IGIHE

B Threy yahishuye impamvu zatumye asezera muri Green Ferry yabanagamo na Bushali (Video)

4 13-01-2020 - saa 14:19, Nsengiyumva Emmy

Muheto Bertrand wamenyekanye mu njyana ya Hip Hop nka B Threy, mu minsi ishize yatandukanye na Green Ferry yamufashaga kumenyekanisha ibikorwa bye, icyakora ntiyahishura icyatumye ayivamo.

B Threy avuga ko yatangiye umuziki mu 2014 arangije amashuri yisumbuye, kuwihebera bituma adakomeza kaminuza. Yatangiye akorera umuziki i Nyamirambo nk’umwana uhavuka.

Binyuze ku muntu w’inshuti ye, yaje guhura n’ubuyobozi bwa Green Ferry aho yasanze Bushali, nyuma hazamo Slum Drip n’abandi basangiye injyana na Kinyatrap.

Ubwo yasezeraga muri Green Ferry, hari abatekereje ko arambiwe kuba Bushali ariwe uzwi cyane nyamara barakoranaga nk’itsinda.

Mu kiganiro yagiranye na IGIHE, B Threy ntiyigeze aca ku ruhande aya makuru, avuga ko yavanwemo nuko urukundo hagati y’abo bakoranaga rwari rwarayoyotse ndetse abona Green Ferry ishaka gutonesha Bushali kubarusha, no kuba na we yaratekerezaga uko yakwiteza imbere.

Ati ”Ntabwo nakubeshya, ubundi ibibazo bivuka ni umunsi bafashe indirimbo twakoranye turi batatu bagakuramo ibitero byacu bagasigamo igitero cy’umuntu umwe, Bushali aririmba igitero cye gusa. Nta rukundo kuri Bushali kuko iyo urufite uba wanapfira inshuti yawe.”

Iyo ni indirimbo “Ni muebue”, B Threy anavuga ko yandikiwe kwa Slum Drip atari iya Bushali nk’uko benshi babizi.

Gusubiramo iyi ndirimbo hagakorwa iyo Bushali akoresha mu bitaramo irimo ijwi rye gusa, B Threy avuga ko byakozwe mu buryo bw’ubucuruzi, ati "bagirango igihe nikigera Bushali ajye ayiririmba bitabaye ngombwa ko tuba duhari.”

Abajijwe impamvu Green Ferry yashatse kuzamura Bushali gusa, yagize ati ”Simbizi wasanga wenda baratangiranye cyangwa bafitanye gahunda ntazi.”

B Threy ashinja Bushali kuba yararetse urukundo batangiranye.

Ati ”Ikintu cyabaye ni uko twakundanaga, nyuma urukundo rwabaye ruke, njye hagati yanjye na Bushali harimo uwigishije undi agakino, uzamubaze nubwo atinya kuvuga, aratinyatinya ariko muzamubaze.”

“Hari ibikorwa twakoranye nabo bikitirirwa Green Ferry, kubera gutakaza urukundo ntabwo byakomeje kuba byiza cyane nk’uko byahoze. Green Ferry yashatse kuzamura Bushali cyane bakamuturutisha, njye Bushali sinamurenganya nawe si we ni itsinda abarizwamo. biramusaba kuzaba maso niba ashaka gutera imbere.”

B Threy avuga ko adashaka kuvuga nabi Bushali ariko atanamushuka, ahubwo ko akeneye kumubwiza ukuri kugira ngo azatere imbere.

Ati ”Bushali afite indirimbo nyinshi kandi nziza, gusa izo bamwitirira cyane ni izacu twese.”

"Nakomereze aho abe maso amenye aho inyungu iri. Ubusanzwe iyo abantu bakubwira ngo baragufasha bazagutamika,ugomba kugira ubwoba.”

Abajijwe niba nta kibazo cyihariye afitanye na Bushali, B Threy yavuze ko adashobora kugirana ikibazo n’umuntu badahura, batanahuza.

Yagize ati ”Ubu ntabwo dushobora guhura, kereka namusinyishije kandi imico ye ntabwo twahuza, iyo umuntu adafite imikorere ihamye kuri njye ntibyakunda, yarantengushye kuri byinshi twumvikanye birimo aho twifuzaga kugeza Kinyatrap.”

“Ibintu byose twaganiriye yanyeretse ko nta na kimwe yakoze, amasezerano twagiranye yarayishe, irya mbere ryari ukugumana ubumwe n’urukundo. Icyakora narabirebye mbona na we si we, ni ikipe bari kumwe, bituma mbaha umwanya.”

B Threy yatangije Studio ye nshya aho ari gukorana n’umu Producer witwa Dizzo ukomeye mu gukora injyana ya Hip Hop.

Uyu musore uvuga ko mu Rwanda yemera umuraperi Riderman na Bull Dogg, ari mu myiteguro yo gushyira hanze indirimbo ye nshya yise ’Impano ni ubuzima’ iri kuri Album yise 2040.

Avuga ko Se umubyara ariwe mujyanama uri kumufasha, hakiyongeraho abo bakorana muri studio byaba mu buryo bw’amajwi n’amashusho.

B Threy yatangiye kwikorana ndetse kuri ubu afite studio ye ku giti cye
B Threy avuga ko kubura ubumwe n'urukundo bahoranye muri Green Ferry aribyo byatangije umwuka mubi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Robert Dushime 2020-01-16 05:47:42

B_threy arashoboye kdi Njye mushyigikiye mubyo akora icyemezo yafashe kirakwiye kuko hajemo itoneshwa rirarenga cyane.
Murakoze @b.threy King 👑

2
kamili 2020-01-13 13:33:42

bushali ndamwera ariko nanjye ibyabo byari byarancanze pe, nawe se ngo ni green ferry nyuma batumira bagatumira bushali: ukibaza ni itsinda cg ni kindi kintu? Ni muebue niba yarahinduwe hari impamvu ariko kandi umuntu yakwibaza ko indirimbo yahinduwe muhali kuki mutabajije icyo gihe?

3
g boy 2020-01-13 09:25:14

ibikorwa byinshi niyo nama, ibindi biraherekeza

4
Tuyisenge emmanuel 2020-01-13 08:09:16

Kubura ubumwe n’urukundo birahagije kugira ngo umuntu atandukane nund
B trey jyewe nuko muzi

Kwamamaza