IGIHE

Umunya-Philippines yagizwe intumwa ya Papa mu Rwanda

0 1-02-2022 - saa 11:26, Muhonzire Sylvine

Musenyeri Arnaldo Sanchez Catalan ukomoka muri Philippines yagizwe intumwa nshya ya Papa Francis mu Rwanda, akaba asimbuye Arikiyepisikopi Andrzej Józwowicz wasoje ubutumwa bwe muri Nyakanga 2021 abumazemo imyaka ine.

Itangazo ryamwemeje nk’intumwa nshya y’umushumba wa Kiliziya Gatolika ku Isi mu Rwanda, ryasohotse kuwa 31 Mutarama 2022.

Yakoze amateka yo kuba umupadiri wa mbere ukomoka muri Arikidiyosezi ya Manila muri Philippines ubaye intumwa ya Papa mu gihugu runaka.

Musenyeri Catalan w’imyaka 55 aje mu Rwanda avuye mu Bushinwa aho yari amaze imyaka itatu ari umuyobozi wungirije w’intumwa ya Papa muri iki gihugu mu ntara ya Taipei.

Catalan yavuye i Manila kuwa 18 Nzeri 1966, ahabwa isakaramentu ry’ubusasaredoti ku itariki 25 Werurwe 1994.

Mu 2001 yakomereje ubutumwa bwe mu biro by’intumwa za Papa mu bihugu bitandukanye birimo Zambia, Mexique, u Buhinde, Kuwait, Turukiya, Argentine, Canada, Honduras, Philippines n’u Bushinwa.

Afite diplôme muri tewolojiya no mu mategeko ya Kiliziya (droit canonique), ndetse ashobora kuvuga neza indimi eshatu zirimo Igitaliyani, Icyongereza n’Icy’Espagnol.

Uwo asimbuye Arikiyepiskopi Józwowicz ukomoka Pologne yagizwe intumwa ya Papa muri Iran mu 2021.

Intumwa ya Papa mu gihugu runaka, uretse gukora nka ambasaderi uharanira umubano mwiza hagati ya Kiliziya Gatulika n’igihugu arimo, anagira uruhare mu ishyirwaho ry’abasenyeri batandukanye muri icyo gihugu, agatanga raporo i Vatican y’uburyo kiliziya Gatulika imeze mu gihugu arimo, agafasha abasenyeri mu buryo butandukanye, akabagira inama, n’ibindi.

Niwe kandi wohereza amazina i Vatican y’abapadiri cyangwa abasenyeri bashobora kuzamurwa mu ntera hagendewe ku buryo bubahiriza amategeko n’amabwiriza ya Kiliziya.

Umunya-Philippines Musenyeri Catalan yagizwe intumwa ya Papa mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza