IGIHE

Kuki Imana itaba ari umugore?

0 16-05-2022 - saa 07:55, Zigiranyirazo Bajecteur

Abemeramana bakunze kwibaza niba Imana ari umugore cyangwa umugabo icyakora hari n’abandi bavuga ko ukuri kwabyo kutavugwa hashingiwe ku kuba ahubwo Imana ari Imana idakwiye guhongerwa ibyo bindi bishingiye ku gitsina.

Umwanditsi Stephen Tomkins wibanda cyane ku nyandiko zifite aho zihuriye n’iyobokamana, yigeze kwandika ko hari itsinda ry’abantu mu nsengero zo mu Bwongereza basenga Imana bayigaragaza nk’umugore.

Si aho gusa kuko hari andi madini nko muri Syria aho kuva mu kinyejana cya gatatu bakunda guhamagara Imana mu gihe cyo gusenga bagira bati “Mama wacu uri mu bwihisho, ngwino uvugane natwe, ngwino ubashishe kuvuga abafite ubumuga bwo kutavuga.”

Hari n’aho barenga bakavuga ko Imana ari inyabibiri; umugore n’umugabo icyarimwe.

Mu kinyejana cya 11, Mutagatifu Anselme wari Arikiyepisikopi wa Canterbury yigeze gusenga agira ati “Yezu Kirisito mama wanjye kandi Mana; Mama Mukuru.” Abandi bagiye bita Imana, inshuti yabo, musaza wabo, mushiki wabo n’ibindi.

Hakomeza kugaragara urujijo ku kumenya uburyo Imana yavugwamo hashingiwe ku kuba ari igitsinagore cyangwa se igitsinagabo, icyakora ahantu hatandukanye bakora amahitamo yabo bakemeranya ku buryo bakoresha aho hamwe usanga Imana bayifata nk’Umugabo ahandi bakayifata nk’umugore.

Tomkins agaragaza ko nko mu mu myizerere y’Abahindu bo muri Nepal, Imana bayita “Kumari Devi”, izina ry’abakobwa bafite inkomoko ku kigirwamana cyitwa “Durga”. Bivugwa ko bigeze kubaho kera bakongera kubaho ubu bakaba ari bo bafatwa nk’Imana y’Abahindu.

Mu ihinduranyandiko ryagiye rikoreshwa mu gusemura ibitabo by’iyobokamana birimo na Bibiliya, usanga ahenshi Imana baragiye bandika bayigaragaza nk’umugabo ariko hari n’ahandi bagiye bahitamo kuyita umubyeyi gusa badashingiye ku mimerere yayo ndangagitsina.

Nko mu 2003, ubwo John Henson yahinduraga Isezerano Rishya mu rurimi rw’Icyongereza yirinze kugira aho abogamira mu bijyanye na ngenga yashyiramo Imana maze ayigaragaza gusa nk’umubyeyi mu gihe nko mu 1999 ho, abo mu idini y’Aba-Méthodistes batangiye kujya basenga Imana bagira bati “Data wacu kandi Mama wacu.”

Kugeza none nta hame ritavuguruzwa rihari rivuga ko Imana yaba ari umugore cyangwa ari umugabo, icyakora abahitamo kuyifata nk’umugore, hari ubwo babishingira kukuyifata nk’umubyeyi w’impuhwe n’ubugwaneza nk’ibyo umubyeyi w’umugore ashobora kugaragariza umwana we abandi bakayifata nk’umugabo bashingiye ku bintu bikomeye cyane by’imbaraga n’ibindi ibabashisha nk’uko babyizera.

Abemera Imana bamaze igihe bari mu mpaka zo gushaka kumenya niba Imana ari Umugabo cyangwa Umugore
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza