IGIHE

Korali Elayono y’i Remera yasohoye ‘Jambo’, indirimbo ikururira abantu gusanga Yesu

0 12-06-2022 - saa 18:09, IGIHE

Korali Elayono ikorera ivugabutumwa rinyuze mu ndirimbo muri ADEPR Remera yasohoye indirimbo nshya yise ‘Jambo’ irimo ubutumwa bukangurira abantu kugana Yesu.

Indirimbo nshya ya Korali Elayono yitwa ‘Jambo’ igizwe n’iminota itanu n’isegonda rimwe. Yasohokanye n’amashusho yayo.

Umutoza Mukuru wa Korali Elayono, Mutoni Josiane, yabwiye IGIHE ko indirimbo yabo nshya ifasha abantu gusubira ku Mwami.

Yagize ati “Intego y’iyi ndirimbo ni ukumenyesha abantu bose ko umuntu wakiriye Yesu nk’Umwami n’Umukiza mu buzima bwe azaragwa ubugingo buhoraho.’’

Yavuze ko korali ifite imishinga myinshi mu bihe biri imbere ndetse izakomeza gushyira hanze ibihangano bihembura imitima ya benshi.

Ati “Hari byinshi tubateganyiriza mu bihe biri imbere. Ndashimira abaririmbyi bitanze ngo indirimbo “Jambo” ikorwe, abaterankunga bacu n’inshuti zose zikunda Elayono uburyo badahwema kutuba hafi mu ivugabutumwa ryose dukora.’’

Indirimbo “Jambo” iboneka ku mbuga nkoranyambaga zicururizwaho umuziki zirimo na YouTube.

Korali Elayono iri mu zikomeye muri ADEPR, yamamaye mu ndirimbo zirimo ‘‘Gusenga Kwawe’’, ‘‘Umusaraba’’ n’izindi.

Ifite agahigo ko kuba ariyo yegukanye igihembo cya Korali ya mbere mu Rwanda ikoresha neza ikoranabuhanga mu gusakaza ivugabutumwa mu 2014 mu byatanzwe na Sifa Rewards binyuze muri Isange Corporation.

Korali Elayono yatangiye mu 1996, ku gitekerezo cy’urubyiruko rw’abasore n’inkumi 12, bumvaga bafite ishyaka ryo gukora ivugabutumwa mu ndirimbo.

Mu 2006, Korali yujuje imyaka icumi ivutse, yemerewe gukora ku mugaragaro, iza no guhabwa izina yitwa “Elayono.” Imaze gukora indirimbo zirenga 300.

Kuri ubu Korali Elayono igizwe n’abaririmbyi 149 bari mu byiciro bitandukanye birimo urubyiruko n’abubatse.

Korali Elayono yo muri ADEPR Remera yasohoye indirimbo nshya yise "Jambo''
Korali Elayono iri mu zifite igikundiro muri ADEPR
Iyi korali yamamaye mu ndirimbo zirimo ‘‘Gusenga Kwawe’’, ‘‘Umusaraba’’ n’izindi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza