IGIHE

Bariye Noheli kare! Chorale de Kigali yanyuze abitabiriye igitaramo cyayo- Uko cyagenze (Amafoto)

0 19-12-2021 - saa 18:12, Akayezu Jean de Dieu

Chorale de Kigali yakoze igitaramo ‘Christmas Carols Concert’, cyasojwe abakunda umuziki bacyitabiriye bakinyotewe no gutarama ndetse kinabinjiza mu bihe byo kwitegura Umunsi Mukuru wa Noheli bacyeye ku mutima.

Igitaramo cya Chorale de Kigali cyari imbonekarimwe kuko kiba inshuro imwe mu mwaka iyo habura iminsi mike ngo Isi yizihize ivuka rya Yezu.

Iyi Korali imaze kuba ubukombe mu muziki cyane cyane uw’indirimbo zihimbaza Imana zanditse mu buryo bw’amanota aririmbwa n’abahanga, yataramiye abakunzi bayo mu ndirimbo zakunzwe ku Isi kuva mu mwaka wa 1700.

Byari akarusho ubwo baririmbye indirimbo zirimo “Tuzabyina birenze ibi”, “Indabo za Mariya”, iya “UEFA Champions League” n’izindi nyinshi zazamuye imbamutima z’abari bateraniye muri Kigali Arena mu ijoro ryo kuri uyu wa 19 Ukuboza 2021.

‘Christmas Carols Concert’ yitabiriwe n’abantu b’ingeri zose barimo abayobozi bakuru mu nzego za Leta kugeza ku bahagarariye ibihugu n’imiryango mpuzamahanga mu Rwanda.

UKO IGITARAMO CYAGENZE:

21:30: Umurishyo wa nyuma wakomwe!

Burya koko ngo ‘Umwanzi w’Ibihe’ ni amasaha. Nyuma yo gutaramira abitabiriye ‘Christmas Carols’, Chorale de Kigali yasoje kuririmba, abitabiriye ubona badashaka gutaha.

Nk’uko bimaze kumenyerwa, nta na rimwe Chorale de Kigali ijya ikora igitaramo ngo abitabiriye bifuze ko iva ku rubyiniro ariko by’umwihariko iyo bigeze mu ndirimbo zizwi cyane.

Mu ndirimbo zasoje igitaramo harimo iy’irushanwa ry’amakipe yabaye aya mbere iwayo i Burayi ‘UEFA Champions League’ ndetse n’iyitwa "O Happy day" ari nayo yapfundikiye ‘Christmas Carols Concert’ ya 2021.

Chorale de Kigali yaryohereje abitabiriye igitaramo cyayo
Inkumi n'abagore bo muri Chorale de Kigali ni abahanga
Chorale de Kigali yaryohereje abitabiriye igitaramo cyayo
Chorale de Kigali iri mu z'ubukombe mu muziki uhimbaza Imana
Abitabiriye iki gitaramo banyuzwe n'umuziki wagicurangiwemo
Chorale de Kigali ibarizwamo abaririmbyi n'abacuranzi b'abahanga
Umuziki wa Chorale de Kigali wizihira benshi
Ni igitaramo cyitabiriwe n'abakirisitu bo mu byiciro bitandukanye
Chorale de Kigali imaze kuba ubukombe mu gutegura ‘Christmas Carols Concert’
Banyuzwe batambira Imana
Umuziki wari mwiza, abitabiriye igitaramo barawuceka karahava
Abasore bakubye urukweto
Chorale de Kigali yasoje kuririmba, abitabiriye badashaka gutaha
Abitabiriye igitaramo babyinnye birekuye

  Igitaramo cyahawe umugisha!

21:20: Antoine Cardinal Kambanda yahaye umugisha abitabiriye iki gitaramo ndetse agisoza ku mugaragaro. Yifashishije Isengesho rya Dawe uri mu Ijuru, asabira umugisha abacyitabiriye n’Abanyarwanda muri rusange.

Nyuma y’isengesho rya Cardinal Kambanda, abagize Chorale de Kigali baririmbye indirimbo yo gusezera ku bitabiriye iki gitaramo.

Arkiyeskopi wa Kigali, Antoine Cardinal Kambanda yanaboneyeho umwanya wo kwifuriza abantu Noheli nziza n’Umwaka Mushya Muhire wa 2022.

  “Dieu va faire encore” ya Tchouva yahagurukije benshi

Chorale de Kigali yaririmbye indirimbo zitandukanye zirimo izo muri Kiliziya Gatolika ndetse n’izimenyerewe mu yandi matorero.

Abaririmbyi b’iyi korali bageze ku yitwa “Dieu va faire encore” y’umuhanzi Tchouva, benshi barizihirwa, bafatanya kuyiririmba.

21:05: Indirimbo ‘Indabo za Mariya’ ni yo igezweho! Ni indirimbo n’umwana muto ugeze igihe cyo guhabwa Ukarisitiya aba azi n’ibitero byayo byose bitewe n’uburyo ikoreshwa cyane muri Kiliziya Gatolika.

Ni imwe mu ndirimbo yifashishwa mu Misa by’umwihariko iyo bageze mu gice cyizwi nko gushimira.

Yanaririmbye n’iyitwa ‘Tuzabyina neza birenze ibi’, nayo yakunzwe cyane muri Kiliziya Gatolika, ndetse yifashishwa cyane na korali hafi ya zose.

Ni indirimbo irimo ubutumwa bugaruka ku byishimo abizera bazabamo ubwo bazaba bageze mu ijuru by’umwihariko abakunda kwizihirwa batambira Imana.

Abari muri Kigali Arena banyuzwe n'umuziki bacurangiwe
Chorale de Kigali iririmbira ku majwi ya gihanga
Inkweto bamwe mu basore n'abagabo baserukanye
Abari n'abategarugori bari bambaye inkweto zizamuye

  Ibintu byahinduye isura muri Kigali Arena!

20:50: Nyuma yo kuririmba indirimbo “Bella Ciao”, abaririmbyi bose ba Chorale de Kigali bahise binjira mu cyiciro cyo kuririmba indirimbo zizwi cyane ndetse abitabiriye igitaramo bose batangira gufatanya na bo kuziririmba ari nako imwe irangira bagakoma mu mashyi n’akaruru k’ibyishimo.

Ubwo bari bageze ku ndirimbo yitwa ‘Baba Yetu’, ‘Nnamugereka Katonda’ na ‘Halleluah’, abitabiriye iki gitaramo bose bahagurutse batangira kuririmba ari nako banyuzamo bagatambira Imana.

Ni indirimbo zakurikiwe n’iyitwa ‘Nje Ngushima’, ndetse iyi ni ubwa mbere igiye hanze nk’uko byatangajwe n’ubuyobozi bwa Chorale de Kigali.

Indirimbo ‘Nje Ngushima’, ikubiyemo ishimwe ku Mana, aho ubutumwa buyirimo bugaruka ku gushima uburyo Imana yita ku bantu bayo n’ubwo baba bayicumuyeho ikabababarira kugeza isohoye isezerano ibafiteho.

  Abatageze muri Kigali Arena na bo batekerejweho

Mu rwego rwo kwifatanya n’abakunzi bayo bari mu bice bitandukanye by’igihugu n’ahandi ku Isi, Chorale de Kigali yateguye uburyo bw’ikoranabuhanga bushobora gutuma buri wese areba igitaramo ariko yishyuye ikiguzi cy’amafaranga make.

Iki gitekerezo kigamije gufasha buri wese kuryoherwa n’umuziki w’iyi korali y’inyabigwi mu muziki uhimbaza Imana.

Ushobora kunyura hano, ukishyura kugira ngo urebe iki gitaramo.

  Indirimbo ‘Bella Ciao’ yamamaye muri La Casa de Papel ihagurukije abantu

Abakunzi ba filime by’umwihariko iz’uruhererekane bazi neza filime yitwa ‘La Casa de Papel’ cyangwa ‘Money Heist’ bisobanuye ‘Ubujura bw’amafaranga’.

Muri iyi filime humvikanamo indirimbo yamamaye yitwa ‘Bella Ciao’.

Ni indirimbo umukinnyi w’imena muri iyi filime witwa ‘Professor’, agaragara ayiririmbana n’umuvandimwe we Berlin.

Ndetse n’abajura na bo barayiririmba iyo bari muri banki. Bella Ciao rero ikomoka mu Ntambara ya Kabiri y’Isi, ikaba yararirimbwaga n’abigaragambya barwanya ubutegetsi bw’igitugu mu Butaliyani.

Uburyo abaririmbyi ba Chorale de Kigali baririmbye iyi ndirimbo mu majwi meza neza nk’uko yumvikana muri ‘Le Casa de Papel’ byashimishije abitabiriye iki gitaramo ndetse mu kuyisoza bamwe basaba ko yasubirwamo.

Ni abasore n’abagabo bo muri Chorale de Kigali bayiririmbye, ariko amajwi yabo wumvaga neza ameze nk’ayumvikana mu ndirimbo y’umwimerere.

Ubwo bari barangije kuyiririmba, abari muri Kigali Arena bose bakomye mu mashyi, abandi bavuza akaruru mu rwego rwo kugaragaza ko bishimye ndetse basaba ko yasubirwamo n’ubwo umwanya utabibemereye.

  Abari muri Kigali Arena baryohewe n’umuziki wa Chorale de Kigali

  Ishimwe rya Chorale de Kigali ku bitabiriye n’abakurikiye igitaramo

20:20: Umuyobozi wa Chorale de Kigali, Dr Nzayisenga Albert, ni we utangiye kugeza ijambo ku bitabiriye iki gitaramo.

Yagize ati “Ni igitaramo kibaye ku nshuro ya cyenda mukaba mwaje gutaramana natwe, byatugaragarije urukundo mudukunda kandi mukunda n’umuziki wanditse mu buryo bw’amanota. Ntabwo tuzabatenguha.’’

Umuyobozi wa Chorale de Kigali, Dr Nzayisenga Albert, yashimiye ababafashije mu gutegura igitaramo

Dr Nzayisenga kandi yavuze ko gutegura iki gitaramo bitari byoroshye ndetse bijyanye n’imiterere y’uyu mwaka waranzwe n’icyorezo cya Covid-19.

Ati “Ntabwo byari byoroshye ariko kubera Imana, birakunze.”

Yashimiye abagize uruhare kugira ngo iki gitaramo kibashe gutegurwa kandi gishoboke.

Dr Nzayisenga yashimiye kandi Guverinoma y’u Rwanda yashyizeho ingamba n’amabwiriza yo kwirinda ikwirakwira rya Covid-19, bityo iki gitaramo kikaba kibashije kuba.

Yasabye abitabiriye iki gitaramo kwibuka ko kwirinda ikwirakwira ry’icyorezo cya Covid-19, ari ibya buri wese bityo kubahiriza amabwiriza yashyizweho n’inzego z’ubuzima, bambara agapfukamunwa ari inshingano za buri wese.

  Ni igitaramo cyitabiriwe n’abarimo Ambasaderi w’u Bufaransa mu Rwanda

Nk’uko bisanzwe igitaramo cya Chorale de Kigali, gikunze kwitabirwa n’abayobozi mu nzego nkuru z’igihugu, abikorera ndetse n’abadiplomate.

Mu bitabiriye iki gitaramo harimo Ambasaderi w’u Bufaransa mu Rwanda, Antoine Anfré ndetse na Ambasaderi wa EU mu Rwanda, Nicola Bellomo.

Mu bandi banyacyubahiro bacyitabiriye barimo Umunyamabanga wa Leta muri Minisiteri y’Urubyiruko n’Umuco, Bamporiki Edouard.

Ambasaderi wa EU mu Rwanda, Nicola Bellomo na we ari mu banyacyubahiro bitabiriye igitaramo cya Chorale de Kigali
Ambasaderi w’u Bufaransa mu Rwanda, Antoine Anfré, ni umwe mu bitabiriye iki gitaramo
Umunyamabanga wa Leta muri Minisiteri y’Urubyiruko n’Umuco, Bamporiki Edouard, yitabiriye igitaramo cya Chorale de Kigali
Abantu b'ingeri zose bitabiriye iki gitaramo

19:50: Umuziki uzwi nka ‘Music Classic’ wahawe rugari

Ni indirimbo zakunze kuririmbwa cyera mu bihugu by’u Burayi, aho zifashishwaga n’abaririmbira abantu bakomeye by’umwihariko Abami.

Kuri ubu izo ndirimbo zizwi nka ‘Music Classic’ ziraririmbwa, abantu bakumva uburyohe ab’ibyo bihe babagamo.

19:35: Umusangiza w’amagambo yahamagaye ku rubyiniro Simbi na Gilbert, baririmba indirimbo yitwa ‘Heure exquise’.

Ni indirimbo baririmbye mu majwi meza cyane ku buryo bwazamuye amarangamutima y’abitabiriye iki gitaramo.

Uretse kuririmba banayibyinnye mu buryo budasanzwe, aho bageze aho bahoberana abitabiriye igitaramo bose bakoma mu mashyi ndetse bavuza akaruru ko kubagaragariza ko babishimiye.

Simbi na Gilbert banyuze abitabiriye igitaramo cya Chorale de Kigali

Ndikubwimana Gilbert na Ndizihiwe Simbi Yvette, bahuriye muri Chorale de Kigali, barakundana ndetse baza kurushinga.

Simbi na Gilbert barushinze muri Gashyantare 2019, mu muhango wabereye muri Paruwasi Katedrali Mutagatifu Mikayile, igitambo cya Misa cyayobowe na Musenyeri Jean Claude Muvandimwe.

Isezerano rya bombi ryateye ishema abagize Chorale de Kigali.

Simbi ni umuhanga cyane mu kuririmba, ni umuririmbyi w’imena muri Chorale de Kigali aho aririmba Soprano, umugabo we Gilbert na we ni umuhanga mu guhanika ijwi aho aririmba Tenor.

  Reba hano ubwo IGIHE yari yasuye Simbi na Gilbert

  Amafoto ya Antoine Cardinal Kambanda ubwo yafunguraga igitaramo

Cardinal Kambanda ni we wateye Isengesho ritangira igitaramo cya Chorale de Kigali
Iki gitaramo cyitabiriwe n'abantu batandukanye barimo na Antoine Cardinal Kambanda
Cardinal Kambanda yibukije abitabiriye igitaramo ko impamvu Noheli ikwiye gufatwa nk'umunsi wo kwizihiza ko Yezu yemeye kwicisha bugufi
Chorale de Kigali izwiho gukora ibitaramo bikomeye mu mpera za buri mwaka
Chorale de Kigali ni imwe mu zizwiho ubuhanga budasanzwe muri muzika yanditse mu buryo bw’amanota
Abasore ba Chorale de Kigali na bo bahanika amajwi bikizihira ababumva
Iki gitaramo cyabereye muri Kigali Arena
Amajwi yabo ntashidikanywaho, ahogoza abayumva
Abaririmbyi ba Chorale de Kigali bazwiho ubuhanga mu kuririmba
Baririmba amanota yanditse mu gitabo
Cardinal Kambanda ni we wateye Isengesho ritangira igitaramo cya Chorale de Kigali
Kubera ibihe bya COVID-19, umubare w'abajya muri Kigali Arena waragabanyijwe
Abaririmbyi ba Chorale de Kigali bazamuka ahirengeye
Abari n'abategarugori baserutse mu mwambaro wera de!

19:20: Muyumbu Innocent, umusangiza w’amagambo yatanze iminota itatu yo gusoma ku mazi kugira ngo Chorale de Kigali ize kugarukana akabaraga.

Mu gice cya mbere, abagize iyi korali baririmbye indirimbo zirimo “Twelve days of Christmas”, “God rest ye Merry gentlemen”, iyi ni indirimbo irimo nyinshi zitandukanye za Noheli, zatunganyijwe na Oscar Irambona.

Mu zindi ndirimbo baririmbye harimo iyitwa “Christmas Mosaic”, na yo yatunganyijwe na Oscar Irambona, iyitwa “Noel”, “Gloria In excelsis Deo” ndetse n’iyitwa “Noheli umukiza wacu yavutse”.

19:00: Chorale de Kigali yaririmbye indirimbo ‘‘Gloria In excelsis Deo’’, ikoreshwa cyane mu birori byo kwizihiza Umunsi Mukuru wa Noheli.

Ni indirimbo abaririmbyi ba Chorale de Kigali baririmbye, bagera aho bavuga bati ‘Grolia’ bagahanika amajwi mu buryo bunogeye amatwi, maze abari muri Kigali Arena bakoma mu mashyi.

18:50: Nyuma yo kuririmba indirimbo ‘‘Te Deum’’, Muyumbu Innocent, umusangiza w’amagambo muri iki gitaramo, yavuze ko iyi ndirimbo ifite igisobanuro gikomeye kuko ari isengesho ryo gushima Imana by’umwihariko mu gusoza umwaka.

Muyumbu yavuze ko ari indirimbo yo gushima Imana kuba umwaka urangiye, Chorale de Kigali ikiri mu burinzi bwayo ndetse n’abandi Banyarwanda by’umwihariko abitabiriye iki gitaramo haba abaje muri Kigali Arena ndetse n’abakurikiranye igitaramo mu buryo bw’ikoranabuhanga.

Yahise aha umwanya Chorale de Kigali itangira kuririmba indirimbo za Noheli. Yashimangiye ko uyu munsi nta magambo menshi ahubwo ari umuziki gusa.

Mu ndirimbo batangiriye baririmba harimo iyitwa ‘Aravutse Umwana Yezu’, ni indirimbo igaruka ku ivuka rya Yezu nk’uwari warahanuwe ko azaza gukiza abantu bose.

18:30: Nyiricyubahiro Antoine Cardinal Kambanda ni we wafunguye iki gitaramo ku mugaragaro. Yatangije isengesho ryo kuragiza Nyagasani ibikiberamo byose. Abitabiriye bose basabwe guhaguruka bakifatanya mu isengesho ryo gushima Imana.

Cardinal Kambanda yibukije ko impamvu y’ibyishimo bikomeye bya Noheli, bikwiye kujyanishwa no kwizihiza ko Yezu yemeye kwicisha bugufi akavukira mu muryango.

Cardinal Kambanda kandi yasabye Imana kuba hafi Abanyarwanda by’umwihariko n’Isi yose yugarijwe n’icyorezo cya Covid-19.

Akiri ku rubyiniro, Cardinal Kambanda yateye indirimbo ‘Te Deum’ [Mana Yacu Turagusingiza], ni indirimbo ya Chorale de Kigali, iri mu zikunze kwifashishwa n’izindi korali zo muri Kiliziya Gatolika, mu gihe cyo gusingiza Imana.

18:25: Inkumi n’ababyeyi bambaye amakanzu meza yera de [Umweru], baserukanye n’abasore bambaye amakositimu y’umukara n’amashati y’umweru.

Muri aka kanya ni bwo igitaramo cyatangiye ku mugaragaro, Murengezi Dieudonné [Mure Dieudonné] umucuranzi wa Chorale de Kigali, yahamagawe ku rubyiniro nk’uri buyobore igitaramo cy’uyu munsi.

Mu myanya y'icyubahiro ntabwo abantu bari bageramo ari benshi
Umuziki wa Chorale de Kigali ugendera ku manota
Aba mbere batangiye kwizihirwa n'umuziki w'ubuhanga uhimbaza Imana
Baserutse bambaye neza
Umuziki uryoheye ugutwi uri gucurangwa muri Kigali Arena
Baba bahisemo kwihuza ari umuryango cyangwa abavandimwe bakagura imeze kugira ngo baze gukurikirana igitaramo bari hamwe
Imeza imwe iba ishobora kwicaraho abantu barenze batanu

- Abakunzi ba Chorale de Kigali bakomeje kwinjira muri Kigali Arena

Chorale de Kigali yaririmbye indirimbo ‘Jingle bells’ ikunze kwifashishwa mu gihe cyo kwizihiza Noheli. Ni indirimbo yahimbwe na James Lord Pierpont mu myaka ya 1857.

Kugeza ubu imbere muri Kigali Arena, abantu barimo kugenda binjira umwe ku wundi. Mu myanya y’icyubahiro ni ho bigaragara ko abantu batari bageramo ari benshi ariko ahasigaye hose hari hafi kuzura ndetse n’ameza aba yaguzwe n’abantu bishyize hamwe ari umuryango cyangwa abandi bahisemo kwihuza barenze batatu.

17:45: Igitaramo cyatangiye. Abasore n’inkumi bageze ku rubyiniro mu majwi aryoheye amatwi,basubiramo indirimbo yitwa ‘Locus Iste’ yahimbwe na Anton Bruckner.

Iyi ndirimbo iri mu rurimi rw’Ikiratini mu 1869, ariko nyuma igenda ihindurwa mu zindi ndimi ikaba ikunze gukoreshwa na korali zitandukanye hirya no hino ku Isi.

  Iyubahirizwa ry’ingamba za COVID-19 ryakajijwe

Kuva isaha ya saa kumi z’igicamunsi, abantu bari batangiye kugera kuri Kigali Arena. Mbere yo kwinjira buri wese yabanje kugenzurwa niba bujuje ibisabwa kugira ngo bitabire igitaramo muri iki gihe.

Mu byagenzurwaga harimo kuba umuntu yarakingiwe byuzuye, kuba afite ibisubizo bigaragaza ko yipimishije Covid-19, mu gihe cy’amasaha 72 ashize ndetse akaba ataranduye iki cyorezo.

Iki gitaramo cyabereye muri Kigali Arena, inyubako ubusanzwe yakira abantu ibihumbi 10 bicaye neza
Mbere yo kwinjira hagenzurwaga niba buri wese yujuje ibisabwa
Imiryango ya Kigali Arena yafunguwe mu masaha ya kare
Hagenzurwaga ko buri wese yaguze itike imwemerera kwinjira mu gitaramo
Amatike yujuje ibisabwa agenzurwa hifashishijwe ikoranabuhanga
Abakirisitu baturutse imihanda yose babanje kwerekana ibyangombwa mbere yo kwinjira muri Kigali Arena
Ab'inkwakuzi bari bageze kuri Kigali Arena ku isaha ya saa Kumi
Baguze amatike hifashishijwe ikoranabuhanga, aha yerekanaga itike ye
Hari urubyiruko rugenzura niba abaje muri iki gitaramo bipimishije ndetse baranikingije Covid-19
Ako kunywa kihagazeho na ko karahari
Mu masaha ya saa Kumi byagaragaraga ko iki gitaramo kiza kwitabirwa n'abantu benshi
Uyu yabazwaga niba yarikingije inkingo zose ndetse akaba yaranipimishije mu masaha 72 ashize

  Imihanda yose yerekezaga kuri Arena

Abakunzi b’umuziki ucuranze kandi ukaririmbanwa ubuhanga by’umwihariko Abakirisitu Gatolika babukereye berekeza kuri Kigali Arena, ahabereye ‘Christmas Carols Concert’, igitaramo cyateguwe na Chorale de Kigali, imaze kuba ubukombe mu muziki wo kuramya no guhimbaza Imana.

Iki gitaramo ngarukamwaka gifasha abakunda muzika by’umwihariko abakirisitu kwitegura ibirori byo kwizihiza Umusi Mukuru wa Noheli, bacyeye ku mutima.

Ni igitaramo kibaye mu gihe byinshi mu byari biteganyijwe kuba haba mu mpera z’iki cyumweru ndetse n’ibiteganyijwe mu bihe bisoza umwaka byamaze gusubikwa kubera ubukana bw’icyorezo cya Covid-19 by’umwihariko virusi yihinduranya ya Omicron.

Kuri Chorale de Kigali, yasabye uburenganzira Urwego rushinzwe Iterambere, RDB, ndetse ubuyobozi bwayo buvuga ko bwijeje ko amabwiriza yo kwirinda ikwirakwira rya Covid-19, agomba kubahirizwa.

Abitabiriye iki gitaramo basabwe kwishyura 5000 Frw, 10.000 Frw, 20.000 Frw na 25.000 Frw, ndetse ibijyanye no kugura amatike bikaba byarakozwe hifashishijwe ikoranabuhanga.

  Amateka avunaguye ya Chorale de Kigali

Chorale de Kigali ni imwe mu zizwi mu Rwanda, yakoze amateka muri muzika ikoranye ubuhanga. Ni umuryango udaharanira inyungu, watangiye mu mwaka wa 1966, ubona ubuzima gatozi mu 1987, bwavuguruwe mu 2011.

Ni mukuru w’izindi muri Kiliziya Gatolika ndetse yakoze amateka muri muzika ikoranye ubuhanga kuva mu 1966 yiharira gukundwa kugeza aho yatumirwaga mu birori bikomeye ikaririmba mu byateguwe na Perezidansi byose.

Yatangijwe n’abahanga muri muzika bari barabyize mu Iseminari barimo nka Mbarushimana Léon, Karangwa Claver, Gatarayiha Jean Nepomuscène, Nkurikiyumukiza Fidèle, Karega Callixte, Paulin Muswahili na Iyamuremye Saulve wahageze ikimara gushingwa.

Mu ntangiriro Chorale de Kigali yari igizwe n’abagabo gusa, kugeza mu mwaka wa 1987, ubwo abari n’abategarugori ba mbere binjiragamo.

Kubera uburyo abahanzi bayo bahimbanaga ubuhanga ndetse n’abaririmbyi bayo bakaririmba mu buryo bwizihira ababumva, bagiye basabwa n’ibigo ndetse n’izindi nzego za Leta guhimba no kuririmba indirimbo zirata ibigwi by’ibyo bigo cyangwa izo nzego.

Ni muri urwo rwego Chorale de Kigali yakunze kugaragara mu bikorwa byinshi birimo kwitabira Misa zo kwizihiza bimwe mu bikorwa byaranze amateka y’igihugu, nk’umunsi mukuru w’ubwigenge, uw’umurimo, uw’abarezi n’indi.

Chorale de Kigali kandi yizihije Yubile ya Musenyeri Aloys Bigirumwami yabaye ku itariki ya 3 Kamena 1978 ubwo yizihizaga imyaka 50 y’ubupadiri na 25 y’ubusenyeri.

  Chorale de Kigali yaririmbye Misa ubwo Papa yazaga mu Rwanda

Kubera ubuhangange bwa Chorale de Kigali kandi Inama y’Abepisikopi mu Rwanda yayihisemo kugira ngo yizihize Misa yayobowe na Papa Yohani Pawulo wa Kabiri ubwo yasuraga u Rwanda.

Ni Misa yarabereye i Nyandungu ku itariki ya 10 Nzeri 1990 yitabirwa n’abantu barenze miliyoni.

Nyuma ya Jenoside yakorewe Abatutsi mu 1994, Chorale de Kigali yarahungabanye nk’indi miryango yose yari mu gihugu.

Yabuze benshi mu baririmbyi bayo bazize Jenoside, abandi na bo barahunga, bake mu bari basigaye baje kwisuganya, bongera kubyutsa umuryango n’ubwo bitari byoroshye, ariko babasha kuwusubiza ku murongo, Chorale de Kigali yongera isubira ku isonga ry’amakorali ari mu Rwanda.

Ibibazo binyuranye byagiye bivuka muri Chorale de Kigali ntibyayiciye intege. Yarakomeje itera imbere none ubu igeze ku rwego rushimishije.

Amafoto: Irakiza Yuhi Augustin

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza