Alyn Sano, undi mukobwa ufite ubuhanga bwihariye mu muziki

1 13-02-2018 - saa 16:20, Dusabimana Aimable

Alyn Sano, umukobwa ukiri muto wahisemo kwiyegurira umuziki, avuga ko yubakiye mu buhanga yavanye mu gufasha abandi bahanzi mu miririmbire ya zimwe mu ndirimbo zirimo n’izamenyekanye mu Rwanda.

Uyu muhanzi ubusanzwe yitwa Aline Sano Shengero, avuka ari uwa gatatu mu muryango w’abana batanu. Ahuza amateka n’abandi bahanzi bo mu Rwanda n’ahandi ku Isi barereye impano yo kuririmba muri korali zo mu nsengero bigakomeza inganzo yabo.

Mu kiganiro na IGIHE, Sano yavuze ko nubwo amaze imyaka ibiri mu muziki muri 2018 yiyemeje kongera imbaraga mu bikorwa ndetse akiyegurira umuziki nyuma yo kurangiza amasomo muri Kaminuza muri Akilah Institute. Yize mu ishami rya Hospitality, Leadership and Management.

Yavuze ko afite imishinga yitezeho kuzamura urwego azwiho mu muziki w’u Rwanda ahereye ku ndirimbo nshya yise "Naremewe Wowe" ikubiyemo ubutumwa bw’urukundo n’umuntu uhumuriza uwo akunda wihebye yumva ko nta gihe kirekire bafitanye bitewe no gukeka ko bataberanye.

Yagize ati "Narangije ibijyanye n’amasomo mu Ugushyingo 2017, ndavuga nti ’reka nze mu muziki kuko mbikunda kandi n’abandi benshi bazi impano yanjye bantera imbaraga zo kuba ntahitamo kuyihererana. Ubu nkora umuziki igihe cyose, nahereye kuri iyi ndirimbo ariko hari n’ibindi bikorwa bikomeye nteganya mu gihe kiri mbere."

Yavuze ko umwihariko yinjiranye mu muziki ari ubuhanga mu bijyanye no kuririmba mu buryo bw’umwimerere mu bandi bakobwa bawukora. Impano yo kuririmba akesha ibihe by’ubuto bwe yarushijeho kuyikomeza afasha abahanzi batandukanye bakomeye mu Rwanda, ibintu avuga ko umusaruro byatanze wamuteye ishyaka ryo gukora ku giti cye.

Yagize ati "Muri korali niho navumburiye impano yanjye ntangira kumenya amajwi, kuyatandukanya, kuririmba imbere y’abantu nta gihunga n’ubundi bumenyi butandukanye. Kuririmba gutya ni uko nabimenye."

Uko impano ye yagiye imenywa na bamwe niko yitabazwaga n’abahanzi bakomeye mu kubafasha mu miririmbire ndetse yiyegurira umuziki w’ibitaramo bihoraho bya Jazz na Blues ahantu hatandukanye bagiye bagirana amasezerano mu Mujyi wa Kigali.

Yaririmbye mu ndirimbo zizwi nka "Active Love" y’itsinda Active ndetse akorana n’abahanzi bakomeye barimo Jules Sentore ndetse na Mani Martin ku mushinga wa album yise "Afro" ikubiyeho indirimbo z’umudiho wa kinyafurika.

Sano yagize ati "Icyo gihe nari nkiza mu muziki, njye numvaga ari intambwe ikomeye, kuri njye numvaga ari intambwe nateye, hari nk’igihe Jules Sentore wari umuhanzi twese tuzi yampamagaraga ngo njye kumufasha muri ’studio’ bikanshimisha nkumva ko nahuye n’umuntu ukomeye kandi ari ikintu gikomeye kuri njyewe. Kuri ubu nshobora kubikora ariko ntabwo nabikora numva ko ari intambwe nateye, mbikora numva ko ndi gufasha mugenzi wanjye kandi mfite urundi rwego mpanze amaso."

Yongeyeho ati "Gukorana n’abahanzi byanteye ishyari ryiza ndetse binyereka ko impano yanjye ishobora kwishimirwa. Numvise indirimbo ya Active nahise numva ngize imbaraga zo kuba nanjye nakora. Byanteye ishyaka ryo kuvuga ngo nanjye reka nkore, nkavuga nti ’ndabaryohereza ibintu ariko njyewe nta muntu umenya.’"

Ubuhanga mu miririmbire Alyn Sano akomora mu gushyigikira abandi bahanzi mu mishinga itandukanye avuga ko yiyemeje kuzabubyaza umusaruro akaba umuhanzi w’icyitegererezo mu miririmbire ndetse umuziki akora akawusaruramo amafaranga yamutunga aramutse ashyigikiwe.

Alyn Sano niwe waririmbye ijwi ryumvikana mu ndirimbo 'Active Love'

Alyn Sano yiyongereye ku bandi bahanzi bakomeye mu Rwanda bubakiye ku buhanga bakomoye mu gufasha bagenzi babo mu miririmbire ndetse no mu bitaramo bikomeye. Abazwi cyane mu Rwanda ni Charly na Nina, Bruce Melodie n’abandi.

Mu myaka ibiri amaze mu muziki, Sano yakoze indirimbo zitandukanye zirimo iyo yise "Witinda", niyo yatangiriyeho; "Ntako Bisa", ndetse n’iyo yise "Naremewe Wowe" iheruka, yahise anasohora amashusho yayo.

Avuga ko yiyemeje gushyira imbaraga mu muziki ndetse agakora ibikorwa bizamura izina afite kugeza ubu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Habineza 2018-02-13 11:02:05

Iyi ndilimbo numvise hejuru itaniye he n’imwe mu ndilimbo za King James?

Kwamamaza