IGIHE

Knowless na Clement bahuriye mu kiganiro bahishura byinshi batigeze bavuga ku rugo rwabo

3 11-09-2019 - saa 09:11, Nsengiyumva Emmy

Ishimwe Clement na Butera Knowless ni urugo rw’ibyamamare, mu minsi ishize bizihije isabukuru y’imyaka itatu ishize barushinze. Bwa mbere aba bombi baherutse guhurira mu kiganiro kimwe, cyibanze ku rugo rwabo, uko bahuye ndetse banahishura ibyo benshi badakunze kumenya ku mibanire yabo.

Ibi babitangarije mu kiganiro ‘Samedi détente’ cyatambutse kuri radiyo Rwanda ku wa Gatandatu tariki 7 Nzeri 2019. Ni ubwa mbere bari bahuriye mu kiganiro. Bagarutse ku buryo bamenyanye, uko baje guhuza bagatangira guteretana ndetse n’uko babanye nyuma yo kurushinga.

Knowless yatangiye atangaza ko yamenye Clement cyera kuko bize hamwe. Gukorana byo ngo byatangiye ubwo uyu muhanzikazi yasabaga Clement wari ufite studio ko yamukorera indirimbo. Kuri iyo nshuro batangaje ko bitagenze neza kuko Knowless yishe gahunda bituma basubika indirimbo bendaga gukorana.

Ngo Clement wari warakaye ku nshuro ya mbere yongeye gusabwa na Knowless ko bakorana indirimbo ku nshuro ya kabiri aribwo bakoze iyitwa “Sinzakwibagirwa”.

Muri iki kiganiro Clement yatangaje ko habuze gato ngo byose bihagarare nyuma y’uko Butera Knowless yari amaze kwica gahunda ya mbere.

Ibyo kumusinyisha muri Kina Music yatangaje ko byatewe n’uko yari yujuje ibisabwa umuhanzi wese iyi nzu ifasha abahanzi isinyisha kandi ko ibyakurikiyeho byerekana ko atibeshye.

Knowless yinjiye muri Kina Music mu 2011, Clement avuga impamvu yamusinyishije yagize ati “Yari yujuje ibisabwa; kuba umuntu afite impano, ikinyabupfura ndetse azi nicyo ashaka.”

Clement abajijwe igihe cya mbere yibuka yabonye Knowless, yagize ati “Twiga mu mashuri yisumbuye kuko twize hamwe.” Muri iki kiganiro Knowless yahishuye ko batangiye gukundana byeruye mu 2012.

Abajijwe icyabaye kugira ngo nyuma y’umwaka umwe uwari umuhanzi mu nzu ifasha abahanzi ahinduke umukunzi, Clement yagize ati “Nta kidasanzwe ,turi abantu nk’abandi basore bose n’abakobwa bose uko bigenda niko natwe byagenze. Igihe iyo kigeze umuhungu n’umukobwa batangiye kwiyumvanamo bafata icyemezo bagakundana bakarushinga, rero nta kidasanzwe.”

Mu rukundo hari igihe bitagenda uko umuntu abishaka, Clement yabajijwe niba atarigeze na rimwe ashaka guhagarika urukundo rwe na Knowless, agira ati “Igitekerezo nk’icyo ntikigeze kiduturukaho, hari abandi bagize igitekerezo cyo kubihagarika batari twe. Hari abandi bagiye bagira ibi bitekerezo ntibahirwe, reka mbagirire ibanga. Hari abantu batajya bishima, batajya bumva ko abandi bajya bishima ariko twe ntabyabaye.”

Kuba bakorana nk’abashakanye Knowless yatangaje ko byamufashije. Aha yashimangiye ko nta kintu cyiza nko gukorana n’umuntu w’inshuti yawe magara.

Mu gusubiza ibintu bitatu yungutse, yagize ati “Kugira aho mbarizwa, byazamuye iterambere ryanjye mu muziki ku buryo bwihuse, ikindi byarankujije cyane.”

Knowless yabajijwe niba nta na rimwe ubuzima bw’urugo burabangamira akazi ke bitewe n’uko akorana n’umugabo we, maze asubiza ati “ Nta na rimwe bishobora kubangamirana, hari igihe kimwe cy’umuryango hari n’ikindi gihe cy’akazi. Akazi ni akazi hanyuma ubuzima bwite ni ubuzima bwite.”

Clement yatangaje ko hari igihe ashyira igitsure ku mugore we cyane cyane iyo bari mu kazi akagira ibyo adakora neza.

Ati “Icyo nicyo cyica ibintu niba umuntu yishe gahunda, nta mpamvu yo gushaka irindi zina ryabyo ni ukwica gahunda. Yaba uwo mubana cyangwa uwo mutabana kwica gahunda ni ukuyica, nta kindi rero cyabigira byiza ngo kubera ko ari umuntu mubana.

Knowless yahise avugira muri Clement ati “Njyewe hari igihe birenga ahubwo, rimwe na rimwe nkamubwira nti ariko njye mba mbona unkanira cyane.” Mu kumusubiza, umugabo we yagize ati “Wenda wasanga ari uko aba atekereza ko hari izindi mpuhwe ndi bumushyiriremo ariko ni akazi. Cyereka adusezereye cyangwa twe tukamusezerera aho ngaho aho twahurira kugira ngo mukanire nkuko ari kubivuga hazaba havuyeho.”

Ibindi bagarutseho ku mibanire yabo

-  Umunyamakuru: Knowless muri mwe ni nde uzi kuremba cyane iyi arwaye?
-  Knowless: Clement
-  Umunyamakuru: Clement ni nde wahaye umwana wanyu izina Or?
-  Clement: Ni njye
-  Umunyamakuru: Knowless ni nde wifuje ko urukundo rwanyu rwajya ahagaragara bwa mbere?
-  Knwoless: Nta n’umwe
-  Umunyamakuru: Ni nde wabwiye undi ndagukunda bwa mbere?
-  Clement: Ni njye ku mpamvu z’umutekano
-  Umunyamakuru: Knowless ni nde uzi guteka cyane?
-  Knowless: Ni njye
-  Umunyamakuru: Clement ni iyihe mpano ihenze mu buryo bw’amafaranga wahaye Butera?
-  Clement: Impano ihenze? Eeehhhh ntakubeshye sinahita nyibuka, icyo kibazo iyo mukimubaza
-  Umunyamakuru: Knowless wamubwiye gute ko mwitegura kwibaruka imfura?
-  Knowless: Yabimenye mbere yanjye,(bahita baseka bose)
-  Umunyamakuru: Clement nakwibutse byibuza, abikubwira byari bimeze bite?
-  Clement: Yarabimbwiye, nkuko abikubwiye mubwira ko nari mbizi. Yabimbwiye amaso ku yandi. Ni ibintu byangora ko mbibabwira ariko nari mbizi.

Hari ukuntu ubyiyumvamo, hari ukuntu nabyiyumvisemo niyumvamo ko ari umukobwa. Nabyo nabimubwiye mbere y’uko abimenya [… ]yabimbwiye azi ko ari amakuru ndamubwira nti urakoze kubimbwira, njye nari mbizi.
-  Umunyamakuru: Clement ni nde uganiriza abashyitsi cyane mu rugo?
-  Clement: Ni njye
-  Umunyamakuru: Knowless ubona Clement bwa mbere cyera wamutekerejeho iki? Wamubonye ute?
-  Knowless: Nabonye yujuje ibyo umuntu nkunda, nari ntaramenya uwo ariwe. Kuva cyera ntabwo nakundaga kwa kundi abahungu bambara amapoketi, nkiri umwana narabyangaga cyane. Rero wasangaga Clement atameze gutyo, yabaga yifunze. N’imyenda y’ishuri iteye ipasi.
-  Umunyamakuru: Iyo mufite gahunda ni nde utinda kurangiza kwitegura muri mwebwe?
-  Knowless: Ni njye
-  Umunyamakuru: Ni inde muri mwe ufite imiguru myinshi y’inkweto?
-  Clement: Ni Knowless
-  Umunyamakuru: Ni nde ubasha guhoza umwana iyo yarize cyane?
-  Knowless: Ni njye
-  Clement: Urabizi neza? Hari abashyitsi tujya tugira bari kumva... arabeshye
-  Knowless: Biterwa, umwana ni umukobwa wa se cyane. Ariko nyine iyo yarize cyane ni njye umuhendahenda.
-  Clement: Amahirwe ni uko buri wese afite igisubizo cye, icyo nicyo cyawe nanjye icyanjye ni uko ari njye.
-  Umunyamakuru: Clement ni irihe kosa Knowless akunda kukunenga?
-  Clement: Ubanza ari uko ntavuga
-  Umunyamakuru: Knowless ni iki wishimira ko wigishije Clement kuva mwabana?
-  Knowless: Ubu asigaye arya imyumbati, mbere ntiyayikozwaga ariko ubu asigaye ayirya.
-  Umunyamakuru: Ni ikihe kintu cyo kubashimisha mukora muri kumwe muruhuka kikabashimisha mwembi?
-  Clement: Kureba Filime nziza, twese dukunda filime. Ntabwo dukunda gusohoka cyane iyo dufite umwanya tureba filime.
-  Umunyamakuru: Knowless hari indirimbo wari wakora ku mubano wanyu?
-  Knwoless: Ntayo
-  Umunyamakuru: Clement ni ikihe gihuha kidasanzwe cyabavuzweho ku buryo n’ubu iyo ubyumvise uvuga uti uyu muntu yari yabitekereje ate?
-  Clement: Ibyinshi ni ibihuha kumenya ikiruta ibindi biragora, ariko hari abantu bavuze ngo twaratandukanye ku buryo umwe mu babyeyi banjye yahuye nabo babitekereza babimubazaho, arampamagara arabimbaza ambaza niba tumeze neza nta kibazo. Musobanurira ko ibyo ari ibihuha twe twabimenyereye.

Iki kiganiro cyasojwe n’ibibazo by’abafana barimo uwababajije igihe bumva vazabyarira umwana wa kabiri, Clement amusubiza yagize ati “Mu by’ukuri gahunda ntayo turagira.”hari n’undi wababajije uko bahamagarana mu rugo, Clement ntagutinda yahise ahamagara Knowles ati “We kadogo”, undi nawe arikiriza ati “Yes Afande”.

Hari umufana wababajije niba iyo hari ibyo batumvikanyeho mu kazi babijyana no mu rugo cyangwa bahita babirenga. Clement agira ati “Iyo tugize ibyo tutumvikanaho ku kazi tubirekera aho tukazabisubukura dusubiye mu kazi. Mu rugo duhita dusubira mu buzima busanzwe.”

Clement yabajijwe ikosa atababarira Knowless nk’umuntu bubakanye aramutse arikoze, mu gusubiza yagize ati “Biragoye ko nabona ikintu yakora simubabarire, ni umuntu, uko yakosa na njye ni ko nakosa. Imana nibaza ko yanshoboza kwihanganira ikintu cyose cyaba ariko bitanabaye nabwo byaba ari mu bushake bwayo.”

Basoza iki kiganiro cyamaze hafi isaha, babajijwe n’umufana impamvu bahisemo kutagaragaza isura y’umwana wabo ku mbuga nkoranyambaga, Clement ahita amusubiza ati “ni icyemezo twafashe twese umwana agomba kugira uburenganzira bwo guhitamo icyo azaba cyo. Rero ntabwo twabonye ari byiza kumugaragaza. Ariko ntabwo twamuhishe ushaka kudusura rwose karibu azamubona.”

Iyi foto yakanyujijeho, bayifotoje bikimara kumenyekana ko bakundana
Abari basanzwe bahujwe n'akazi baje kuvamo abakunzi
Urukundo rwaje kuvamo gusezerana
Hashize imyaka irengaho gato itatu bakoze ubukwe
Kuri ubu ni umuryango wishimye ufite umwana wabo w'imfura bise Or
Knowless na Clement bahuriye mu kiganiro cya Radiyo Rwanda
Kwamamaza
Kwamamaza

Izindi nkuru wasoma

0 29 21-10-2019
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Genesis 2019-09-11 04:16:19

Ariko byo uyu mugabo agaragara nk’ umuntu uri serious kabisa, ko nta wamubajije ikibazo na kimwe kuri Safi Madiba?

2
kanuma 2019-09-11 03:54:52

urugo rwumuntu nibanga rigomba kumennywa N’Imana gusa wewe numugore wawe mwatangiye kuba injajwa conseil nabaha mwace mudomo.

3
Mukayiranga jane 2019-09-11 03:35:57

Kbs iyi nkuru yakoranywe ubuhanga kuyisoma bisa neza no kuba warakurikkiye ikiganiro thank u guys for great work

Kwamamaza