Nyampinga w’u Rwanda, Iradukunda Elsa, yatangije ku mugaragaro irushanwa ngarukamwaka ryo koga nk’umwe mu mikino izwiho umwimerere mu gukiza amavunane ndetse ukanafasha gushira umunaniro.

Iri rushanwa ryiswe ‘Ndi Nyampinga Swimming Competition’, ryatangijwe kuri uyu wa Gatandatu,tariki ya 12 Kanama 2017, ku ikubitiro ryitabiriwe n’amakipe yo koga umunani arimo aturuka mu Ntara y’Uburasirazuba n’ayo mu Mujyi wa Kigali arimo n’iyo kuri Cercle Sportif isanzwe ikinamo Miss Elsa ari na yo yabaye iya mbere ihabwa igikombe.

Abavandimwe bane ba Miss Iradukunda basanzwe bahuriye no mu ikipe ya Cercle Sportif, barimo abakobwa batatu n’umuhungu umwe bari mu batsindiye imidali y’ishimwe.

Miss Iradukunda Elsa avuga ko iri rushanwa ahanini ryashyiriweho abakiri bato n’urubyiruko, guhera ku bafite imyaka umunani kugeza kuri 25 ndetse yemeza ko iki gikorwa kizarushaho kuzamura urwego rw’umukino wo koga usanzwe uriho mu Rwanda.

Yagize ati “Uriya mukino uko nywubona mu Rwanda ntabwo uhagaze nk’uko nakwifuza ko uba uhagaze, nk’uko indi mikino yose iba imeze. Niyo mpamvu nateguye irushanwa kugira ngo mbe nabasha kugira icyo nkora mu kumenyekanisha cyangwa se gukundisha abantu umukino wo koga.”

Miss Iradukunda Elsa avuga ko yatangiye umukino wo koga afite imyaka icyenda y’amavuko. Uyu mukobwa avuga ko impamvu awukunda cyane ari uko iyo umuntu yoga ingingo zose zikora nk’uko byakagombye.

Iki gikorwa cyiyongereye ku bindi uyu mukobwa yagiye akora mu gihe cy’amezi atandatu amaze atowe birimo iby’ubukangurambaga bushyigikira "Made in Rwanda". Agihabwa inshingano yasuye imishinga y’abikorera ku giti cyabo i Rutsiro n’i Rubavu barimo n’abahuguriwe i Iwawa bakora imyuga itandukanye.

Miss Iradukunda Elsa avuga ko nyuma y’iki gikorwa cyo gutangiza irushanwa ry’umukino wo koga mu Rwanda, azahita atangira gushyira imbaraga mu mushinga yiyemeje ubwo yiyamazaga, akagenda asura bimwe mu bigo by’abakora ibikorerwa mu Rwanda akagerageza kubashakira abafatanyabikorwa babishyigikira.

Irushanwa ryiswe ‘Ndi Nyampinga Swimming Competition’, ryafunguwe ku mugaragaro ryitabirwa n'amakipe umunani
Iki gikorwa cyabereye kuri Cercle Sportif mu Mujyi wa Kigali
Abana bato batekerejweho mu kurushaho guteza imbere umukino wo koga
Iri rushanwa ryakurikiranywe n'abantu b'ingeri zitandukanye biganjemo abakibyiruka
Abarushanwe bakoreshaga uburyo butandukanye baharanira guhesha intsinzi amakipe yabo
Iri rushanwa ngarukamwaka ku ikubitiro ryitabiriwe n'abari hagati y'imyaka umunani na 23
Iri rushanwa ryagaragaje impano z'abana b'abahanga mu koga
Miss Iradukunda Elsa na we yagaragaje ubuhanga mu mukino wo koga
Urubyiruko rwagaragaje ubuhanga mu koga
Perezida wa Komite Olempike mu Rwanda, Ambasaderi Valens Munyabagisha (uwa gatatu uturutse iburyo) mu bayobozi bitabiriye umuhango wo gutangiza iri rushanwa
Abarushanwaga barimo n'abavandimwe ba Miss Iradukunda Elsa batahanye imwe mu midali yatanzwe
Abitwaye neza mu irushanwa ryo koga ryatangijwe na Miss Elsa bambitswe imidali y'ishimwe
Ikipe yo kuri Cercle Sportif niyo yahize izindi mu irushanwa 'Ndi Nyampinga Swimming Competion'
Nyampinga w'Igihugu yavuze ko iri rushanwa aryitezeho kongera umuvuduko mu iterambere ry'umukino wo koga mu Rwanda

Amafoto: Mahoro Luqman


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved