Sherrie Silver yasobanuye ibyibazwa ku ndirimbo yagaragayemo ikomeje kuvugisha benshi muri Amerika

3 9-05-2018 - saa 11:34, Dusabimana Aimable

Sherrie Silver, umubyinnyi wabigize umwuga ukomoka mu Rwanda yahishuye byinshi ku byibajijwe ku mbyino yagaragaje mu ndirimbo ‘This Is America’ ikomeje guca ibintu no kurebwa mu buryo budasanzwe n’uko yahuye na Childish Gambino wayikoze.

Uyu mukobwa wavukiye mu Karere ka Huye, amaze kuba icyamamare nk’umubyinnyi w’umunyamwuga ubikora nk’akazi kamutunze. Yabyiniye abahanzi bakomeye muri Afurika n’abahagaze neza ku yindi migabane ariko by’umwihariko akomeje kugarukwaho biturutse ku mashusho y’indirimbo yitwa ‘This Is America’ yagizemo uruhare rukomeye.

Yayoboye imibyinire yagaragajwe yose ndetse aba n’umwe mu babyinnyi b’ibanze bifashishijwe na Childish Gambino ubusanzwe uzwi cyane nka Donald Glover mu myuga itandukanye nko kuba Umunyarwenya no gukina filime.

Iyi ndirimbo imaze kurebwa n’abakabakaba miliyoni 50 kuri Youtube mu minsi ine isohotse. Yavuzweho cyane mu binyamakuru bikomeye ku Isi ndetse benshi bayihererekanya ku mbuga nkoranyambaga bitewe n’uburyo yagaragaje ibibazo bitandukanye byugarije Leta Zunze Ubumwe za Amerika mu buryo bwa gihanga.

Mu kiganiro cyihariye uyu mukobwa yagiranye n’ikinyamakuru Pigeons & Planes yasobanuye birambuye uko byagenze kugira ngo akorane na Childish Gambino. Yanakomoje ku mateka ye mu bijyanye no kubyina no kuyobora imbyino n’amahirwe yabonye yo kwerekana impano ye imbere ya Perezida Paul Kagame akiyemeza guhita atangira kubikora nk’umwuga.

Sherrie Silver asanzwe asohora amashusho y’imbyino ze mu bihe bitandukanye akayashyira kuri Youtube. Yavuze ko yahamagawe n’itsinda rya Childish Gambino bigizwemo uruhare no kuba barayabonye bakayashima bigatuma bifuza gukorana na we ngo abafashe kuyobora imibyinire mu ndirimbo ‘This Is America’.

Yagize ati “Hari ubutumwa bwijimye muri yo, ni iyo mpamvu bashatse ko tuba umucyo w’aya mashusho. Muzi uko abana ari abaziranenge kandi baba batazi byinshi biri kuba? Twari hariya ngo duseke kandi duhe ibyishimo buri wese uyireba, kuko inyuma hari byinshi by’umwijima n’ukuri kweruye bigaragazwa.”

Yavuze ko afite intego yo kugeza umuco n’imbyino gakondo za Afurika ku yindi migabane akaba yizeye ko by’umwihariko aya mashusho y’indirimbo ‘This Is America’ yakozeho ari kimwe mu bizamufasha kubigeraho.

Sherrie Silver avuga ko imbyino yerekanye muri iyi ndirimbo zishushanya icyo benshi mu banyafurika bahuriyeho kuko kubyina kuri uyu mugabane atari umwuga ahubwo ari umuco.

Yagize ati “Kubyina ni byose kuri twe, niyo haba hari kuba ibingana iki, habe hagati mu ntambara cyangwa mu mapfa, ikintu kimwe Afurika ihuje ni uko tubyina twirukana akababaro. Si ngombwa kubikora nk’umwuga ahubwo ni kimwe mu bigize umuco wacu.”

Yagize ati “Mu mbyino twagerageje kwerekana ibiri kuba mu Isi hirya no hino. Ntabwo ari muri Amerika gusa ahubwo ni ku Isi yose. Twifuzaga gushyira umucyo n’ahari umwijima. Ni icyo abana bakora cyo kimwe n’imbyino ariko by’umwihariko izo muri Afurika.”

Sherrie Silver yayoboye imibyinire mu ndirimbo ’This Is America’ ikomeje guca ibintu

Mu kuyobora imbyino zifashishijwe muri iyi ndirimbo, Sherrie Silver yagiye atoranya izo mu mico itandukanye harimo izadukanywe n’umuraperi witwa BlocBoy JB zigezweho muri iki gihe mu rubyiruko rwo muri Leta Zunze Ubumwe za Amerika, iyitwa ‘Gwara Gwara’ yo muri Afurika y’Epfo yibanzweho, iyitwa ‘Shaku Shaku’ yo muri Nigeria, ‘Alkayida’ yo muri Ghana, izo muri Angola n’ahandi hatandukanye.

Iyi ndirimbo ya Childish Gambino yasakajwe ku mbuga nkoranyambaga mu buryo budasanzwe

Yavuze ko yifuje guhuza imbyino zo mu bihugu byinshi cyane cyane ibyo yabayemo ntiyibande ku z’aho akomoka gusa.

Uyu mukobwa w’imyaka 23 amaze gukorana n’abahanzi bakomeye barimo benshi bo muri Afurika nka Wizkid, Diamond Platnumz, Fuse ODG, Tiwa Savage, Run Town, Ice Prince ndetse na Sean Paul wo muri Jamaica.

Sherrie Silver [uri inyuma ya Childish Gambino] ni we wayoboye imbyino zifashishijwe muri 'This Is America'
Sherrie Silver afite ibikorwa by'ubugiraneza yagejeje n'i Kigali agafasha abagore bahoze mu buraya guhanga indi mirimo ibateza imbere

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Gutuburirwa 2018-05-09 13:09:14

Sinzi icyo uwo mukobwa yakoze ariko si we vidéo director. Video director ni uwitwa Hiro Murai.

2
Amina umuhoza 2018-05-09 09:20:34

I am impressed well done to that lady.

3
atos 2018-05-09 05:13:12

This is RWANDA

Kwamamaza