Kuva ku wa 15 Ukwakira kugeza mu mpera z’uku kwezi uyu mwaka, Bishop Harerimana Jean Bosco ari mu masengesho yo gusenga Imana, kurushaho kuyiyegereza no gusengera ibyifuzo bitandukanye.

Bishop Harerimana Jean Bosco washinze ndetse akaba ayobora Itorero Zeraphath Holy Church ari mu masengesho azasozwa n’igiterane cyagutse cyo kuramya no gushima Imana.

Uyu mukozi w’Imana amaze igihe mu Misiri [igihugu Bibiliya yita Egiputa] aho Abisiraheli babaye imyaka myinshi bari mu buretwa kugeza igihe bakurwagayo.

Bibiliya yerekana ko Mose ari we wakuye Abisiraheli muri iki gihugu bari batoterejwemo, aberekeza i Kanani mu gihugu cy’isezerano.

Bishop Harerimana Jean Bosco wagiriye uruzinduko muri iki gihugu yasuye ibice bitandukanye bifite amateka muri Bibiliya aho na we yasengeye asaba imbaraga zo gukomeza gukora ivugabutumwa rigamije guhindura benshi kuba abizera.

Muri uru ruzinduko yasuye ku Musozi wa Sinai aho Mose yavuganiye n’Imana; aho Mariya na Yozefu bahungiye Herode ashaka kubica; aho Abisiraheli bambukiye Inyanja Itukura, imisozi irebana n’Ubutayu bwa Kadeshi n’ahandi.

Yabwiye IGIHE ko aho yanyuze hose yahakoreye amasengesho agamije kurushaho kwegera Uwiteka no gusaba ububyutse.

Yagize ati “Amasengesho nayatangiye ku wa 15 Ukwakira, azasoza ku wa 31 Ukwakira 2021.’’

Yavuze ko yahisemo kujya kuyakorera ku Musozi Sinai kuko “hari amateka kandi ari ho Imana yahagaze ivugana n’umuntu (Mose), rero bifite icyo bivuze mu buryo bw’umwuka.’’

Bishop Harerimana yavuze ko muri ayo masengesho ari gusengera ibyifuzo biyobowe no kuragiza itorero mu biganza by’Uhoraho, gusengera igihugu no kugisabira guhashya COVID-19.

Ati “Hejuru ya byose ni ugusaba Imana imbaraga n’ubwenge mu murimo w’Imana njye na bagenzi banjye dukora.’’

Umuyobozi wa Zeraphath Holy Church, Bishop Harerimana Jean Bosco, yasengeye ku misozi ifite amateka muri Bibiliya mu kwitegura igiterane gisoza umwaka

Amasengesho Bishop Harerimana arimo arabimburira igiterane Zeraphath Holy Church iteganya gukora, gisanzwe kiba mu mpera z’umwaka mu gushimira Imana ku burinzi bwayo.

Iki giterane cy’iminsi itanu giteganyijwe kuva ku wa 27-31 Ukwakira 2021. Gifite intego ivuga iti “Ni gute wasenya imivumo yo mu muryango?’’ Kizabera ku rusengero rwa Zeraphath Holy Church ruherereye Kimironko kwa Rwahama; kizananyuzwa no ku mbuga nkoranyambaga zitandukanye z’itorero.

Bishop Harerimana yibukije abakirisitu bose ko Yesu ari Umwami n’Umukiza w’ubugingo bwabo, bityo bakwiye gukomeza kumwizera.

Itorero Zeraphath Holy Church rigiye kwinjira mu giterane nyuma y’uko muri Nzeri ryasoje amasengesho y’iminsi 40 [yabaye kuva ku wa 13 Kanama kugeza ku wa 22 Nzeri 2021] yari agamije gusengera ububyutse no kurushaho kwegera Imana.

Aya masengesho yitabiriwe n’ababarirwa mu bihumbi barimo abayakurikiranye mu buryo bw’ikoranabuhanga ndetse n’abateraniye mu rusengero rwa Seraphath.

Bishop Harerimana yavuze ko mu minsi 40 habayeho gusengera ibyifuzo bitandukanye ndetse byinshi birasubizwa, gusengera abarwayi [barimo n’abakize indwara zikomeye] no gukora deliverance.

Zeraphath Holy Church ifite icyicaro gikuru mu Karere ka Rubavu; ifite n’ishami ryayo i Remera mu Mujyi wa Kigali; Umuyobozi w’iri torero Bishop Harerimana asanzwe akoreshwa ibitangaza byo gukiza uburwayi bwananiranye no gusengera abafite ibibazo by’ingutu.

Inkuru bifitanye isano: Bakiriye agakiza; ibitangaza biraboneka: Ishimwe rya Bishop Harerimana nyuma y’amasengesho y’iminsi 40

Bishop Harerimana Jean Bosco apfukamye aho Mose yavuganiye n'Imana. Icyo gihe yari munsi y'iri buye kuko hari izuba ryinshi cyane ashaka kuryikinga

Turiya duti turi ku kagezi aho Eliya yahungiye ubwo Umwami Ahabu yashakaga kumwica. Yahamaze igihe atunzwe n'icyiyoni

Bishop Harerimana ari kumanuka ava ku Musozi Sinayi

Aha ni ho Yozefu, Mariya na Yezu bahungiye ubwo bahigwaga na Herode ashaka kubica

Aha ni ho Yozefu yahuriye n'abavandimwe be bwa mbere arabamenya ariko bo ntibamumenya kuko bari bazi ko yitabye Imana nyuma yo kugurishwa. Yabahaye ibyo kurya, anabatuma kuri se

Bishop Harerimana ahagaze mu ntambwe nke uvuye ku Nyanja Itukura aho Abisiraheli bambukiye bagana i Kanani

Munsi y'iki giti ni ho Mariya yugamye izuba ari kumwe na Yozefu ubwo bari bahunze

Ibuye Mose yaryamagaho asohotse mu buvumo

Pyramid zo mu Misiri zubatswe kera mu gihe Abisiraheli bakoraga uburetwa muri iki gihugu na zo yarazisuye

Bishop Harerimana Jean Bosco yakoze amasengesho yitegura igiterane gikomeye kizaba mu mpera z'Ukwakira 2021