IGIHE

Ndahiro uzwi nka Paul muri filime yahishuye uko yavuye mu ishuri akajya mu gisirikare (Video)

6 23-08-2019 - saa 21:12, Muvunyi Arsène

Izina Willy Ndahiro rizwi na benshi bakurikirana uruganda rwa sinema yo mu Rwanda, kuko ari umwe mu bakinnyi ba filime babimazemo igihe kandi babikora neza.

Yakinnye nk’umukinnyi w’ibanze muri filime ifatwa nk’iy’ibihe byose “Ikigeragezo cy’Ubuzima”aho yitwaga Paul n’ubu hari abakimwita iri zina.

Si iyi gusa kuko yakinnye no mu zindi zirimo “Ay’urukundo”, “Kinyarwanda”, “Anita” n’izindi. Yagiye yegukana ibihembo bitandukanye bitangirwa mu Rwanda birimo nk’icyumukinnyi w’umugabo wahize abandi muri Urusaro International Women 2018.

Mu kiganiro yagiranye na IGIHE yadutangarije ko ibya sinema yatangiye kubikunda akiri umwana muto aza gukabya inzozi ze bwa mbere ubwo yakinaga muri filime “Ikigeragezo cy’Ubuzima”.

Ndahiro ni umugabo w’imyaka 43 ariko umurebye ku isura ntabwo wapfa kubimenya. Acisha make kandi agakunda guseka.

Uyu mugabo benshi babumenye muri sinema ariko hari ibitazwi ku buzima bwe bwite. Yaduhishuriye ko mu 1993 yaretse ishuri akifatanya n’abandi mu rugamba rwo kubohora u Rwanda, icyo gihe akaba yari afite imyaka 17.

Ati “Bitewe n’amateka twese twanyuzemo tutayobewe, nari ngeze mu mwaka wa kane w’amashuri yisumbuye mpita mfata icyemezo cyo kuzana n’urundi rubyiruko tuza ku rugamba rwo kubohora igihugu.”

Ubuzima bwa gisirikare bwahuye n’indoto za gukina filime, Ndahiro avuga ko iyo yabaga yambaye impuzankano y’inkotanyi yumvaga ameze nk’umukinnyi Jean Claude Van Damme, wamamaye nk’indwayi ikomeye.

Ati “Ngeze mu gisirikare urebye ukuntu nakoraga n’umukinnyi nakundaga nkiri muto witwa Jean Claude Van Damme, wasangaga uko nabaga nambaye imyenda ya gisirikare, uko nabaga meze nari nka Van Damme yari yaranyinjiyemo.”

Nyuma yo gufatanya n’abandi guhagarika Jenoside yakorewe abatutsi mu 1994, Ndahiro yabaye mu gisirikare cy’u Rwanda mu gihe cy’imyaka icyenda asubira i Burundi ajya kurangiza amashuri ye yisumbuye yari yaracikishirije.

Willy Ndahiro avuga ko kuba yarabaye mu ngabo z’u Rwanda zagize uruhare mu guhagarika Jenoside no kubohora abanyarwanda, ari cyo kintu yishimira mu buzima azanaraga abana be.

Ati “Nifuzaga kuzaba umusirikare, naramubaye mfatanya n’urubyiruko bagenzi banjye tubohoza igihugu cyacu, iyo ni intsinzi nzishimira mu buzima bwanjye bwose n’abana banjye nkabibaraga.”

Muri iyi minsi ntabwo Ndahiro akigaragara muri filime zigaragara ku isoko ry’u Rwanda, ahubwo yibanda muri filime zerekanwa mu maserukiramuco atandukanye.

Yavuze ko mu gihe gito kiri imbere azagaragara muri filime iri mu kinyarwanda n’ubwo yirinze kuyitangazaho byinshi.

Willy Ndahiro ni umwe mu bakinnyi ba filime bakomeye mu Rwanda
Willy Ndahiro yahawe igihembo cy'umukinnyi wa filime wahize abandi mu 2018
Willy Ndahiro yabaye umusirikare afite imyaka 17
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Nseko 2019-08-26 07:22:58

yeeeeeengo filme!!!!!!

2
Geoffrey 2019-08-24 03:21:46

Courage Will Jogo Igisumizi ndakwibuka Twabonye uri muto kweri Ex Ruhengeri

3
Nsengiyumva isai 2019-08-23 18:46:43

Mbanje kubasuhuza
Nibyagaciro kubayarabaye mungabo zurwanda imana
Izamuhe umugisha

4
Nsengiyumva isai 2019-08-23 18:46:43

Mbanje kubasuhuza
Nibyagaciro kubayarabaye mungabo zurwanda imana
Izamuhe umugisha

5
Nsengiyumva isai 2019-08-23 18:46:43

Mbanje kubasuhuza
Nibyagaciro kubayarabaye mungabo zurwanda imana
Izamuhe umugisha

6
Nsengiyumva isai 2019-08-23 18:46:43

Mbanje kubasuhuza
Nibyagaciro kubayarabaye mungabo zurwanda imana
Izamuhe umugisha

Kwamamaza