IGIHE

Israel Mbonyi yijeje abazitabira ‘Twende Jerusalem’ ibitaramo bidasanzwe

0 11-02-2022 - saa 22:27, Mukahirwa Diane

Israel Mbonyi ugeze kure imyiteguro y’urugendo rutagatifu rwiswe ‘Twende Jerusalem’ yararikiye urubyiruko kugura amatike ari benshi kuko ateganya kubataramira mu buryo budasanzwe.

Biteganyijwe ko guhera tariki 16-24 Mata 2022, itsinda ry’abantu baturutse mu Rwanda bazagirira urugendo rw’iminsi umunani muri Israel, aho bazasura imijyi n’ahantu hazwi mu mateka y’iki gihugu.

Ni urugendo ruri gutegurwa na sosiyete ‘Go Tell’ ku bufatanye na Ambasade ya Israel mu Rwanda, rwari kuba mu 2021 ariko ruza gusubikwa kubera Covid-19.

Abazarwitabira bazasura ahantu hatandukane harimo Jerusalem, Tel Aviv, Caesarea, Galilee, Dead Sea, Bethlehm, River Jordan, Capernaum na Garden Gethsemane.

Usibye gusura kandi abazitabira uru rugendo bazataramirwa na Israel Mbonyi na Yvan Ngenzi bazafatanya n’umunya-Israel, Avraham Tal.

Mbonyi azagira ibitaramo bibiri byagutse ariko ahantu hose bazasura azajya aririmbira abantu.

Mu kiganiro n’itangazamakuru cyabaye kuri uyu wa Gatanu tariki ya 11 Gashyantare 2022, Israel Mbonyi yavuze ko kuba ari we watoranyijwe mu bandi bahanzi ari umugisha yagize.

Ati “Mu Rwanda dufite abahanzi benshi kandi beza, ndi umunyamugisha kuba naratoranyijwe muri abo, kujya muri Israel byari inzozi zanjye nateganyaga kuzajyayo gusura, ubu nzajyayo no mu bitaramo ni umugisha.”

Yakomeje ashishikariza abantu kugura amatike cyane urubyiruko, yizeza abazitabira kuzabataramira mu buryo budasanzwe, afatanyije na bamwe mu bagize band ye.

Ati “Icyo nabwira abafana banjye n’abakunda umuziki wanjye muri rusange ni uko bagura amatike bakaza kuko bizaba ari igitangaza, ntabwo azaba ari ugutembera gusa ahubwo hazaba n’ibitaramo. Ndashishikariza urubyiruko kugura amatike kuko bizaba ari ibitangaza.”

Uru rugendo ruzaba mu gihe abakiristu bazaba bari kwizihiza pasika, iki kizaba ari igihe cyiza ku bazitabira uru rugendo kuko Israel ni igihugu kibumbatiye amateka menshi avugwa muri Bibiliya cyane cyane kuri Yezu.

Ambasaderi wa Israel mu Rwanda Dr Ron Adam, yavuze ko iki ari igihe cyiza kuko abazasura bazabasha kwizihiza pasika bari no kwibonera amateka y’uko Yezu yabayeho.

Ati “Mata ni ukwezi kwiza kuko ni mu gihe cya pasika ndetse n’ibihe biba bimeze neza kandi ari no mu biruhuko, abantu baba bari kwizihiza izuka rya Yezu, abazajyayo bazagira urugendo rwiza.”

Ibi abihuje n’Umuyobozi wa Sosiyete ’Go Tell World Exposures, Betty Mahugu, wavuze ko bifuje ko abantu bo mu Rwanda bajya kwizihiza pasika muri Israel no kuhagirira ibihe byiza.

Ati “Ukwezi kwa Pasika abantu baba bahuze cyane muri Israel ariko twahahisemo kugira ngo abantu bo mu Rwanda bazabashe kwizihiza uyu munsi neza muri kiriya gihugu.”

Yakomeje avuga ko iki gikorwa kizakomeza kubaho mu rwego rwo kuzamura impano z’Abanyarwanda ndetse no guhuza abaturage bo mu Rwanda n’abo muri Israel mu kongera ubufatanye.

Umuntu uri kwiyandikisha kuzitabira uru rugendo arasabwa kwishyura 2800$ (arenga miliyoni 2.8 Frw) harimo igiciro cya Visa, itike y’indege, ibyo kurya n’icumbi n’ikiguzi cyo gutembera muri Israel.

Mutanganshuro Lavie, ushinzwe itumanaho muri Ambasade ya Israel niwe wayoboye iki kiganiro n'abanyamakuru
Ambasaderi wa Israel mu Rwanda Dr Ron Adam, yavuze ko iki gikorwa kigamije guhuza abaturage b'ibihugu byombi bagasabana
Israel Mbonyi yavuze ko kuba ariwe watoranyijwe mu bandi bahanzi ari umugisha yagize.
Abazajya muri uru rugendo bazasura ibice bitandukanye bya Israel
Abitabiriye ikiganiro n'itangazamakuru bagaragaje ko uru rugendo ruzakomeza umubano w'ibihugu byombi

Amafoto: Gabriel Dusabe

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza