IGIHE

Twaganiriye! Byinshi kuri Tunezerwe Pacifique, umucuranzi n’umuhanzi w’imena wa Chorale de Kigali

4 14-03-2019 - saa 08:33, Cyprien Niyomwungeri

Benshi basesa urumeza iyo bumvise intoki ze zivuruganya imirya y’inanga, zikungikanya n’amajwi anyura amatwi n’umutima ya Chorale de Kigali, maze uburyohe bw’umuziki wanditse bwabahinguranya mu misokoro, bakamukurira ingofero.

Ntawundi ni Tunezerwe Pacifique, umuhanzi ufite indiririmbo zirenga 200 yahimbye ziririmbwa hirya no hino muri diyosezi za Kiliziya Gatolika mu Rwanda. Ni umuririmbyi wa Chorale de Kigali kuva mu 2003, by’umwihariko akaba umucuranzi wayo w’imena.

Mu 1999 nibwo Tunezerwe yabashije gucuranga Misa bwa mbere ubwo yigaga mu mwaka wa kabiri w’amashuri yisumbuye muri Christ Roi i Nyanza, ari naho avuka. Imyaka 20 amaze acuranga umuziki wanditse uririmbwa n’abahanga [musique classique], yatumye aba igihangange kuko amaze gucuranga alubumu umunani mu 10 Chorale de Kigali ifite.

Yagiye anogereza indirimbo nyinshi zirimo nka ‘Turate Rwanda’, yanyuze benshi bakunda umuziki wa Chorale de Kigali n’izindi, acuranga by’umwimerere ‘La Conta’, yamenyekanye nka ‘Ihorere Munyana’, ibihangano bya Händel, Michael Jackson n’abandi bamamaye mu muziki wanditse.

Mu kiganiro cyihariye yagiranye na IGIHE, Tunezerwe yaduhishuriye byinshi mu rugendo rwe rwa muzika n’ibindi benshi bifuza kumumenyaho dore ko hari n’abadashidikanya kuvuga ko ari Georg Friedrich Händel, w’u Rwanda.

IGIHE: Dusangize ku rugendo rwawe rwa muzika

Pacifique: Urugendo rwanjye rwa muzika muri rusange ni ibintu natangiye niga mu mashuri yisumbuye mu mwaka wa kabiri, nibwo nabashije kugera ku rwego navuga rufatika kuko icyo gihe nibwo nabashije gucuranga bwa mbere. Icyo gihe nari ku ishuri tujya mu misa tugacuranga, nibwo nabashije gucuranga misa ikomeye twari twagize umunsi mukuru w’ishuri twigagaho, hanyuma iyo misa mbasha kugirirwa icyizere cyo kuyicuranga kubera urwego nari maze kugeraho.

Nyuma naje gukomeza kubikunda, nkareba abandusha ubumenyi bakagira ibyo banyungura, ndangije muri iryo shuri nkomeza gushakisha ubundi bumenyi muri muzika, ngira amahirwe yo kujya muri Chorale de Kigali, ari naho nakuye ubumenyi bwinshi cyane muri muzika.

Nigaga i Nyanza muri Christ Roi, ni ishuri ry’abapadiri, nacuranze Misa bwa mbere mu mwaka wa 1999.

IGIHE: Niba wibuka watangiye gukinisha gucuranga inanga (piano) ryari?

Pacifique: Natangiye kubikinisha mu mpera za 1997, nigeze kugira amahirwe njya ahantu ku Kiliziya mpabona Armonium, nkajya nyicokoza ariko ntazi iyo biva n’iyo bijya ngeze mu mashuri yisumbuye mbishyiraho umutima, barampugura.

IGIHE: Ni iki cyakugoye cyane ubwo watangiraga?

Pacifique: Icyangoye cyane ni ugucuranga ukoresha ibiganza byombi, nageragezaga ikiganza cy’ibumoso icy’iburyo bikanga, hakaba ubwo amanota y’ibumoso azamuka ay’iburyo amanuka, kubijyana biringaniye bikangora.

Bitewe nuko natangiye kubigerageza nkoresha igicurangisho kitwa ‘Harmonium’ ivuga ari uko banyonze, icyo gihe naranyongaga ngo ivuge, gucuranga sinshurange, nagerageza gucuranga ntivuge kuko nibagiwe kunyonga, kubijyanira rimwe biri mu byangoye ariko naje kubimenyera.

IGIHE: Tujya twumva abantu ngo biga umuziki mu mashuri yawo yihariye, wowe nta shuri ryihariye wawizemo?

Pacifique: Ntabwo nagize amahirwe yo kwiga mu ishuri mu buryo budasanzwe nka ‘conservatoire’, icyakora hari amasomo nigeze gukurikira ku ikoranabuhanga ‘online’ ndetse mbasha no gutsinda ikizamini ngiro. Hari muri Canada ku bw’ibyago sinabasha kujya kubyiga ndiyo.

Icyo kizamini natsinze ibyo bambajije ni ibyo bari bambwiye kwiga ‘online’, byanteye imbaraga binyereka ko hari ikintu nzi kuko icyo kizamini ni bake bagitsinda. Byanteye imbaraga ndakomeza, Chorale de Kigali ndirimbamo nayo ikanyereka ko nyifitiye akamaro, bikomeza kuntera imbaraga kugeza n’uyu munsi.

Nagiye kandi nkurikira amasomo mu bijyanye no gukora indirimbo [production], ndetse ntyaza ubumenyi muri muzika mfashijwe n’abanya-Korea, ku buryo byatumye ngirwa umwe mu bahugura abandi muri muzika ku rwego rw’igihugu (National Subject Trainer).

Tunezerwe Pacifique ni umwe mu bacuranzi b'imena ba Chorale de Kigali, buri gitaramo cyayo aba yabukereye

IGIHE: Ufatwa nk’umucuranzi w’inanga ‘Piano’ wa mbere mu Rwanda, ibanga ni irihe?

Pacifique: Ibanga nta rindi ni ukubikunda, icyakora bajya bavuga ko habamo n’impano. Bajya bavuga ngo gushaka ni ugushobora, ndibuka niga mu mashuri abanza habagaho kuririmba no gushushanya mu kizamini, nari nzi gushushanya cyane ariko kuririmba ni ibintu nagenderaga kure, ku buryo na mwarimu igihe cyageze turabipfa kuririmba byananiye ndetse ndanabyanga, nkatahira amanota yo gushushanya.

Ngeze mu mashuri yisumbuye nabonye aho babikora navuga ku rwego rwiza kuko ishuri rya Christ Roi, ni rimwe mu mashuri ateza imbere ibintu bya muzika, mbona uko babikora bigenda binzamo. Navuga ko kuba byari biryoshye ubwabyo, kuba ari ibintu byiza, byankuruye bindusha imbaraga maze ndafatwa hanyuma mbigerageje mbona birampiriye.

Abantu barambwiraga ngo ushobora kuba ufite impano nkumva bishoboka kuko nk’iyo misa nacuranze niga mu wa kabiri abandi barangiza imyaka itandatu batarabishobora, ndavuga nti Mana warakoze kuba warabinshoboje.

IGIHE: Ubundi uri n’umuhanzi, kuba umuhanzi byakujemo gute, hari abazi umuziki ariko batari abahanzi?

Pacifique: Maze kubasha kumenya gusoma amanota (solfege) nagendaga nsoma indirimbo nkareba ukuntu zubakitse nanjye nkiyumvamo ururirimbo (melodie) noneho nkayandika nkayereka abankuriye bakambwira bati wenda hano ntibihimbitse neza, aho iri bayiririmbye byabagora kuko hari ijwi washyize hejuru n’iryo washyize hasi cyane batabasha kugera hose.

Bagendaga bankosora bakanyereka n’amwe mu mabwiriza agenga guhimba neza, noneho ndabikora ndabimenyera ku buryo butunganye cyangwa burimo inenge nkeya, kuko nk’izo ndirimbo nakubwiye ziririmbwa hirya no hino ntawigeze azinkosora.

IGIHE: Ni ibihe bihangano byawe byamenyekanye abantu bakuziho?

Pacifique: Ndi umuhanzi nibyo koko ariko ntabwo ubuhanga bwanjye bushingiye mu kuririmba, nabyo ndabikora ariko nk’umuntu uba muri korali nkunda guhimba indirimbo ziririmbwa n’abandi. Mfite indirimbo nyinshi ziririmbwa n’abandi by’umwihariko Chorale de Kigali n’abandi.

Nk’umuntu usengera muri Kiliziya Gatolika, hirya no hino muri paruwasi baririmba indirimbo zanjye nko ku minsi mikuru nka Noheli, Pasika, usanga abantu baziririmba abandi bampamagara ngo iyi ndirimbo aha n’aha ko yatunaniye, hano washakaga ko biririmbwa gute?.

Hari n’ibihangano byinshi nagiye nkora by’ibigo binyuranye hari nk’ibyo nagiye nsinda bakoresheje amarushanwa ngo abantu bahatanira guhimba indirimbo yubahiriza icyo kigo, ibyo byose byatumye mbasha kubona ko nanjye nkomeye mu bijyanye no guhimba.

IGIHE: Ni nka zingahe wahimbye zikoreshwa muri Kiliziya, wanadusangiza kuri ibyo bigo wahimbiye?

Pacifique: Irushanwa nitabiriye rikanezeza cyane ni irya Kaminuza y’ubumenyingiro y’Amajyepfo (IPRC South), bashakaga indirimbo yubahiriza iri shuri batanga isoko, abantu biyumva ku buhanzi baraza turapiganwa. Icyo gihe twari amatsinda 23 bashakamo indirimbo imwe hanyuma mbasha gutsinda.

Harimo abantu bakomeye cyane muri iki gihugu mbasha kubatsinda ndavuga nti nshobora kuba mbirimo neza.

Hari ibindi bigo bitandukanye wenda nko muri Chorale de Kigali, hari igihe ikigo kivuga ngo mudukorere indirimbo hanyuma nkayigiraho uruhare rukomeye, nka za SORAS, ULK, Polytechnic nabo narabakoreye n’abandi.

Mu gitaramo cya Chorale de Kigali, Tunezerwe afatanya na bagenzi be mu gucuranga

IGIHE: Ubarura indirimbo nka zingahe wahimbye zikoreshwa mu Kiliziya?

Pacifique: Muri Chorale de Kigali turirimba nkeya kuko harimo n’abandi bahanzi ariko hirya no hino muri za paruwasi baraziririmba. Hari nubwo njya kubona nkabona umuntu azanye indirimbo muri Chorale de Kigali ati ‘iyi ndirimbo ko utayituzaniye ngo tuyige nkasanga ari nk’indirimbo nahimbye mu 2000, wenda ikaguma nk’ahantu nari ndi icyo gihe.

Ni indirimbo zirenga 200, hari izo ntibuka ariko izo nahimbye mbishyizeho umutima nkavuga nti iyi ndayihimbye koko numva abantu bayiririmba bitanteye isoni, ni indirimbo ziri hejuru ya 200.

IGIHE: Nk’indirimbo eshatu zamamaye cyane ushobora gusanga muri diyosezi zose nawe ukaba uvuga uti zanditse izina, ni izihe?

Pacifique: Hari ebyiri zikoreshwa ku minsi mikuru; hari iya Pasika yitwa ‘Alleluia Pasika, Alleluia Kristu yazutse’, n’indi ya Noheli yitwa ‘Noheli, umukiza yatuvukiye’ izo rwose muri diyosezi hafi ya zose zo mu Rwanda zirahari.

Hari n’iza Bikira Mariya, mfite nyinshi ze nazo zamamaye mu Rwanda ndetse no muri korali ho usanga bavuga ngo ndi umuhanzi wa Bikira Mariya, kubera ko birambangukira kumuhimbaho, kumuvuga ibyiza bye, rwose birambangukira cyane.

IGIHE: Waba wibuka indirimbo wahimbye bwa mbere?

Pacifique: Ndayibuka yari indirimbo baririmba mu Kiliziya yitwa ‘Agnus Dei’ ni Ntama w’Imana baririmba mbere yuko abakristu bajya guhazwa.

Ariko iyo ndirimbo yari ifite amakosa menshi ku buryo icyo gihe itaririmbwe, hanyuma ariko banyereka amakosa arimo ndayakosora mpimba indi. Iyo nayishyize mu kabati indi nahimbye nyikosora uko babinyeretse noneho nkomerezaho.

IGIHE: Iyo uheruka guhimba ni iyihe?

Pacifique: Hari iya pasika ndimo guhimba. Iyo yindi basanzwe baririmba nayihimbye mu 2005 ariko kuko twegereza Pasika ndavuga nti reka mpimbe indi. Ndimo kuyihimba ndi hafi kuyirangiza nzayiha Chorale de Kigali, hanyuma tuyiririmbe kuri Pasika nituba dufite umwanya.

IGIHE: Ni iyihe ndirimbo yawe ukunda cyane, kubera iki?

Pacifique: Nkunda indirimbo ya Bikira Mariya nahimbye yitwa ‘Mutoni watowe na Rurema’, kuko iri mu zo nahimbye bwa mbere kandi itangoye.

IGIHE: Mu zahimbwe n’abandi yaba mu Kiliziya n’izindi ukunda izihe?

Pacifique: Izahimbwe n’abandi nkunda indirimbo za Hendel kuko zibamo ubuhanga n’uburyohe bunyura kandi bunyura benshi ndetse uburyo bwe bwo guhimba bukaba bwaramfashije cyane mu rugendo rw’umuziki.

Izitari izo mu Kiliziya nkunda indirimbo za Michael Jackson, kuko ubuhanga bwe, uko atwara ijwi n’urunyurane rw’indirimbo ze nararukunze.

IGIHE: Mu Rwanda ni uwuhe munyamuziki wanditse ufata nk’icyitegererezo?

Pacifique: Hari abo turirimbana muri Chorale de Kigali, mu bo nagendeyeho cyane n’ubu tukiri kumwe ni Dr Byiringiro Jean Claude, yakoze indirimbo nziza cyane kandi abantu babasha kuririmba bose. Yambereye umubyeyi mwiza mu bijyanye no guhimba kandi n’ubu ndacyamugenderaho.

I Nyanza nigishijwe n’abafurere bigishijwe na Musenyeri Ngirabanyiginya Dominique, bafite ubumenyi budasanzwe muri muzika, nanjye nagize amahirwe yo guhura nabo.

IGIHE: Ni uwuhe musanzu utanga ngo umuziki wanditse usugire mu Rwanda?

Pacifique: Ndabyigisha. Ngerageza kujya mu mashuri amwe n’amwe nkabigisha kandi rwose bitanga umusaruro. Hari nk’ababimenya bamwe nkababwira bakaza muri Chorale de Kigali, bahagera bagashimwa, hari n’abakobwa bake ariko mu Rwanda ntabwo abakobwa bakunze kubangukirwa no gucuranga ariko njyewe mfite amahirwe ko hari abakobwa bagera kuri batatu nabyigishije kandi barabimenya ku buryo rwose yacuranga inanga abantu bakishima.

Ngerageza gutanga uwo musanzu nyuze mu mashuri kuko niho hari urubyiruko kandi n’uko ishuri ribitegura biba bishoboka ko ababyiga babikora babishyizeho umutima.

IGIHE: Abantu bavuga ko ari wowe mucuranzi w’inanga wa mbere mu Rwanda, wemeranya nabo?

Pacifique: Hari igihe nigeze kugera ku rwego rudasanzwe ari nabwo indirimbo zanjye zamenyekanye, icyo gihe barabivuze ariko nkunda gutanga urugero ku mupira w’amaguru, hari igihe uyu munsi haba hari kanaka abikora neza, ejo hakaza undi gutyo.

Baramvuga ariko nanjye hari benshi mbona babizi mfatiye urugero muri korali yacu harimo abana babikora neza cyane barimo kubyiruka, babikora ndetse ku rwego rurenze urwanjye.

IGIHE: Tujya tubona mu bitaramo bya Chorale de Kigali muri abacuranzi bane abantu bakibaza ngo kuki hatacuranze umwe, mubihuza mute?

Pacifique: Tuba twagerageje gukora nka ‘Orchestre Symphonique’ nubwo bitadukundira, kubera ikibazo cy’ubukene. Ibi igizwe n’ibikoresho bitandukanye kuko ntabyo dufite, ariko mu nanga bibamo, habamo amajwi y’ibyo bikoresho byose.

Turabigabana umwe akavuga ati ndacuranga ibisanzwe bicurangwa na violant, njye ndajya ncuranga ibya trumpete, njye ndajya mvuza tympanie cyangwa sembare, mbese ibyo bikoresho biba bikenewe muri Orchestre Symphonique, tukazikoranyiriza mu nanga buri wese agakina ibye bigahura.

IGIHE: Indirimbo wacuranze ukumva biragushimishije ni iyihe?

Pacifique: Ni iyo nacuranze bwa mbere ingoye kuko yari irimo ubuhanga bwinshi cyane ni iyitwa Alleluia du Messie. Narayize nyimenye ndavuga nti nkoze akazi kuko irakomeye, irimo ubuhanga kandi iraryoshye.

IGIHE: Hari indirimbo za Chorale de Kigali zumvikana kuri radiyo, kuri internet n’ahandi, ziriya zose ni wowe wazicuranze?

Pacifique: Oya. Korali ifite alubumu 10 izo nibuka nacuranzemo ni umunani. Hari alubumu ya mbere ya Jenoside, iya nyuma ya Jenoside mbere y’uko ngera muri korali. Nageze muri Chorale de Kigali mu 2003.

Hari iyo duheruka gusohora y’indirimbo za Ukaristiya twakoze umwaka ushize nafatanyije na bagenzi banjye ariko izindi zabanje guhera 2004 kuzamura kugeza uyu munsi ninjye wazicuranze.

IGIHE: Usanga abazi umuziki wanditse bacuranga mu kiliziya cyangwa izindi serivisi z’iyobokamana, ese uyu muziki watunga umuntu?

Pacifique: Hari igihe umuntu akora ikintu afite ikindi agamije, ariko yamutunga kimwe n’uko n’indi yose yamutunga. Ibintu byose bibamo amahirwe. Ifite akamaro kandi abantu bagenda babibona bivuze ko yagutunga nta kibazo.

IGIHE: Umaze imyaka 20 ucuranga inanga, ni iki wishimira muri iyo myaka yose?

Pacifique: Nishimira urwego nagezeho kuko uko nari meze icyo gihe mbitangira cyangwa se mbikora bwa mbere abantu bakambwira ngo wakoze ibintu byiza, nanjye koko numvaga ari byiza ariko uko bwacyaga nkahura n’abandi bagendaga banyungura ubundi bumenyi nkahora niga ku buryo no kugeza uyu munsi hari byinshi nkikeneye kumenya.

Benshi bemeza ko Tunezerwe Pacifique ari we mucuranzi w'inanga (piano) wa mbere mu Rwanda

IGIHE: Ubona ute umuziki Nyarwanda muri rusange?

Pacifique: Mbona ugenda utera imbere. Mu minsi ishize abantu bajyaga bavuga ngo indirimbo z’iki gihe nta kigenda ugereranyije n’iza kera ariko kuri uyu munsi nshima ko abahanzi benshi bagenda bavuka kandi muzika bayitwara uko ikwiye kugendamo.

Hari benshi bagenda bavuga bashyira imbaraga ku kubikora neza aho kubikora ngo bazabe ibyamamare.

Hari ririya shuri ry’umuziki ryo ku Nyundo ryimukiye i Muhanga, ririya shuri naryo ribigiramo uruhare rukomeye kuko njya ndeba nko muri PGGSS, iyo abana bacuranga ubona babikora neza cyane. Mu kuririmba iyo umuntu aririmbye Live abantu bakabishima kiba ari ikintu cyiza cyane.

IGIHE: Ni iki cyashyirwamo imbaraga ngo umuziki nyarwanda ugere ku rwego rwarenga EAC n’ahandi?

Pacifique: Ikintu cyashyirwamo imbaraga ni abahanzi bagerageza kujya babikora baharanira kubimenya. Gushyira imbaraga mu kubikora bagamije kubimenya, ni ukuvuga ngo niba ari ibisaba kwigwa agafata umwanya akajya mu ishuri hagiye hari amashuri ya muzika yigisha gucuranga guitar, Piano, ingoma, bagende babyige bagamije kubimenya kandi igihe wamenye ikintu ujye unareba uko abandi babikora bagerageze kubigana.

Ntabwo njyewe nkunda [Imana imbabarire], sinkunda kuba nakitwa nk’umuhanzi nta gikoresho na kimwe nabasha gucuranga. Bibaho ko waba umuhanzi utazi gucuranga ariko iyo hari akantu na kamwe uzi nka guitar cyangwa kuvuza ingoma biba ari akarusho. Niyo uri muri studio ukorana na producer ntabwo umugora.

Birababaza kuba umuntu ajya muri studio yagerayo producer ati jyana amafaranga yawe nzarya andi ndumva ungoye cyane.

IGIHE: Hari ikindi gikoresho kitari Piano uzi gucuranga?

Pacifique: Nigeze kugerageza Accordeo, guitar ntabwo nyizi ariko utayizi namwifatira nacuranga ibyo atabasha ariko inanga nayisanzuyemo cyane.

IGIHE: Ni uwuhe muhanzi nyarwanda ukunda?

Pacifique: King James

IGIHE: Ni iki wifuriza Chorale de Kigali?

Pacifique: Nifuza kuzabona Chorale de Kigali bose babasha gusoma amanota. Mu bihugu byateye imbere hari bagenzi banjye bajye batubwira ko korali usanga batabona umwanya wo gukora isubiramo, bahuye wenda umwe akorera i Rusizi, undi Musanze noneho bagafata urupapuro rw’indirimbo bakiga indirimbo bakazahura umunsi umwe cyangwa ibiri bagahuza.

Na Chorale de Kigali nifuza ko urwo rwego twarugeraho. Abagabo benshi cyane barabizi ariko turifuza ko n’abakobwa, abadamu babimenya.

Ikindi nifuza ni uko umunsi umwe twazaba dufite Orchestre atari za nanga igizwe n’ibyuma byinshi kuko kuririmba byo ntabwo turi ku rwego ruri.

IGIHE: Ni iki ukunda mu buzima busanzwe?

Pacifique: Kureba siporo no kuyikora. Ntabwo nabashije gukina umupira kuko amaso atanyoroheye ariko nakundaga gukina Volleyball.

IGIHE: Ufana iyihe kipe mu Rwanda no hanze?

Pacifique: Rayon Sports, i Burayi ni Real Madrid, Arsenal FC na Juventus

IGIHE: Umunsi wawe uba uteye ute?

Pacifique: Mu gitondo nkora siporo, nkaraba nkajya mu kazi, nataha mfite akanya nkakora siporo, nkareba uwo duhura tukungurana ibitekerezo, nkaza kuryama.

IGIHE: Ni iki mu buzima ukunda?

Pacifique: Umutuzo, gukorana n’umuntu utanshyiraho igitutu kandi akanyubahira ibyo nkora nanjye nkamwubaha nangore nanjye simugore.

IGIHE: Ni iki cyagushimishije mu buzima bwawe?

Pacifique: Kuba naramenye muzika biri mu byanshimishije kuko nabashije guhura n’abantu benshi n’ubu tugihura. Byatumye nunguka abantu benshi kikaba ari ikintu gikomeye.

IGIHE: Ni iki cyakubabaje mu buzima bwawe?

Pacifique: Icyambabaje nuko narwaye amaso, nk’umuntu ukunda siporo ntabwo nayijyanishije uko nabyifuzaga. Ndwaye amaso muganga akanyereka uko ndwaye byambereye ikibazo gikomeye byagize ingaruka mu mutwe wanjye nkagira ibint bimwe na bimwe bitagenda neza ariko narabyakiriye.

IGIHE: Ukunda kunywa iki?

Pacifique: Mu gitondo ni icyayi, ku manywa ni umutobe, hanyuma ubundi ni byeri.

IGIHE: Hari abavuga ko ari wowe wacuranze indirimbo za Kizito Mihigo, nibyo?

Pacifique: Oya. Nuko hari izo yahimbye nagerageza kuzicuranga abantu bakumva bimeze nk’uko bayumvise kuri radio bakavuga ko ari njye ariko sibyo.

IGIHE: Ni iki abantu batakuziho kijyanye na muzika?

Pacifique: Ni uko burya njya ndirimba.

IGIHE: Urateganya kujya muri studio ugakora indirimbo yawe?

Cyane rwose kuko abantu bajya babimbwira. Ndabishaka vuba aha kandi ntabwo byangora kuko producer ntitwamarana amasaha agera kuri abiri.

Twigeze gutangira guhimba indirimbo njye nabo turirimbana duhera saa munani saa kumi n’imwe iba igeze kuri CD.

IGIHE: Dusoza ni iki wabwira abakunzi bawe n’aba Chorale de Kigali?

Pacifique: Ndabashimira ko bankunda biranyubaka cyane yaba mu buryo tugenda tuganira kandi bambwira ko ibyo nkora bibanyura bigatuma havuka ubuvandimwe. Ndabizeza ko nzakomeza gufatanya nabo yaba mu guhimba indirimbo nzakomeza nzibashyikirize.

Abakunzi ba Chorale de Kigali ndabashimira ko badutiza imbaraga kuko nibo mbaraga zacu, iyo bitabiriye ibitaramo byacu, iyo batweretse ko badukunda, biradushimisha cyan.

IGIHE: Turabashimiye cyane

Pacifique: Namwe Murakoze.

Tunezerwe iyo acuranga abakunda umuziki wanditse basesa urumeza
Tunezerwe amaze imyaka 16 ari umuririmbyi n'umucuranzi wa Chorale de Kigali
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
gashati 2019-03-15 05:33:58

Uyu mutype arabizi rwose kandi cyane, inanga ntawe umurusha kuyikirigita nabihamya. Inama namugira ni uko atakwita ku bamuca intege ndetse akagira confidence zatuma aba icyamamare nka ba Kizito. Acuranga neza ibintu biryoshye kandi atarakoze concervatoire.

2
Kalisa mayidi 2019-03-14 16:49:13

Mwarimu wange nkunda cyane w’ibihe byise this guy is a blessing he makes learning process very funny that makes easy for students to understand it. Am proud of him he deserve every single sweet word to describe him he is a such hero

3
Joyeuse 2019-03-14 14:30:59

Kudos to my high school teacher at Mater Dei
U are still very humble

4
Mi 2019-03-14 03:31:00

Uyu muhanzi azi ubwenge ni umuhanga kandi akiyoroshya,icyo agamije ni ubumenyi mu byo akora si ukuba icyamamare n’ubwo nabyo bishobora kuziraho,keep it up Pacy!

Kwamamaza