IGIHE

Ibitazibagirana kuri Musenyeri Desmond Tutu wasukiye amarira mu Rwanda

0 26-12-2021 - saa 11:49, Philbert Girinema

Musenyeri Desmond Mpilo Tutu wayoboye Itorero Anglican muri Afurika y’Epfo, yitabye Imana ku myaka 90. Ni indi ntwari ya Afurika itabarutse, umugabo wiyemeje kurwanirira ukuri mu bihe bigoye kandi abizi neza ko ashobora kubizira.

Tutu yibukirwa cyane ku bikorwa byamuranze mu kurwanya Apartheid n’ibindi bigamije kurengera uburenganzira bw’ikiremwamuntu. Yabaye Musenyeri wa Johannesburg hagati ya 1985 na 1986 n’uwa Cape Town kuva mu 1986 kugera mu 1996.

Ni we mwirabura wa mbere mu mateka wari ufashe iyo myanya kuko ubusanzwe igihugu cyayoborwaga n’abazungu kuva imbere kugera inyuma.

Mu Ukwakira 1994, yatangaje ko yifuza gusezera ku mirimo ye nka Musenyeri, abigeraho mu 1996. Umunsi yasezeyeho abayobozi bakuru mu gihugu bamushimiye umuhate we mu birori byitabiriwe na Nelson Mandela na Frederik Willem de Klerk na we wayoboye iki gihugu.

Yari umugabo muto muto, mugufi cyane ariko uhagarara ku ijambo rye ashize amanga kandi agakora ibintu ubusanzwe bidakorwa na benshi. Urugero, kubona umuntu usanzwe wiyemeza kurwanya ubuyobozi bubi ari imbere mu gihugu cye, bikorwa n’umugabo bigasiba undi.

Yageze mu Rwanda arira nk’umwana

Mu gihe mu Rwanda habaga Jenoside yakorewe Abatutsi, Tutu na we yari arimbanyije urugamba rwo kurwanya Apartheid. Byonyine amatora yagejeje Mandela ku buyobozi agashyira iherezo ku butegetsi bwa ba gashakabuhake b’Abazungu yabaye tariki 27 Mata 1994, iminsi 20 gusa Jenoside yakorewe Abatutsi itangiye.

Tutu na bagenzi be mu gihugu ni yo bari bahanze amaso cyane ko bari bamaze imyaka myinshi barwana inkundura n’ine Mandela arekuwe.

Gusa ntibyabujije Tutu kwamagana ubwicanyi bwakorwaga mu Rwanda. Muri Gicurasi 1994 ubwo yari i Genève mu Busuwisi mu nama ya Loni yiga ku Burenganzira bwa muntu yasabye Isi kutareberera ubwicanyi bwari buri gukorerwa mu Rwanda.

Hashize umwaka Jenoside yakorewe Abatutsi ihagaritswe, Tutu yageze i Kigali. Icyo gihe hari ku wa 30 Nyakanga 1995. Yari yitabiriye igiterane cy’amatorero atandukanye cyari cyabereye kuri Stade Amahoro.

Yaje nk’umushyitsi mukuru ukuriye amatorero, ahageze Perezidansi ya Repubulika isaba ko afatwa nk’umushyitsi mukuru w’igihugu. Yasuye ibice bitandukanye areba ubukana bwa Jenoside yakorewe Abatutsi.

Yajyanywe mu Bugesera i Ntarama, ahagera imirambo ikihagarara kuko ntabwo Kiliziya y’i Ntarama yari yagatunganyijwe neza ku buryo iba urwibutso.

Yarasenze uwo munsi mu magambo make agira ati “Nyagasani udufasha, udufashe tugire imbaraga zo kutazongera kubona ubundi bwicanyi bw’abantu bawe.”

Akimara kuvuga ayo magambo, yararize bikomeye nk’umwana muto, abura intege zo guhagarara agiye kwitura hasi abantu bamufata mu maboko.

Abari kumwe na we uwo munsi harimo Musenyeri Bilindabagabo Alexis ari na we wagendaga asobanurira abantu ubukana bwa Jenoside yakorewe Abatutsi na Rev. Past. Antoine Rutayisire wari umuhuzabikorwa w’igiterane cyamwakiriye.

Pasiteri Rutayisire yabwiye IGIHE ko Tutu yageze i Ntarama nyuma y’igiterane, avuga ko iyo aba yaragiyeyo mbere y’uko yigisha kuri Stade Amahoro, yari kuvuga amagambo atandukanye n’ayo yigishije.

Ati “Byaramutunguye cyane ni cyo kintu nibuka kuko twari turi kumwe. Bya bindi umuntu ibintu bimufata akamera nk’ufashwe n’isereri bakamufata mu maboko ngo atagera ku butaka, bamufashe ataragera ku butaka.”

Iyo usomye amateka ya Tutu, yari umuntu utinyuka akavuga, ufite imbaraga z’umutima ku buryo yavugaga ijambo ukumva rifite imbaraga. Rutayisire asobanura ko ari byo byatumye abari bashyigikiye Apartheid mu gihugu cye bamwita “shitani”.

Ati “Politiki yabo yarayirwanyaga kandi agatinyuka akavuga, akajya ahagaragara ntagire ubwoba. Nubwo aza ino aha yaje afite icyo kintu cy’ubukana bwinshi avuga ngo Abanyarwanda mugomba kwiyunga nimutiyunga mugakora politiki y’iryinyo rikurirwa irindi ngo mwese muzasigara mutunzwe n’isupu.”

“Hanyuma tumujyanye i Ntarama aravuga ati ariya magambo sinari kuba narayavuze iyo muba mwaranyeretse ibi bintu byabaye hano. Ati ahubwo muri intwari kuba mutinyuka kuvuga ubwiyunge mwarabonye ibintu nk’ibi. Naho yari umuntu w’umugabo ubona ufite ijambo riremereye ritangana n’uko yanganaga mu buryo bw’umubiri.”

Asoje urugendo rwe avuganira abaryamana bahuje ibitsina

Pasiteri Rutayisire asobanura ko abantu bazibukira Tutu ku buryo yahanganye n’ubutegetsi bwari bufite imbaraga gusa ko abashobora kumwigana ari bake kuko ibyo yakoze bishobora bake.

Ati “Umuntu utinyuka kuvuga ukuri nubwo gushobora kumuhitana, ntabwo ari benshi.”

Mu gihe cye cya nyuma, Tutu yari yarakomeje umurongo we wo kuvuganira abantu batagira kirengera ku buryo yageze aho arwanya ihohoterwa rikorerwa abaryamana bahuje ibitsina agashimangira ko ari uburenganzira bwabo.

Inshuro nyinshi mu ruhame yakundaga kuvuga ko kwamagana abaryamana bahuje ibitsina bingana no kwimakaza irondaruhu.

Ati “Mfite imbaraga zo gushyigikira uburenganzira bw’abaryamana bahuje ibitsina kurusha uko nari meze kuri Apartheid.”

Yigeze kuvuga ko yahitamo kuzajya mu kuzimu iteka aho kugira ngo ajye mu ijuru ryanga ababana bahuje ibitsina.

Pasiteri Rutayisire avuga ko uko benshi bamushimye arwanya Apartheid ari na ko mu gihe cye cya nyuma abavugabutumwa n’abakirisitu bamwijunditse ku bwo gushyigikira ubutinganyi kandi Bibiliya itabwemera.

Ati “Ushatse kumenya aho mpagaze, nanjye ibyo ndabimugaya. Mu myaka ye ya nyuma ni ako kantu, ariko buriya nabyo biterwa n’uwo uriwe. Isi iba igutegerejeho kuba umurengezi w’abanyantege nke, ashobora kuba yaragiye muri uwo murongo akibagirwa ko mbere na mbere ari Umusenyeri kandi Bibiliya ibyo ntibishyigikira. Naho ubundi ni umuntu uzinjira mu mateka nk’intwari, ibyo ni isazi yaba yaguye mu mata.”

Tutu asize umugore witwa Leah n’abana bane hamwe n’abuzukuru barindwi.

Mu 2005 ubwo yari amaze kuvugurura amasezerano ye y'ugushyingiranwa n'umugore we bari bamaranye imyaka 50, yaramwegereye aramusoma
Yari umusaza wiyemeje kuba impirimbanyi y'amahoro ku Isi
Mu 2009, Perezida Obama yamuhaye umudali ku bw'ibikorwa byamuranze
Aha yari ayoboye amasengesho yo gusezera kuri Nelson Mandela
Ubwo yari mu Rwanda, yarasenze asaba Imana ko ubwicanyi bwahagarara ku Isi
Tutu yapfuye afite imyaka 90 y'amavuko. Yari amaze imyaka 20 arwaye Cancer
Apfuye nk'intwari ku bw'umuhate we wo kwanga ikibi no guharanira amahoro
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza