Serena Williams yavuze uko yari agiye guhitanwa n’inda ubwo yibarukaga imfura

0 11-01-2018 - saa 15:30, Dusabimana Aimable

Serena Williams, umwe mu bagore bakomeye mu mukino wa Tennis ku Isi, yagarutse ku bihe bikomeye yanyuzemo ubwo yibarukaga imfura tariki 31 Kanama 2017 akamara ibyumweru bitandatu mu buriri.

Serena Jameka Williams yabyariye mu bitaro byitwa St Mary mu Mujyi wa West Palm Beach wo muri Leta ya Florida, yibarutse imfura afite imyaka 35 nyuma yo kurushinga n’umuherwe witwa Alexis Ohanian uri mu bashinze ikigo cya Reddit gikomeye mu ruhando rw’ikoranabuhanga muri Leta Zunze Ubumwe za Amerika.

Yabwiye Vogue Magazine ko yabyaye abazwe nyuma y’aho umutima w’umwana we uhagaze mbere y’uko agera ku Isi. Yongeyeho ko atiyumvaga neza nyuma y’umunsi umwe yibarutse ku buryo abaganga bahise banamusangana amaraso yiremyemo ibibumbe mu bihaha.

Serena Williams yavuze ko nyuma gato yaje guhura n’ikindi kibazo, ibikomere by’aho yari yabazwe byarafungutse amaraso yuzura igihimba. Yagize ati "Byari ibihe bidasanzwe kwibaruka nyuma byose bitangira kugenda nabi."

Avuga ko na mbere y’uko yibaruka yiyumvagamo ko bishobora kumugiraho ingaruka ku buzima. Yaburaga umwuka kenshi, biri no mu bibazo by’ubuzima yari asanganywe gusa ngo yahamagaye abaganga ababwira kwizera "Dr. Williams [Yivuga]." Kuko yari azi ikibazo asanganywe.

Yavuze ko yakororaga buri mwanya bikarushaho gufungura ibikomere by’aho yabazwe ku buryo yamaze ibyumweru birenga bitandatu ku buriri kugira ngo abashe gutora agatege.

Serena Williams muri iki gihe ahamya ko yongeye gusubira mu buzima neza ndetse nta bibazo cyangwa ingaruka zindi byamuteye ariko agahamya ko yagowe no kuba umubyeyi ndetse no kwimukira aho umugabo we akorera mu Mujyi wa San Francisco.

Yavuze ko umwana yibarutse azamutoza kuba umugore w’umunyembaraga ntagire ukwizitira muri we. Ati "Ntekereza ko rimwe na rimwe abagore twizitira mu bintu bitandukanye. Sinzi impamvu dutekereza muri ubwo buryo. Nishimiye kubyara umukobwa. Ndashaka kuzamwigisha ko nta kigomba kumuzitira mu buzima bwe."

Yongeyeho ko anyotewe no kuzasubira ku mwanya wa mbere mu bakina Tennis b’abagore ku Isi nyuma y’aho agiye mu kiruhuko akajya ku mwanya wa 23 ku Isi. Yagize ati "Nta muntu wigeze ujya kuri uriya mwanya wa mbere ngo awugumeho mu gihe nari ndi hariya. Bizaba ari byiza cyane ninongera kuhagera, aho nita mu mwanya wanjye, numva ko ari ho nkwiye."

Serena Williams amaze kubyara yamaze ibyumweru bitandatu aryamye

Serena Williams na Alexis Ohanian babyaranye umwana w’umukobwa bise "Olympia" bakoreye ubukwe ahitwa Contemporary Arts Center muri New Orleans, ibirori byabo byatashywe n’inshuti zabo za hafi zibarirwa muri 250.

Mu byamamare byatashye ubukwe bwa Serena Williams na Alexis Ohanian harimo umuraperi Jay Z n’umugore we Beyonce, Kim Kardashian, Eva Longoria n’umugabo we José Bastón, hari kandi umukinnyi wa Tennis Caroline Wozniacki na fiancé we David Lee ukina muri NBA.

Serena Williams mu kinyamakuru Vogue yavuze ku buribwe yanyuzemo nyuma yo kwibaruka
Serena Williams yibarutse umwana wa mbere ku myaka 35
Uyu mwana yamubyaranye n’umuherwe witwa Alexis Ohanian uri mu bashinze ikigo cya Reddit
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza