IGIHE

Bushali ukunzwe muri Hip Hop yatumiwe mu iserukiramuco rikomeye muri Uganda

0 23-08-2019 - saa 09:24, Uwiduhaye Theos

Umuraperi Hagenimana Jean Paul umaze kwamamara nka Bushali yatumiwe mu iserukiramuco ryitwa Nyege Nyege ribera muri Uganda.

Iri serukiramuco riteganyijwe kuba kuva ku wa 5 Nzeri kugeza ku wa 8 Nzeri i Jinja ahitwa Nile Discovery Beach muri Uganda.

Kugeza ubu niwe muhanzi wenyine wo mu Rwanda umaze gutumirwa muri iri serukiramuco rizitabirwa n’abahanzi batandukanye mu mivugo, indirimbo n’imbyino bagera kuri 300 bazaba baturutse mu bihugu 30 bya Afurika no hanze yayo.

Mu bandi batumiwe harimo itsinda ryo muri RDC rya Fulu Mziki, Rophnan wo muri Ethiopie, Santi wo muri Nigeria, Kilo Vee na Hyph11E bo mu Bushinwa , Shyboi na Suzi Analogue bazaba baturutse i New York n’abandi.

Ni ku nshuro ya gatanu iri serukiramuco rigiye kuba, rihuriza hamwe abahanzi bakizamuka bari kwitwara neza mu muziki wabo mu bihugu baherereyemo.

Bushali watumiwe muri iri serukiramuco ni umwe mu baraperi bakunzwe cyane mu Rwanda muri iki igihe, aherutse gushyira hanze album ye ya kabiri yise ‘Ku gasima’ igaragaza ubuzima buri wese ashobora kubamo butari bwiza mbere y’uko agira amafaranga.

Iyi album y’uyu musore iriho indirimbo 12 zirimo iyitwa ‘Kinyatrap’, ‘Sindi Mubi’, ‘Zunguzayi’, ‘Ipafu’, ‘Kinyarock’, ‘Mamayiwe’, ‘Kugasima’, ‘Inganjyi’, ‘Ayura’, ‘Bitinze’, ‘Impanda’ na ‘Niyibizi’.

Bushali yatangiye umuziki mu mpera za 2013. ‘Ku gasima’ ni album ye ya kabiri ije nyuma y’iya mbere yagiye hanze muri Gashyantare mu 2018 yise ‘Nyiramubande’.

Izina rya Bushali The Trigger riherutse kuzamurwa cyane n’indirimbo yise ‘Nituebue’ yahuriyemo na B-Threy ndetse n’uwitwa Slum Drip bose babana muri Green Ferry Music ireberera inyungu zabo.

Reba Nituebue, yazamuye izina rya Bushali

Bushali ari mu baraperi bakunzwe cyane mu Rwanda muri iki gihe
Niwe muraperi ugezweho mu banyakigali muri iki gihe
Bushali yatumiwe muri Nyege Nyege Festival muri Uganda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza