekereza ko afite ejo heza muri politiki […] Ariko ndashaka ko hagira umwibutsa ko mu myaka 10 ishize yibye amashilingi miliyoni imwe n’igice yari agenewe imfubyi zibana n’ubwandu bwa virusi itera sida.”

Uyu mugabo yavuze ko aya mafaranga yanyerejwe na Bebe Cool yatumye yirukanwa no ku kazi yakoraga kuri Radiyo yitwa Simba, akaba avuga adateze kumubabarira mu gihe atemeye icyaha ngo asubize iby’abyandi.

Supercharger ni umwe mu bahanzi bakanyujijeho mu myaka ya 1990, icyo gihe yari n’umunyamakuru ukunzwe. Ubwamamare bwe bwamereraga kwisengerera inkumi yose ashatse, bimuviramo kwandira virusi itera sida.

Kuva mu 1994 yararwaye araremba bikomeye, abo mu muryango we biyemeza kumujyana mu cyaro, ngo umunsi yapfuye bazamushyingure, kubw’amahirwe ajyanwa kwa muganga atora agatege.

Ni we muhanzi wa mbere wo muri Uganda wemeye ku mugaragaro ko abana n’ubwandu bwa Virusi itera sida anashinga umuryango ugamije guhumuriza abarwaye iki cyorezo.

Supercharger ni we muhanzi wa mbere muri Uganda weruye akavuga ko arwaye Sida
Bebe Cool yashyizwe mu majwi ku kunyereza umutungo wari ugenewe abana bafite ubwandu bw'agakoko ka Sida
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza