IGIHE

Alyn Sano yakebuye abahanzi abibutsa ko amazina yabo aribwo bukungu bwabo

0 17-05-2024 - saa 17:39, Uwiduhaye Theos

Umuhanzikazikazi Aline Shengero Sano wamamaye nka Alyn Sano yatangaje ko nta butunzi buhambaye abahanzi bakura mu muziki ariko hari aho ugeza umuntu wabyitwayemo neza ku buryo ashobora kububona abikuye ku izina yubatse.

Ibi Alyn Sano yabigarutseho mu gitaramo cya GEN-Z COMEDY gitegurwa na Merci Ndaruhutse, aho yari umutumirwa w’umunsi mu ijoro ryo ku wa 16 Gicurasi 2024.

Uyu mukobwa avuga ko umuziki utaguha amafaranga y’umurengera ariko wagufasha kuyabona mu bundi buryo by’umwihariko mu kubyaza umusaruro izina uwubakiramo.

Ati “Kumenyekana biguha igikundiro n’abakwangaga bakagukunda ariko iyo umaze kumenyekana hari ibintu utakora. Ikindi umuziki ntabwo watuma uba nka ba Rubangura[umwe mu bakire bamenyekanye cyane mu Rwanda] ariko izina wubaka kubera wo ryagufasha kuba we.’’

Mu kiganiro yagiranye na IGIHE, Alyn Sano asobanura uko umuziki wo ubwawo utaguha amafaranga ariko kubera amahirwe ugenda ubona kubera izina wawukuyemo byatuma uba umuherwe.

Aha Alyn Sano yatanze urugero rw’umuhanzikazi Robyn Rihanna Fenty[Rihanna] uri mu bafite agatubutse kubera gushinga sosiyete y’ibirungo by’ubwiza.

Agaragaza ko kugira ngo Rihanna mu 2021 atangazwe nk’umuhanzikazi wa mbere ukize ku Isi, akinjira mu rutonde rw’abatunze miliyari y’amadorali ari ukubera ko yabyaje izina rye umusaruro agashinga Fenty Beauty na Savage X Fenty ikora imyambaro y’imbere y’abagore.

Ati “Urugero turebye nko muri Amerika nka ba Rihanna ntabwo babaye abaherwe kubera umuziki ahubwo ibindi biwushamikiye byatumye baba abagwizatunga.’’

Alyn Sano nawe aheruka gushyira hanze imyenda y’imbere isanzwe yambarwa n’igitsinagore izwi nk’Amakariso yamwitiriwe, mu rwego rwo gutangira gushora hanze y’umuziki.

Alyn Sano yatangiriye muri korali yo mu Badivantisiti b’Umunsi wa Karindwi aho yari umuririmbyi uri mu bakomeye icyo gihe mu 2009.

Yavuze ko mu 2018 aribwo yahisemo kuba umuhanzi ku giti cye u buryo bw’umwuga, ariko akagorwa no ‘Kwipapa, akanimama’ muri make ari kwirera mu muziki akikorera byose.

N’ubwo bimeze gutyo ariko avuga ko nta kintu yakora kitari umuziki ndetse akemeza ko byanze burundu yanaba umuntu ukora ‘make up’ cyangwa undi uri hafi cyane y’imyidagaduro.

Alyn Sano yanataramiye abitabiriye iki gitaramo
Icyumba kiberamo ibi bitaramo hari hakubise huzuye
Alyn Sano yari yatumiwe mu gitaramo cya Gen-Z Comedy gitegurwa na Fally Merci
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza