Umuraperi Shariff Thabeet [Darassa] umaze kubaka izina muri Tanzania no muri Afurika y’Uburasizuba waraye ageze i Kigali mu ijoro ryacyeye yijeje abitabira igitaramo ko agomba kubaha umuziki w’uburyohe.

Darassa amaze kumenyekana mu buryo bukomeye biturutse ku ndirimbo yise "Muziki" yabiciye bigacika mu minsi ishize. Usibye iyi yahuriyemo na Ben Pol, azwi mu yitwa "Too Much"; "Hasara Roho"; "Utanipenda", yakoranye na Rich Mavoko; "Heya Haye", ahuriyemo na Mr. Blue n’izindi.

Uyu muraperi wamaze kugera mu Rwanda aho ari buririmbire ku nshuro ye ya mbere, yagiranye ikiganiro n’abanyamakuru ku gicamunsi cyo kuri uyu wa Gatanu, tariki 11 Kanama 2017, atanga icyizere cy’uko ari bukore iyo bwabaga agasigira urwibutso rwiza abakunzi b’umuziki bari bwitabire igitaramo cyiswe "Pressing Forward" yatumiwemo.

Muri iki kiganiro cyabereye i Nyarutarama, Darassa yavuze birambuye amavu n’amavuko ye, uko yinjiye mu muziki ndetse atanga isura abonamo ibikorwa by’abahanzi bo mu Rwanda kuko ngo nubwo atari ko bose abazi, abo yabashije kumva umusogongero w’ibyo bakora yahise abubaha cyane cyane abakora injyana nk’iye.

Yagize ati "Ndatekereza ko Kigali ari ahantu heza mu gihe tumaze tugeze hano ndabona byose ari byiza, ni ubwa mbere ngeze hano, nabyishimiye cyane, njye ndi mushya hano ahubwo mukomeze kumbwira ikijya mbere n’ibigezweho. Mu byo maze kubona, ikirere ni cyiza, ibiryo ni uko n’ibindi. Twanyuzwe n’uko twakiriwe rwose."

Yongeyeho ati "Ibyo tugiye gukora ndizera ntashidikanya ko ijana ku ijana biraba ari ibintu biremereye. Turabikora n’imbaraga zose, murabibona? Ntabwo twaje nk’abagiye mu bukwe, niyo mpamvu ndirimba nti ’Reka amagambo, ushyiremo umuziki’. Twaje mu kazi kandi rwose muratwishimira, ndabyizeye. Twiteguye gukora ibintu mu buryo bunoze n’ubwo kubisobanura wenda byo byagorana."

Mbere y’uko uyu muraperi aririmba muri iki gitaramo kiri bubere mu ihema rya Kigali Conference & Exhibition Village, KCEV [hahoze hitwa Camp Kigali], guhera saa kumi n’ebyiri z’umugoroba kuri uyu wa Gatanu, hanateguwe icyiciro cy’ibiganiro bimara umwanya muto abitabiriye bakaganirizwa n’abantu batandukanye bafite icyo bigejejeho mu kwihangira imirimo hagamijwe kungurana ubumenyi.

Iki gitaramo Darassa agiye kuririmbamo i Kigali cyateguwe na Sick City Entertainment isanzwe ifite itsinda ry’ababyinnyi rizwi mu Rwanda ariko ikaba ikora n’ibindi bikorwa bitandukanye birimo no gutegura ibitaramo byo gusakaza ubutumwa bwigisha urubyiruko n’izindi ngeri.

Abitabira igitaramo cya Darassa barasusurutswa n’aba DJs bakomeye mu Rwanda barimo Miller, Toxxyk, Marnaud n’uwitwa Lou urigaragaza bwa mbere. Iki gitaramo kiranagaragarizwamo imbyino za Jabba Junior n’itsinda ribyina gakondo ryitwa Abenegihanga.

Umuraperi Darassa aje mu Rwanda kuhakorera igitaramo
Uyu muraperi yavuze ko nubwo atarabasha kumenya benshi bakora injyana nk'iye mu Rwanda, yubaha ibikorwa byabo
Darassa yaganiriye n'itangazamakuru mbere y'amasaha macye ngo ataramire i Kigali


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved