Abahanzi 15 mu ndirimbo zo kuramya no guhimbaza Imana bitabiriye umuhango wo gutangiza ku mugaragaro igikorwa cya Rwanda Gospel Stars Live, kigamije kubashyigikira no kubashimira uburyo bateza imbere sosiyete yaba mu mibereho yo mu buryo bw’umwuka ndetse no ku mubiri usanzwe.

Ni mu muhango wabaye ku Cyumweru tariki 24 Ukwakira 2021, witabiriwe n’abaramyi b’amazina azwi n’abandi.

Mu gutangiza iki gikorwa, Mike Karangwa ushinzwe gukurikirana Ibikorwa bya Rwanda Gospel Stars Live, yashimye abahanzi bahatanye avuga ko bakorera mu kibuga kirimo imitego myinshi ariko ko bayisimbuka bakifashisha umuziki mu kongera gusana imitima ya benshi.

Yavuze ko indirimbo z’aba bahanzi zifite akamaro gakomeye ku buzima bwa benshi kuko hari abakiriye Yesu nk’Umwami n’Umukiza, abandi bareka ibikorwa bibi bari bagiye gukora nko kwiyahura n’ibindi.

Mu kiganiro yagiranye na IGIHE yavuze ko iki gikorwa kiri mu byashyuhije imyidagaduro mu Rwanda muri izi mpera z’icyumweru kandi akaba yabyishimiye cyane.

Ati “Yari Weekend ishyushye nabyishimiye. Ndizera ko bizagenda neza kurushaho. Icyo Abanyarwanda basabwa ni ugushyigikira abahanzi. Aba bahanzi bafite imishinga itandukanye. Umuhanzi ukunda umushyigikire uko wifite.”

Karangwa yavuze ko ari ishema ku bakunzi b’umuziki wo kuramya no guhimbaza Imana kuko bizatuma waguka mu buryo burushijeho.

Ati “Bizatuma tubona byinshi byiza mu muziki wo kuramya no guhimbaza Imana. Ikindi tuzabona abahanzi bakora uyu muziki bafite ibihembo ngarukamwaka ndetse bakora ibitaramo mu ntara zitandukanye mu Rwanda hose nk’uko mu wundi muziki bimeze.”

Umuhanzi uzatwara umwanya wa mbere muri Rwanda Gospel Stars Live azahabwa miliyoni 7 Frw, uwa kabiri atware miliyoni 2 Frw, naho uwa gatatu atware miliyoni 1 Frw.

Kugeza ubu abahanzi bahatanye muri iki gikorwa bazagenda bakora ibitaramo bizanyura kuri Televiziyo Rwanda.

Abahanzi bazaririmba muri ibi bitaramo batangiye gukora imyitozo, ku buryo mu mpera z’Ukwakira 2021 biteguye kubitangira. Nyuma y’ibi bitaramo bya Rwanda Gospel Stars Live ni bwo hazamenyekana abatsinze.

Kuri ubu ushobora gushyigikira umuhanzi ukunda, aho ujya muri telefoni ngendanwa ugakanda *544*300* ugashyiramo nimero y’umuhanzi ushyigikiye hanyuma ugakanda ku rwego cyangwa ukanyura hano.

Rwanda Gospel Stars Live ihatanyemo Serge Iyamuremye, Israel Mbonyi, Aline Gahongayire, Uwitonze Clementine [Tonzi], Gaby Kamanzi, Rata Jah Naychah, James & Daniella, Gisubizo Ministries, umuraperi MD, Gisele Precious, True Promises Ministries, Aimé Frank Nitezeho, Anet Murava na Theo Bosebabireba.

Abahanzi bamenyerewe mu kuramya no guhimbaza Imana banyuze ku itapi itukura

Abakobwa b'ibizungerezi ba Kigali Protocol ni bo bakiraga abaje muri iki gikorwa

Abanyamakuru ba KC2 bitabiriye iki gikorwa bari bafite akanyamuneza kenshi

Ahabereye iki gikorwa hari hari abantu b'ingeri zitandukanye barimo abazwi mu bikorwa byo mu ruganda rw'umuziki wo kuramya no guhimbaza Imana

Buri wese uzwi mu gisata cyo kuramya no guhimbaza Imana yanyuze ku itapi itukura

Couple ya James na Daniella ni uku yaserutse

Aba bahanzi bamaze kugira igikundiro mu muziki wo guhimbaza

Abari bahagarariye Kingdom of God Ministries

Daniella Mukiza umenyerewe mu itsinda rya James & Daniella ahuriramo n'umugabo we ni uku yaserutse

Gabby Kamanzi atambuka ku itapi itukura

Gabby Kamanzi yari yaryohewe n'ibirori

Gaju Evelyne wegukanye ikamba rya Miss Congeniality muri Miss Rwanda 2021 yari yitabiriye

Iki gikorwa cyari cyitabiriwe n'abantu benshi

Israel Mbonyi uri mu bari guhatana ni uku yaserutse

James Rugarama umenyerewe mu itsinda rya James & Daniella ahuriyemo n'umugore we yari ari muri iki gikorwa

Jean Christian na Semutakirwa Cheline aherutse kwambika impeta y'urukundo bitabiriye ibi birori

Mashukano Eric uyobora Moriah Entertainment Group na Judo Kanobana washinze Positive Production itegura ibitaramo bari babukereye

Mike Karangwa ushinzwe gukurikirana ibikorwa bya Rwanda Gospel Stars Live, yashimye abahanzi bahatanye, avuga ko bakorera mu kibuga kirimo imitego myinshi ariko ko bayisimbuka

Rimwe mu matsinda ari mu basusurukije abitabiriye iki gitaramo

Serge Iyamuremye ari mu bahanzi bahatanye

Theo Bosebabireba na Mbonyi bafashe ifoto

Umuhanzikazi Annet Murava wamenyekanye mu ndirimbo 'Imboni' ni uku yaserutse

Umuhanzikazi Gaby Irene Kamanzi wakunzwe mu ndirimbo kuva kuri ‘Amahoro’ ni uku yaserutse

Umunyamakuru wa KC2, Tracy Agasaro, ni we wayoboye ibi birori

Umuramyi Aimé Frank Nitezeho uzwiho gusubiramo indirimbo z'abandi bahanzi akazishyira kuri YouTube yari ahari

Umuraperi MD ni uko yaserutse mu gutangiza Rwanda Gospel Stars Live, yari aherekejwe n'umugore we

Umuririmbyi Rata Jah NayChah yari yabukereye

Uwitonze Clementine [Tonzi] ni uku yaserutse yambaye

Amafoto: Yuhi Augustin