IGIHE

Sitting Volleyball: Ibihugu birindwi bizitabira Shampiyona Nyafurika y’abafite ubumuga izabera i Kigali

0 17-08-2019 - saa 17:29, Eric Tony Ukurikiyimfura

Guhera tariki ya 15 kugeza ku ya 22 Nzeri mu Rwanda hazabera Shampiyona ya Afurika y’abafite ubumuga ‘’2019 Africa Paravolley Sitting Volleyball Championships’’ izitabirwa n’ibihugu birindwi mu cyiciro cy’abagabo n’abagore

Irushanwa ry’abagore rizaba hagati ya tariki ya 15 na 17 Nzeri mu gihe iry’abagabo rizaba hagati ya tariki ya 18 na 22 Nzeri 2019 muri Petit Stade i Remera.

Ibihugu birindwi ni byo bizitabira iyi Shampiyona Nyafurika, aho mu bagore hazakina amakipe atanu naho mu bagabo bagakina amakipe arindwi.

Amakipe y’abagabo azitabira iri rushanwa ni U Rwanda, Algérie, Misiri, Kenya, Maroc, Afurika y’Epfo na Nigeria.

Mu bagore hazitabira u Rwanda, Kenya, Misiri, Nigeria na Zimbabwe ndetse amakipe azatangira kugera i Kigali iminsi ibiri mbere y’uko amarushanwa atangira.

Amakipe y’abagabo azagabanywa mu matsinda abiri naho ay’abagore azakina hagati yayo mu buryo buzwi nka ‘Round robin’.

Perezida wa Komite y’Igihugu y’Imikino y’abafite ubumuga mu Rwanda “NPC-Rwanda”, Murema Jean Baptiste yavuze ko U Rwanda rwiteguye kwitwara neza ndetse n’iri rushanwa rizagenda neza muri rusange.

Ati“ Imyiteguro tuyigeze kure. Turizera ko iyi mikino izagenda neza kandi ikipe zacu na zo zikitwara neza. Icyizere tugirirwa ni uko u Rwanda ruri imbere usibye Misiri imaze igihe iyamenyereye, ariko habayeho no kugaragaza ubushake”.

Ubwo irushanwa nk’iri ryaherukaga kubera mu Rwanda mu 2017, Ikipe y’Igihugu ya Misiri y’abagabo yatwaye igikombe itsinze u Rwanda amaseti 3-0 (25-14, 25-20 na 25-11).

Kuri iyi nshuro u Rwanda rufite icyizere cyo kwigaranzura Misiri kuko ubu rutozwa n’uwahoze ari umutoza wayo, Dr Mosaad Elaiuty nk’uko byagarutsweho n’ Umunyamabanga Nshingwabikorwa wa NPC Rwanda, Nizeyimana Célestin.

Mu bagore, igikombe cyegukanywe n’u Rwanda nyuma yo gutsinda Misiri amaseti 3-0 ku mukino wa nyuma.

U Rwanda rwiteguye kwaira ibihugu birindwi bizitabira Shampiyona Nyafurika y’abafite ubumuga izabera i Kigali mu mukino wa Sitting Volleyball
Umunyamabanga Nshingwabikorwa wa NPC Rwanda, Nizeyimana Célestin yizeye ko amakipe y'u Rwanda azitwara neza akegukana ibikombe mu bagabo n'abagore
Perezida wa NPC Rwanda Murema Jean Baptiste yavuze ko imyiteguro y'iri rushanwa igeze kure
Umunya-Misiri Dr Mosaad Elaiuty (ibumoso) ni we uri gutoza u Rwanda
Nsengiyumva Jean Marie ushinzwe Tekinike muri NPC Rwanda akaba n'Umutoza w'Ikipe y'u Rwanda y'Abagore
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza