IGIHE

Abahanzi n’aba-DJ bakomeye bagiye guhurira mu iserukiramuco rya "Kigali Street Jam Fest"

0 13-06-2019 - saa 18:26, Muvunyi Arsène

Itsinda ry’urubyiruko rwakanyujijeho mu kubyina, Sick City Entertainment, ryateguye iserukiramuco ryise ‘Kigali Street Jam Festival’ rizahuriramo abahanzi n’aba-DJ bo mu Rwanda bagera kuri 31.

Sick City ni itsinda rigizwe n’urubyiruko rwakanyujijeho mu kubyina imbyino za kizungu.

Ryahoze ritegura ibitaramo byo kubyina byamenyekanye nka “Its’All About Dance”.

Umuyobozi wa Sick City Entertainment, Intwari Christian, yabwiye IGIHE ko bari gutegura iserukiramuco bise ‘Kigali Street Jam Festival’ rizaba hagati ya tariki 12 na 13 Nyakanga 2019 muri Car Free zone mu Mujyi wa Kigali.

Intego yaryo ni uguhuriza hamwe urubyiruko no gutanga inyigisho zigamije kurwanya ibiyobyabwenge nka kimwe mu bihangayikishije igihugu.

Ati “ No hagati yacu mu itsinda hakunze kubamo bagenzi bacu baba imbata z’ibiyobyabwenge bikarangira babafunze cyangwa babajyanye i Iwawa; twatekereje gukora ikintu twahuriramo n’inzego z’ubuyobozi ngo dutambutse ubutumwa bwerekana ingaruka zo kubinywa ku mubiri no ku muryango.”

Intwari avuga ko indi ntego bafite ari uguhesha agaciro abahanzi b’abanyarwanda, dore ko bimaze kumenyerwa ko abanyamahanga ari bo basusurutsa amaserukiramuco yo mu Rwanda.

Ni muri rwo rwego batumiye abahanzi bagera kuri 14 bakunzwe mu gihugu harimo Riderman, Bruce Melodie, Jay Polly, Queen Cha n’abandi bari kuzamuka nk’abagize itsinda ry’abaraperi rya Kinyatrap, Gaju Ritha n’abandi.

Hazaba kandi hari n’aba-DJ bagera kuri 21 barimo DJ Miller, DJ Toxxyk, DJ Marnaud, DJ Infinity, DJ Jullz, DJ Lou, DJ Lenzo n’abandi.

Ikindi kandi muri iri serukiramuco ababyinnyi nka Jabba Juniors, Urban Dance na Afro Kasa bazihuriza hamwe biyerekane ari itsinda rigari.

Intwari yavuze ko hazaba harimo indi myidagaduro nk’imyereko y’abagendera ku magare, imikino y’abana, ibiribwa bitandukanye n’ibindi.

Intwari Christian uyobora Sick City Entertainment yateguye iri serukiramuco
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza