Umwihariko mu ifatwa ry’amashusho y’indirimbo ya DJ Marnaud na Active (Amafoto)

1 10-07-2018 - saa 12:05, Dusabimana Aimable

DJ Marnaud n’abagize itsinda rya Active bafatiye amashusho indirimbo yabo igezweho mu bakunda umuziki ubyinitse n’abanyabirori mu Mujyi wa Kigali, ikozwe mu mwihariko w’imbyino bahimbye no gutigisa umubyimba.

“Bape” ya Marnaud na Active ni imwe mu ndirimbo zigezweho muri iyi minsi, amajwi yayo yatunganyijwe na Bob Pro naho amashusho akorwa na Meddy Saleh uherutse guhagarika gukorana n’abahanzi muri Press It.

Mu mashusho y’iyi ndirimbo bafatiye kuri Maison de Jeune ku Kimisagara kuri uyu wa Mbere, tariki 9 Nyakanga 2018, bagaragazaga imbyino zitandukanye n’umukobwa utigisa umubyimba. Bari bahaye rugari abifuje kuyagaragaramo bahageze.

DJ Marnaud yagize ati “Kimwe mu byo navuga nk’umwihariko w’aya mashusho ni imbyino zirimo kuko ni izo twahanze zacu bwite zitamenyerewe mu zindi ndirimbo zisanzwe.”

Uyu musore uri mu bagezweho mu kuvanga umuziki mu Mujyi wa Kigali yongeyeho ko nyuma y’iyi ndirimbo afite indi mishinga ateganya gukorana n’abahanzi bo mu Rwanda batandukanye.

Ku ruhande rw’itsinda Active, Tizzo yavuze ko hari hakiriho ikintu cy’uko abahanzi bo mu Rwanda bataribona mu ba DJs kandi na bo ari abantu bafite uruhare runini cyane mu kuzamura umuziki w’igihugu cyabo akaba ari iyo mpamvu bubuye umubano na bo bigahurirana no gusanga DJ Marnaud yifuza kwinjira mu gukorana n’abahanzi, ubufatanye buva aho.

Tizzo yemeza ko impande zombi ziri kungukira mu kumenyekana kw’iyi ndirimbo kuko “hari abakunda DJ Marnaud n’abakunda Active, bityo akaba ari ingufu ebyiri zahuye bikaba magirirane.”

Yongeyeho ati “Uko indirimbo imeze barayumvise, abantu banagiye bakora amashusho magufi menshi cyane, ngira ngo mwarabibonye, bibandaga mu kubyina, natwe ntitwagiye kure, nicyo twibanzeho. Ni amashusho arimo imbyino zinogeye amaso kandi zacu twahimbye.”

Meddy Saleh yabwiye IGIHE ko nubwo ari gukora kuri uyu mushinga nta gahunda ihari yo kugaruka mu bijyanye no gutunganya amashusho mu buryo buhoraho. Ati “Ntabwo nabigarutsemo ahubwo ni uko Active iri mu nzu yacu ya New Level akaba ari iyo mpamvu nayifashije, bitandukanye no Press It.”

DJ Marnaud na Active basubije Meddy Saleh mu gukora amashusho

DJ Marnaud [Mugisha Gatera Arnaud] wakoranye “Bape” na Active, afite umwihariko wo gushyushya abafana abaganiriza mu gihe aba ari kuvanga umuziki. Ni umwe mu bagize itsinda rya Dream Team DJs ryatangiye gukora mu 2013, arihuriyemo na DJ Toxxyk, DJ Karim ndetse na DJ Miller urikuriye.

Uyu musore amaze kwigaragaza mu bitaramo bikomeye bitandukanye nko mu cya Mr. Eazi yaje i Kigali, mu cya Meddy i Nyamata, Shyuha Festival, mu bitaramo bya ROC NYE, icya Tekno, icya Davido n’ibindi.

'Bape' izagaragaza gutigisa umubyimba
'Bape' ya Active na Marnaud izibanda ku mbyino
DJ Marnaud usanzwe uvanga umuziki winjiye mu bijyanye no gukorana indirimbo n'abahanzi
Iyi ndirimbo izagaragaza imbyino zimenyerewe n'izitamenyerewe
Olvis wo muri Active afatwa amashusho

Amafoto: Muhizi Serge

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Amiel 2018-07-12 07:43:35

Ebana bakomerezaho abobasore turabashyigikiye.

Kwamamaza