IGIHE

Umuraperi w’impirimbanyi ya Politiki muri Cameroun yakoreye ubukwe muri gereza

0 12-09-2019 - saa 20:57, Uwiduhaye Theos

Umuhanzi Valsero uri mu bakora injyana ya Hip Hop bakomeye muri Cameroun yakoreye ubukwe muri gereza n’umukunzi we.

Valsero yasezeraniye muri gereza n’umukunzi we Erja Kaikkonen usanzwe ari Umudipolomate nk’uko Jeune Afrique yabitangaje.

Erja Kaikkonen ukomoka muri Finlande asanzwe ari Umuyobozi Mukuru w’Intumwa z’Umuryango w’Ubumwe bw’Ibihugu by’u Burayi mu Murwa Mukuru wa Cameroun, Yaoundé.

Ubukwe bw’aba bombi bwabereye mu Gereza nkuru ya Yaoundé. Iby’umunezezo w’urukundo rw’aba bombi byamenyekanye muri Mata uyu mwaka.

Valsero yafunzwe ku wa 26 Mutarama 2019 azira kugaragaza ibitagenda ku buyobozi buriho atavuga rumwe nabwo.

Valsero, ubusanzwe yitwa Gaston Philippe Abe Abe. Yavutse ku wa 12 Nzeri 1975. Yagiye kuba muri Cameroun mu 1987 i Yaoundé aho yabanaga na se.

Mu 1990 nibwo yatangiye kugaragaza impano mu kurapa mu itsinda yabagamo ryitwa Ultimatum; mu 2008 ashyira hanze album ye ya mbere yise ‘Politiquement Instable’ yatumye agira igikundiro, abato batangira kumufata nk’uwavamo umuyobozi mwiza kandi w’umunyabwenge.

Valsero yibonye nk’umuraperi w’umunyapolitiki atangira kuririmba ibihangano byibasira Perezida w’igihugu cye Paul Biya w’imyaka 86 birimo “Çe pays tue les jeunes”, “Ne me parlez plus de ce pays” yamenyekanye cyane nka “Lettre au president” n’izindi.

Valsero yagiye afungwa kenshi (nk’uko n’ubu bimeze azira kutavuga rumwe n’ubutegetsi buriho mu gihugu cye) ndetse n’ibitaramo bye akenshi bikaburizwamo. Aheruka gushyira hanze album mu 2015 yise ‘Intensité’.

Valsero amaze amezi asaga arindwi muri gereza
Valsero, Umuraperi w’impirimbanyi ya Politiki muri Cameroun yakoreye ubukwe muri gereza
Valsero ari mu baraperi bakomeye muri Cameroun
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza