Ikiganiro kirambuye na Mani Martin, umunyempano uvugisha benshi (Video)

4 16-05-2018 - saa 16:21, Dusabimana Aimable

Mani Martin, umwe mu bahanzi bafite ubuhanga bwihariye, yigaragaje bwa mbere aririmbira Imana inganzo imaze kwaguka ajya mu muziki ugamije ubucuruzi; abatabarika bashima impano ye gusa hari n’abatanyurwa bamufata nk’uwateye umugongo agakiza.

Ni umuhanga mu guhanga byihariye akaba ntagereranywa mu kugira ijwi ryuje ubuhanga. Impano yo kuririmba yayivomereye kuva mu buto akibyiruka amenyekana cyane mu ndirimbo zo guhimbaza Imana. Nyuma yaguye inganzo ayerekeza no mu muziki bamwe bita ‘uw’Isi’.

Mani Martin azwi cyane asengera mu itorero rya ADEPR ndetse yabaye umwe mu baramyi bakomeye mu Rwanda binyuze mu ndirimbo nka ‘Urukumbuzi’, ‘Ituro’ n’izindi nyinshi . Nyuma yiyeguriye umuziki wa ‘secular’ mu ndirimbo zamenyekanye zirimo ‘Ideni’, ‘Amazi Magari’, ‘Yari Wowe’ n’izindi.

Muri iki gihe yabaye nk’uhindura umuvuno amaze kumenyerwa mu ndirimbo zishyira imbere umudiho wa kinyafurika, rimwe na rimwe anumvikana muri gakondo y’u Rwanda.

Mu kiganiro kirambuye na IGIHE, Mani Martin yatangaje ko umuziki aririmba ahanini ushingira ku wo ari we ndetse n’ubutumwa bushobora guhindura umuryango mugari mu buryo bugira akamaro.

Ati “Ndi umuhanzi utagira imipaka mu byo ndirimba, ni nayo mpamvu mu bijyanye n’injyana abantu benshi bakunda kunyibazaho. Ni ukuvuga ngo ntabwo njyewe nishyiriraho imipaka, ibintu byose nshobora kubiririmba cyane cyane iyo bifite akamaro.”

Yanakomoje ku mpamvu atacyumvikana cyane mu ndirimbo zimenyekanisha iyobokamana. Ibi iyo abivugaho adaciye ku ruhande akubwira ko ubu yinjiye mu muziki by’umwuga ndetse akavuga no ku batishimira icyerekezo yahisemo gufata.

Ati “Kuba buri muntu wese atekereza ukwe n’undi ukwe ngira ngo niyo mpamvu ituma dushobora guhuza ibitekerezo tukubaka Isi. Nta muntu nasaba kubyumva uko mbyumva ariko nta n’uwansaba kubyumva uko abyumva kuko ni imyumvire yacu itandukanye.”

Ikiganiro kirambuye IGIHE yagiranye na Mani Martin

IGIHE: Umuziki wawutangiye gute?

Mani Martin: Natangiye gukunda muzika mfite imyaka mike cyane, itandatatu, ku mashuri abanza.

Nakundaga kuririmba uturirimbo numva kuri radiyo, izo numva mu kiliziya n’izo mwarimu atwigisha. Ni gutyo navuga ko impano yanjye yagaragaye kuko yabonywe cyane n’umwarimu wo mu mashuri abanza hanyuma nkomeza kubikunda cyane no kubikora ariko ntarabigize umwuga.

Navuga ko hashize imyaka irindwi mbikora nk’umwuga, imyaka y’umugisha kuko nabonye ibihembo byinshi bitandukanye haba hano mu Rwanda aho nahembwe mu myaka itatu nk’umuhanzi ukora injyana gakondo no hanze aho navuga nk’ishimwe rya BBC World Service ubwo batoranyaga indirimbo yanjye ‘My Destiny’ nk’iy’ibihe byose mu 2014. Nabonye umudali wa ‘Bronze’ mu irushanwa ry’ibihugu bikoresha Igifaransa. Ni byinshi.

Ndi umuntu ukunda kuba nakoresha umuziki mu buryo buzana impinduka haba mu buzima bwanjye bwite no ku bwa rubanda. Mu mamashuri yisumbuye nize indimi n’ubuvanganzo muri Centre Islamic de Kigali nsoreza muri Kaminuza ya Mount Kenya aho nize Itumanaho Rusange n’Itangazamakuru.

IGIHE: Umunsi wa Mani Martin muri iki gihe uba wifashe gute?

Mani Martin: Ntabwo ngira umunsi umeze kimwe, naba mbeshye, iminsi yanjye iterwa na gahunda igaterwa n’igihe naryamiye! Hari ubwo ndyama ntinze nagiye nko muri ‘studio’ cyangwa mu myitozo y’uburyo butandukanye.

Biterwa mu by’ukuri na gahunda runaka ariko akenshi iyo ntari kuririmba mba ndi muri ‘gym’ ubundi ndi gusoma. Nkunda gusoma cyane ibitabo, inkuru zitandukanye ndetse nkareba ‘film’ gacye.

IGIHE: Ni iyihe mpamvu yatumye Mani Martin ayoboka ‘gym’?

Mani Martin: Gukora siporo ni byiza cyane muri rusange, bituma umuntu agira ubuzima bwiza. Ni iyo mpamvu nta yindi.

IGIHE: Inganzo ya Mani Martin ubundi ishingiye ku ki?

Mani Martin: Inganzo yanjye ishingira ku bintu byinshi. Ndirimba ubuzima, urukundo, abantu, ahantu, ibyiyumviro n’amarangamutima n’ibindi bitandukanye, ariko cyane cyane inganzo yanjye ishingira ku butumwa bushobora kugira impinduka muri njyewe ubwanjye cyangwa ku muryango mugari ushobora kumva ibihangano byanjye.

Mbere ya byose nkunda no kwerekeza inganzo yanjye ku bintu biba bifite aho bihurira nanjye mbere y’uko bijya ku bandi.

IGIHE: Ni iyihe ndirimbo ufata nk’icyitegererezo mu zo wakoze?

Mani Martin: Indirimbo z’umuhanzi kuri njye ni nk’abana b’umubyeyi. Biragora gutoranyamo imwe ngo uvuge ko iruta izindi, ariko izo nkunda gutekerezaho cyane mu zo nanditse ni iy’ahagana mu 2009 yitwa ‘Icyo dupfana kiruta icyo dupfa’, iyo nsubije amaso inyuma nkareba imyaka nari mfite n’ibitekerezo biyirimo numva ko atari imbaraga zanjye zatumye mbasha kuyandika mu by’ukuri. Mbishimira Imana kuba ubwo butumwa bwaranyuzemo icyo gihe.

IGIHE: Kuki muri iki gihe wahisemo kwibanda ku njyana ya kinyafurika?

Mani Martin: Umuziki wanjye ntushobora kwitandukanya n’uwo ndi we. Iyo mpanga n’iyo ndirimbo sinshobora kuvuga ngo reka mbikore gutya mbishyire mu njyana runaka. Ntekereza ko iyo abantu babyumvise bakumvamo iyo mu Rwanda cyangwa se iyo muri Afurika ni ukubera ko ari njyewe. Ntabwo ari ibintu mbanza gushushanya kugira ngo bimere kuriya.

IGIHE: Album ‘Afro’ ivuze iki kuri Mani Martin?

Mani Martin: Ni album abantu bakiri kwakira mu by’ukuri, ntabwo iramenyekana ku rwego ruhagije. Abamaze kuyimenya bayakiriye neza, imaze kugurishwa ku mbuga za internet zitandukanye n’abandi bayimenya bayakira neza.

Indirimbo zose ziyigize ntabwo zirasohoka n’ubu ndateganya kugira izo nsohora.

Yamfashije gukora mu buryo bwagutse, ni ubwa mbere nari nkoze ibitaramo bizenguruka igihugu. Ikindi kuva nayikora ndi kubona muzika yanjye kuri televiziyo zikomeye nka B Black Africa nibwo bwa mbere kuva natangira gukora umuziki bacuranze ibihangano byanjye, wenda ku zindi mpuzamahanga zacagaho ariko kuri iyo zari zitaracaho.

IGIHE: Ni iyihe mishinga ushyize imbere muri iyi minsi?

Mani Martin: Mu byo ntegurira abantu muri iyi minsi harimo gusohora indirimbo yitwa ‘Urwa Gasabo’ nayisohoye muri album yanjye ya kane icuranzwe n’inanga gakondo ariko nza guhitamo kongera kuyisubiramo mu buryo bw’amajwi gusa. Ni ikintu nshaka guhereza abanyarwanda bakunda umuziki kuko abahanzi bo hambere barabikundaga nk’iyo wumvise umuziki wa Rugamba Sipiriyani, Amasimbi n’Amakombe n’abandi bagiye bakora muri iyo njyana bikaryoha.

Nizeye ko abantu bazayikunda ariko nzayisohorana n’indi yitwa ‘Chalala’ ubwabyo ni ijambo ridafite ikintu risobanuye. Ni nko kuvuga ‘Melodie of Freedom’.

Ubundi mba ndi gukora amashusho y’indirimbo ziri kuri iyi album ndetse no gukorana n’abandi bahanzi baba abo mu Rwanda bakizamuka n’abo hirya no hino kugira ngo mwese mumenyekane.

IGIHE: Umushinga w’indirimbo wakoranye na Sauti Sol ugeze he?

Mani Martin: Izaza vuba, ni umushinga mu by’ukuri wizwe neza, wakozweho neza, twamaze gufata amajwi n’amashusho. Gusa muri iki gihe turimo twari tukiri gushaka igihe cyiza twayishyira hanze cyane cyane ariko bo badafite indirimbo nshyashya ihari kuko mu byo twemeranyije tujya gukorana harimo ko izasohoka ari yo nshyashya ku mpande zombi dufite kugira ngo tubashe gufatanya kuyimenyekanisha.

Yarangiye muri iki gihe hari izindi bafite zasohotse, turacyategereje kuyisohora nyuma y’izo bafite zikiri kumenyekanishwa cyo kimwe n’izanjye hanyuma tukayishyira hanze. Hari n’indi nakoranye na Eddy Kenzo ubu twakoze n’amashusho ndumva ari nayo izasohoka mbere.

IGIHE: Hari indi mishinga uhishiye abakunzi bawe?

Mani Martin: Iyo umuntu amaze igihe kirekire mu mwuga w’ubuhanzi ntekereza ko biba byiza utangiye no kureba inyuma ku bato bafite ibyo bakwigiraho mu buhanzi bwawe bifuza gutera indi ntambwe.

Umwe mu migisha nagize cyane mu rugendo rwa muzika, nagiye mbona abana bato benshi bumva bakora muzika bakagera ikirenge mu cyanjye bintera ishyaka ryo kumva ko nafasha, si bose birumvikana ariko bake bashoboka nabo dufitanye imishinga. Byamfashije gukuza umuryango mugari wa muzika no gufasha abo bahanzi kuberekeza imbere.

IGIHE: Abagukunze mu ndirimbo zihimbaza Imana ubateganyiriza iki?

Mani Martin: Sintandukanya abakunda ibihangano byanjye, ntabwo mbashyira mu byiciro, ntekereza ko ari abantu muri rusange kuko ibyo ndirimba byose bibamo Imana.

Mani Martin, umuhanzi ufite impano yihariye mu muziki wo mu Rwanda

Iyo ndirimba urukundo, iyo ndirimba amahoro, iyo ndirimbo ubumwe n’imibanire y’abantu byose bikubiyemo Imana cyane cyane ko ari yo igena ibyo byose. Gusa ntibikuraho ko hari abakunda by’umwihariko indirimbo zibanze ku iyobokamana, igihe icyo ari cyo cyose nshobora kuba naririmba indirimbo nk’iyo biterwa n’uko inganzo yaje kuko si ibintu nshobora gutegeka ngo nibize mbihange.

Ni ibintu bibanza kugira isoko biturukaho. Uko nshobora kwicara uyu munsi wenda mbonye umwana urwaye ‘cancer’ wo muri Nyabihu nkumva hari icyo namuririmbaho wenda mutabariza cyangwa mvuga ku buzima bwe niko nshobora no kubyuka mu gitondo nkumva indirimbo nk’iyo mperuka gukora mu myaka ibiri ishize yitwa ‘Ituro’ nkumva injemo. Ni indirimbo y’ishimwe, yo guhimbaza Imana. Ntabwo ntekereza ko ari ibintu ngomba gutegeka ngo bize kubera ko hari abantu bashaka kubyumva, ni ubuvanganzo kandi buza mu gihe cyabwo.

IGIHE: Ni iki Mani Martin atekereza ku batishimira iyo nzira yayoboyemo ubuhanzi bwe?

Mani Martin: Ubuhanzi bwanjye nta kintu bupfana n’imyemerere ya buri muntu uwo ari we wese keretse iyo yiyumvisemo bitewe n’igihangano naririmbye. Nta kintu na kimwe buhindura cyangwa se ngo bwangize ku myemerere yanjye ku giti cyanjye, ntekereza ko uwaba afite imyumvire yo kumva ko bitari byiza kuba abantu baririmba ibintu bitajyanye n’iyobokamana na we ni uburenganzira bwe kubitekereza gutyo kuko ku Isi buri muntu afite uko yumva ibintu.

Ubuhanzi kuri njye ni akazi, ni umwuga wanjye. Muri buri kwemera uko ari ko kose abantu baguhuriramo ariko bakagira umurimo bakora. Ushobora kuba uri umunyamakuru ariko usengera muri Islam cyangwa muri Gatolika. Sinibaza ko mu kwemera kwabo bashobora kukubuza gukora akazi kawe.

Iyo bigeze muri muzika sinzi impamvu iyo myumvire iza ariko kuri njye muzika yanjye ni akazi kantunze nk’uko n’abafite imyemerere yihariye baba bafite akazi bakora.

Mani Martin aravugisha benshi muri iki gihe

Mani Martin muri iki gihe avugwaho bitandukanye biturutse ku byo atangaza ntibivugweho rumwe bituma abafana babigereranya n’ishusho bamubonagamo akiri umururirimbyi w’indirimbo zo guhimbaza Imana gusa.

Muri iki gihe avugwaho cyane biturutse ku buryo yifotoza n’impaka abafana basigaye bamugiraho ku byo yandika n’amafoto asohora. By’umwihariko mu minsi ishize yabyukije impaka zishingiye ku buryo yanditse nk’amashyengo kuri Instagram agasaba ko umukobwa ubyifuza yamwandikira bagahuza bakabyara ‘umwana mwiza’.

Iyo asubiza inabi yukwa na bamwe batishimira uko yahinduye inzira agira ati “Abantu dufite imirimo tugomba gukora yo kugira ngo tubeho ariko twongeraho n’indi idakwiye. Nta muntu n’umwe nzi wabaho ngo ajye afata amafoto uko abandi babyumva, yambare uko babyumva, yiyogosheshe uko babishaka. Ntabwo byashoboka.”

Yemeza ko umuntu ku giti cye agira uburenganzira bwo kubaho uko abyumva kuko nta washimisha bose ndetse ngo yakira buri wese uko atekereza haba mu migenzereze ye n’intekerezo yamugiraho

Mani Martin avuga ko yifuza ko abantu bakira uko baremwe mu buryo butandukanye ndetse batekereza ibidahuye ariko akabishima iyo bidashobora kugira icyo byangiza cyangwa ngo bigire uwo bigumura bimutera kwitwara mu buryo budakwiye.

IGIHE yasuye Mani Martin ku icumbi rye ku Kivugiza
Mani Martin akora muzika yiganjemo ifite umudiho wa Kinyafurika
Mani Martin yakunzwe bidasanzwe mu ndirimbo 'Urukumbuzi' na 'Icyo dupfana kiruta icyo dupfa’

Amafoto na Video: Kazungu Armand

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kkkk 2018-05-18 11:51:35

jjjjjj

2
Mugengabigwi 2018-05-17 08:07:01

Hhhh ikizongwe cyuje uburofa ni wowe wiyita king utuka utagutuka utanakuzi ukurusha ubwenge, Inganzo n’ubupfura. Wenye wivu mutajinyonga kumugani wa Saida kaoroli kabisa. Uyu muhungu uko atera imbere bibabaza benshi mubanyeshyari numva ko Atari we bagakwiye kubona aterimbere, mutuze cg mwiyahure kuko ntimuzamuhagarika rwose.

3
jonathan 2018-05-17 07:36:21

Nkawe wiyise King utukana nk’utararezwe ubwo niwowe muzima???!!! Man Martin ibyo avuga kuri jye nukuri nta muntu uneza rubanda kandi abantu nitwaremwe kimwe habama mumigendere,imyitwarire imitekerereze n’ibindi.Gusa abazi kureba cyane ibya bandi namwe ubwanyu mujye mubanza murebe ibyanyu ko mwe ibyanyu ari ndakemwa.Courage kdi igikuru nuko uzi icyo umuziki ukwinjiriza

4
king 2018-05-17 03:13:33

ikizongwe gusa mbona havanzemo nuburofa

Kwamamaza