Nzayisenga Sophia na Mavenge bagiye guhurira mu gitaramo cy’inkera

0 11-07-2018 - saa 16:35, Dusabimana Aimable

Sophia Nzayisenga, umugore umaze imyaka irenga 30 acuranga inanga yatumiwe mu gitaramo cy’umwimerere w’injyana gakondo, aho azasusurutsa abakunzi b’uwo muziki ari kumwe n’abahanzi barimo Mavenge Sudi.

Iki gitaramo cyiswe “Gakondo Acoustic Gala” gitegerejwe ku wa 20 Kamena 2018 muri Impact Hub Kiyovu kizasusurutswa n’abahanzi batandukanye bakora injyana gakondo n’ituje barimo Alyn Sano, Ruti Joel, Ange & Pamela bafatanya ndetse n’abakuze Mavenge Sudi na Nzayisenga Sophia ukurigita inanga.

Kizaba gikurikiye ikindi cyaherukaga kuba ku wa 22 Kamena 2018 kigahumuza abakunzi b’umuziki bari bitabiriye bose banyuzwe n’ubuhanga bwagaragajwe n’abahanzi batandukanye biganjemo abakibyiruka bagaragaje ubuhanga mu miririmbire no gucuranga.

Mu kiganiro na IGIHE, Kayitare Mustapha uri mu batangije itegurwa ry’ibi bitaramo yavuze ko icyo kuri iyi nshuro kizazana undi mwihariko wo kuba hazagaragazwa n’ubuhanzi gakondo butari umuziki gusa hanyuma bakanarushaho kongeramo abahanzi bafite babirambyemo bizeyeho kuzanyura benshi.

Yagize ati “Turi kugenda twongeramo n’abahanzi b’inararibonye, urebye Mavenge Sudi ukanareba Sophia Nzayisenga ubona ko abahanzi bafite ubuhanga mu byo bakora kandi bazasusurutsa abantu bakanyurwa, bityo turabasaba kuzahagera kare.”

Yongeyeho ati “Umwihariko w’iki cyiciro cya kabiri cy’ibitaramo bya gakondo ni uko ubu noneho tuzaba dufite n’undi mushyitsi abantu bazamenya bahageze ukora ubundi buhanzi butandukanye n’umuziki. Twizeye ko abantu bazanyurwa.”

Yavuze ko bifuza ko iki gitaramo gitandukana n’ibindi bimenyerewe mu Rwanda bijya bitangira byatinze cyane ku masaha bityo bagasaba abazitabira kuhagera hakiri kare ku isaha yateganyijwe kugira ngo ibikorwa by’igitaramo ntibibasige.

Sophia Nzayisenga yitezweho kunyura abazitabira iki gitaramo

Iki gitaramo kizabera muri Impact Hub iri mu nyubako ya The Office yo mu Kiyovu kizatangira ku isaha ya saa kumi n’ebyiri z’umugoroba kigeze saa yine z’ijoro. Kwinjira byashyizwe ku bihumbi bitanu by’amafaranga y’u Rwanda (5,000 Frw).

Abagiteguye bavuga ko impamvu bahisemo kwibanda ku njyana gakondo ari mu buryo bwo kuyigarurira bihoraho abayikunda cyane ko nta hantu henshi hakiboneka mu Mujyi wa Kigali ho gusohokera mu bihe runaka bizwi kandi bigaruka ku bakunda iyo njyana kuko n’ibikorwa byabagaho nka cyo mbere hari ibyagiye bicogora.

Mavenge Sudi agiye kuririmba mu gitaramo cya Gakondo Acoustic Gala
Umuhanzikazi Alyn Sano ukora injyana ituje na we ari mu bazaririmba
Iki gitaramo kizaba kirimo abahanzi b'abahanga mu muziki

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza