IGIHE

Iyahigaga yahiye ijanja! Ubuhanuzi bw’abapasiteri bwarazimye

0 7-02-2022 - saa 08:36, Ntabareshya Jean de Dieu

Ni kenshi abanyamadini bazindukiraga ku nsengero zitandukanye bagiye mu materaniro, abandi bakegera insakazamajwi zabo cyangwa insakazamashusho kugira ngo bakurikirane ijambo ry’Imana.

Nubwo benshi baba bashishikariye kumva ijambo ry’Imana, hari abandi bakururwa n’ubuhanuzi bikaba ari byo bibayobora mu gihe bakora amahitamo y’aho bajya gusengera.

Umwaka wa 2021 wabaye umwaka ukarishye ku banyamadini n’amatorero kuko ibikorwa by’amateraniro byari bifunzwe ndetse n’aho bifunguriwe bikomeza kugira amabwiriza abigenga atuma ubwisanzure butaba nk’ubwa mbere.

Ubusanzwe hari bamwe mu bavugabutumwa bari bazwiho kugira ubuhanuzi bunyuze mu ijambo, bakariherekesha gukora ibitangaza.

Ibi hari ababifata nk’amayobera, abandi bakabibona nk’ibihimbano n’ubwo mu by’ukuri byagaragaye ko mu bihe bitandukanye ko hari bamwe muri bo bihisha mu mwambaro wo kuvuga ubutumwa bagahimba ibinyoma bagamije kwishakira indonke.

Bitandukanye n’indi myaka ubuhanuzi bwo mu wa 2021 bwaragabanutse bitewe ahanini n’uko insengero zari zifunze naho zifunguriwe abantu ntibazisangamo bisanzwe.

  Iyahigaga yahiye ijanja

Uwavuga ko abari abahanuzi bari bitezweho ijambo ry’ihumure n’abayoboke babo mu bihe bigoye by’icyorezo cya Covid-19 bataribonye ntabwo yaba abeshye.

Nubwo hari bamwe bari bamaze kubihindura nk’ubucuruzi, kuko basabaga abayoboke amafaranga runaka kugira ngo basengerwe ntitwakwirengagiza ko iki cyorezo cyabakoze ku nda.

Ahanini kwizeza abayoboke ibitangaza birimo no kugura abarwayi byakorwagwa n’abifuza kwigwizwaho abayoboke kuri ubu byaracubye na cyane ko amenshi mu matorero yafunzwe kubera kutuzuza ibisabwa mu bihe bigoye bya Covid-19.

Hari bamwe mu bapasiteri bari bitezweho ubuhanuzi bukomeye bitewe n’uko ahanini bakundaga kugaragara bavuga ibintu bitangaje bizaba, bo babyitaga ubuhanuzi abandi bakabitwerera iterabwoba.

Bamwe muri bo harimo Bishop Rugagi Innocent washinze Itorero ry’Abacunguwe, Redeemed Gospel Church. Mu 2020 yatangaje ko ari gutanga umuti ukiza abarwayi ba Covid-19.

Icyo gihe yagize ati “Ndakubwira ngo nuramuka upfuye uzavuge ko ndi umuhanuzi w’ibinyoma. Uzatinye icyo ntangaje ku mugaragaro ntabwo ndi umupfumu uragura aho bihisha, ndavuga Isi yose ibireba.”

Ubu butumwa yabutambukije ku mbuga nkoranyambaga ze avuga ko yakijije abantu batandukanye barimo uwabaga mu Bubiligi, uwo muri Leta Zunze Ubumwe za Amerika n’ahandi. Hanyuma ashyiraho nimero ya telefoni bashoboraga kumuhamagaraho ku bifuza gusengerwa.

Ubu butumwa bwamaganiwe kuri n’inzego zitandukanye ndetse bemeza ko nta muntu ufite ubushobozi bwo gusengera umurwayi wa Covid-19.

Ibi kandi bijyana n’ubuhanuzi bwa nyakwigendera TB Joshua, Umuvugabutumwa ukomeye ukomoka muri Nigeria wari wahanuye ko tariki ya 27 Werurwe 2020 Coronavirus izaba yabaye umugani ariko amaso ahera mu kirere abantu bategereje ko ubwo buhanuzi busohora.

Ibihe bya Covid-19 bisa n’ibyahumuye abayoboke b’amadini basomaga ibyanditswe bunyuguti bagasa n’abagendera mu kigare bakuruwe n’ubuhanuzi.

Ubwo abantu bose bari mu ngo zabo, batangiye kubona ko gusenga bidasaba kwinjira mu rusengero, muri kiliziya cyangwa mu musigiti. Ni byo byatumye abashukishaga abayoboke ubuhanuzi bw’ibinyoma bagabanya umuvuduko.

  Ubuhenebere cyangwa guceceka kw’Imana?

Muri Werurwe 2020 ni bwo Covid-19 yageze mu Rwanda. Icyo gihe bimwe mu bikorwa bihuza abantu benshi byatangiye gufungwa mu rwego rwo kwirinda ikwirakwira ry’icyo cyorezo.

Insengero ziri mu byabanje guhagarikwa ku wa 15 Werurwe 2020 nyuma y’umunsi umwe mu Rwanda habonetse umurwayi w’icyo cyorezo cyatangiriye mu Bushinwa mu mpera za 2019.

Abantu batekerezaga ko insengero kimwe n’ibindi bikorwa byahuzaga abantu benshi birimo utubari no gutwara abantu mu buryo bwa rusange bizahita bifungurwa kuko byari bigoye kwiyumvisha ko igihugu cyamara icyumweru nta rusengero na rumwe rwemerewe gukora. Si ko byagenze.

Ku rundi ruhande byagize ingaruka kuri amwe mu madini yasaga n’acumbagira kubera umubare muto w’abayoboke yari afite kuko ubwo zimwe mu nsengero zakomorerwaga hari izatarongeye gufungura imiryango na magingo aya.

Ubundi mbere y’umwaduko w’icyorezo cya Covid-19 wasangaga bamwe bahitamo gushinga amadini nk’inzira yo gushaka amaronko aho kuba iy’ivugabutumwa.

Abo ni bo bahise bakubitwa incuro n’ibihe by’amage ndetse n’abayoboke babo kuko wasangaga barangamiye ubuhanuzi rimwe na rimwe bufifitse benshi bahise bakubiranwa n’intege nke basa n’abiheje ku nsengero.

Muri Mata umwaka ushize hari bamwe mu bayobozi b’amadini babwiye IGIHE ko kuba abantu batakiri guhurira mu nsengero nk’uko byari bisanzwe, hari impungenge ko mu gihe Covid-19 izaba irangiye amadini menshi azabura abayoboke bayo bashobora kutazasubira mu nsengero abandi bakerekeza mu yandi madini.

Pasiteri Desiré Habyarimana yabwiye IGIHE ko amadini ashobora kuzabura abayoboke bitewe n’uko Abanyarwanda bagize ihungabana mu myizerere.

Ati “Urebye muri ibi bihe bya Covid-19, ibijyanye n’imyizerere byarahungabanye, abantu benshi basubiye inyuma, amakimbirane mu ngo yariyongereye. Kugeza uyu munsi n’abantu bafunguriwe abantu ntibaratangira kuza mu rusengero ni ukuvuga ko ukwizera kwabo kwahungabanye.”

Umuyobozi w’Ihuriro ry’Abayobozi b’Amadini n’Amatorero mu Rwanda, Bishop Rucyahana John, yavuze ko mu buryo bufatika abayoboke bashobora kugabanuka.

Ati “Urebye kwizera ko kurahari, ni ukuvuga ko abayoboke mu kwizera bazaguma kubaho ariko mu buryo bufatika bazagabanuka. Ahubwo dukwiye kureba icyo abayobozi b’amadini bakwiye gukora kugira ngo bagarure abayoboke mu buryo bufatika.”

Icyo gihe hari abemeje ko ubwo insengero zizaba zemerewe gukora uko byari bisanzwe bashobora kutazafungura imiryango kuko bamwe mu bayoboke babo baguye, abandi bakigira mu madini yamaze gufungurirwa.

Bamwe mu bayoboke bemeje ko bagenzi babo bashayishije bikaba byaba intandaro y’ubuhenebere nk’uko Nsengimana Ernest yabigarutseho.

Ati “Urebye Covid-19 yagaragaje abakirisitu b’ukuri. Bitewe n’uko tutajyaga mu nsengero abari abakirisitu baraguye rwose kandi si bo gusa kuko n’abari abayobozi b’amadini bagiye bakora ibyaha. Byagaragaye ko hakenewe izindi mbaragara mu ivugabutumwa rikorwa mu Rwanda.”

Nubwo hari abazimye ndetse n’amatorero yafunzwe hari abayobotse inzira y’ikoranabuhanga abandi bifashisha itangazamakuru mu rwego rwo gukomeza guhumuriza abayoboke babo.

Kuri ubu Abanyarwanda bemerewe kujya mu nsengero bangana na 75% by’ubushobozi bwo kwakira abantu kandi bagomba kuba barikingije byuzuye.

Hari impungenge ko na nyuma ya COVID-19, umubare w'abajya mu nsengero uzagabanuka cyane
Buri rusengero haba hagaragara umwanya wo kwicaramo n utari uwo kwicaraho
kwinjira mu Kiliziya bazajya babanza kugenzura ko wikingije byuzuye
mu rusengero hazajya hajyamo 30 by ubushobozi bwazo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza