IGIHE

Uganda: Umuraperi ukiri muto wateje impagarara yasubiye mu ishuri

1 29-05-2019 - saa 15:21, Uwiduhaye Theos

Umuraperi wo muri Uganda, Patrick Ssenyonjo umaze kwamamara nka Fresh Kid, yatangiye kwiga mu ishuri aherutse kwemererwamo buruse, nyuma yo guteza impagarara muri iki gihugu.

Inkuru y’uyu umwana w’imyaka irindwi uhagaze neza mu muziki wa Rap muri Uganda, yatangiye gusakara mu binyamakuru muri Werurwe 2019, aho Minisitiri w’Urubyiruko yari yamusabye kureka umuziki cyangwa se bakamufunga.

Ibi yabivugaga bitewe n’uko hari amakuru ko yaretse ishuri kubera ubuhanzi, ibi bikaba bihabanye n’amategeko arengera abana muri Uganda.

Icyo gihe mu kiganiro yagiranye na Daily Monitor, Minisitiri Florence Nakiwala wibasiwe cyane ku mbuga nkoranyambaga, yavuze ko atarwanya impano y’uyu mwana, ngo icyo ashaka ni uko amategeko yubahirizwa.

Uyu muyobozi yavuze ko atazareka Fresh Kid ngo akomeze umuziki, mu gihe ababyeyi n’umujyanama we bataramwereka uburyo uyu umwana akoresha igihe cye akora umuziki kandi ntibibangamire uburenganzira bwe bwo kwiga.

Hejuru y’ibyo Minisitiri Florence Nakiwala, yavuze ko bazakoresha uyu mwana ibizamini by’ubuzima, kugira ngo bamenye neza niba adakoresha ibiyobyabwenge cyangwa se niba nta ngaruka ubwonko bwe bugirwaho n’ibitaramo.

Umujyanama we Francis Kamoga yari aherutse kubwira BBC ko umuhanzi we yakomeje amasomo nta kibazo, kuko ibitaramo abikora mu minsi y’impera z’icyumweru gusa.

Fresh Kid yagarutsweho cyane nyuma habaho ubwumvikane hagati y’abajyanama be na Minisitiri Florence Nakiwala bemeranya ko azafatanya ishuri n’umuziki ku buryo nta kizabangamira ikindi akanareka kuririmbira mu tubari.

Icyo gihe Minisitiri yanasabye ko Fresh Kid ahindurirwa ishuri, akajya mu kigo yiga abamo.

Hashize iminsi umuherwe witwa Rajhiv Rupaleria uhagarariye Ruparelia Group yavuze ko bazishyurira uyu mwana amashuri abanza mu kigo cya Kampala Parents School kiri mu bikomeye muri icyo gihugu.

Ubu, Fresh Kid yatangiye kwiga muri iri shuri ndetse hanasakaye amafoto ye ku munsi we wa mbere ku ishuri.

Fresh Kid ari mu bahanzi bakomeye muri Uganda muri iki gihe, kuko ari mu biharira amapaji mu bitangazamakuru bitandukanye ndetse indirimbo ze zigacurangwa kenshi ku maradiyo, televiziyo mu tubyiniro n’’ahandi.

Mu minsi ishize hari haherutse gukwira inkuru ivuga ko ari mu mushinga wo gukorana indirimbo n’umwana w’umu-DJ wa mbere muto ku Isi uzwi nka DJ Arch Jnr.

Fresh Kid yatangiye kwiga muri Kampala Parents School
Umuherwe witwa Rajhiv Rupaleria uhagarariye Ruparelia Group yavuze ko bazishyurira uyu mwana amashuri abanza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Friends 2019-05-29 10:25:09

Babura kuza ngo bishyurire Niyonkuru Fabrice utishoboye bakishyurira umu millionaire!?

Kwamamaza