IGIHE

Beach Volleyball World Tour: Ikipe ya nyuma yari ihagarariye u Rwanda mu bagabo na yo yasezerewe

1 23-08-2019 - saa 13:47, Eric Tony Ukurikiyimfura

U Rwanda rwakiriye irushanwa ry’Isi rya Rubavu Beach Volleyball World Tour riri kubera ku mucanga wo ku kiyaga cya Kivu, rusigaye nta kipe rufite mu cyiciro cy’abagabo nyuma y’uko iya Gatsinzi Venuste na Habanzintwari Fils isezerewe mu ijonjora ribanziriza ¼ itsinzwe n’iyo mu Buyapani ku maseti 2-0 mu gitondo cyo kuri uyu wa Gatanu.

Gatsinzi na Habanzintwari batsinze umukino umwe ejo hashize, ni bo bari bahanzwe amaso n’imbaga y’abanyarwanda bari gukurikirana iri rushanwa ryo ku rwego rwa mbere rihuza amakipe ya mbere ku Isi muri uyu mukino ukinirwa ku mucanga.

Ni yo kipe yari isigaye mu irushanwa mu makipe atatu yari ahagarariye u Rwanda mu bagabo dore ko iya Mukunzi Christophe na Ndamukunda Flavien ndetse n’iya Muvunyi Fred na Niyonkuru Yves zasezerewe ejo hashize nyuma yo gutsindwa imikino ibiri.

Gatsinzi na Habanzintwari ntiborohewe n’umukino bahuyemo n’ikipe y’Abayapani igizwe na Kensuke Shoji na Masato Kurakasa, yabatsinze amaseti 2-0 (21-18 na 21-10) maze babura amahirwe yo kugera muri ¼.

Mu yindi mikino yabaye muri iki gitondo, Mukarami na Shimizu bo mu Buyapani batsinze Opsahl na Oftaas bo muri Norvège amaseti 2-1 (21-12, 19-21 na 15-12).

Yu Koshikawa na Jumpei Ikeda bo mu Buyapani na bo bakomeje muri ¼ nyuma yo gutsinda Mark Garcia-Kidd na Frederick Bialokoz bo mu Bwongereza amaseti 2-0 (21-13 na 21-14) mu gihe Tellnes Kjetil na Ragnar Marius Iversen bo muri Norvège batsinze Antonis Liotatis na Georgios Chrysostomou bo muri Chypre amaseti 2-0 (21-18 na 21-18).

Uko amakipe ahura muri ¼ mu bagabo

13:00 Suède (Lundgren & Tegenrot)vs U Buyapani ( Murakami & Shimizu)

14:00 U Buyapani (Koshikawa/Ikeda) vs Denmark (Houmann/Stormly)

15:00 U Bwongereza (Bello/Bello) vs Norvège (Tellnes/Iversena)

16:00 U Buyapani (Shoji/Kurasaka) Vs Repubulika ya Tchèque (Sramek &Gala)

Ni iki cyatumye amakipe y’u Rwanda asezererwa

Iri rushanwa ry’Isi ribera mu bihugu bitandukanye, riri ku rwego rwa mbere (ni iry’inyenyeri imwe), rikaba ryitabirwa n’amakipe ari muri 20 ya mbere ku Isi muri Beach Volleyball ariko nyine muri uru rwego rwa mbere kuko urwego rwa nyuma ari urwa gatanu.

Abakinnyi benshi baje muri iri rushanwa bavuye hanze bakina uyu mukino nk’ababigize umwuga, aho bava mu gihugu kimwe bakajya mu kindi bitabiriye amarushwanwa atandukanye.

U Rwanda rwakinishije amakipe atatu kuko ari rwo rwakiriye ndetse aya makipe yacu mu bagabo yose ntabwo aratangira no gushyirwa ku rutonde kuko ubu ari bwo ari gushaka amanota.

Ikindi ni uko ikipe nziza u Rwanda rufite igizwe na Akumuntu Kavalo Patrick na Ntagengwa Olivier itabashije kwitabira iri rushanwa kuko yari muri All-African Games muri Maroc, aho yatwaye umudali wa Bronze.

Izi mpamvu ebyiri, ziyongeraho kuba u Rwanda rutagira shampiyona ya Beach Volleyball, aho abakina uyu mukino ari bamwe tumenyereye mu mukino wa Volleyball isanzwe (ikinirwa mu nzu), bityo kugira ngo bakine uyu wo ku mucanga bikaba gake cyane.

Ndamukunda Flavien avuga ko kuba badasanzwe bakina Beach Volleyball biri mu byatumye batitwara neza muri iri rushanwa, ibi akabihuza na Habanzintwari Fils.

Ati” Biragoye ko wakina neza Beach Volleyball usanzwe ukina Volleyball isanzwe. Aya makipe twahuye bo basanzwe bakina Beach Volleyball gusa nta wundi mukino bakina mu gihe twebwe dukina Volleyball isanzwe tukanakina Beach Volleyball. Tuvuyemo ariko hari amasomo twize muri iri rushanwa".

Perezida w’Ishyirahamwe ry’Umukino wa Volleyball mu Rwanda, Karekezi Léandre yavuze ko bari kwiga uburyo hashyirwa amarushanwa y’uyu mukino wa Beach Volleyball mu Rwanda.

Ati” Aya ni amakipe akomeye aturuka mu bihugu 20 bya mbere ku Isi. Byaduhaye andi masomo, byatweretse aho tugomba gushyira imbaraga ku buryo tugira abakinnyi bakina gusa Beach Volleyball kuko abo dufite ubu bavanga Volleyball yo mu nzu n’iyo ku mucanga. Turi gutekereza uburyo twashyiraho irushanwa ryihariye rya Beach Volleyball.”

Kuri uyu wa Gatanu hari gukinwa kandi imikino ya ¼ mu bagore. Ikipe y’u Buholandi (Van Driel/Teinders) irahura n’iy’u Rwanda igizwe na Nyirarukundo na Umulisa mu gihe Denmark (Zibrandtsen/Olsen) ihura na Côte d’Ivoire (Fieny/Miessan).

Umukino wa gatatu urahuza amakipe abiri yo mu Rwanda, aho Nzayisenga Charlotte na Hakuzimana Judith batakinnye kuri uyu wa Kane, bahura n’ikipe ya Muhoza Louise na Musabyimana Penelope, aho bivuze ko u Rwanda ruzaba rufite ikipe muri kimwe cya kabiri kizakinwa kuri uyu wa Gatandatu.

Amakipe atatu azakomeza, azasanga indi kipe y’u Bwongereza (Palmer/Grimson) izatangirira muri kimwe cya kabiri bitewe n’amanota menshi ifite.

Incamake y’ibyo wamenya ku mukino wa Beach Volleyball n’iri rushanwa rya World Tour u Rwanda rwakiriye.

Gatsinzi Venuste na Habanzintwari Fils bari basigaye bahagarariye u Rwanda mu bagabo, na bo basezerewe
Gatsinzi Venuste atera umupira muri uyu mukino wabaye mu gitondo cyo kuri uyu wa Gatanu
Masato Kurakasa w'u Buyapani atera umupira
Mu mikino ine amakipe y'u Rwanda yahuyemo n'ayo mu Buyapani, yatsinzemo umwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Richard 2019-08-23 07:42:42

Ikibura ni ubunyamwuga. Mu bihugu byateye imbere Muri Volley, bayitangira bakiri abana ubundi akaba ariwo mwuga/akazi kabo ka buri munsi. Naho se aba bacu ntiwanababara ko bakina beach Volleyball. En plus bitoza kuko Hari irushanwa. Ahubwo bagatsindiwe Mu binyabumwe gusa.
Inama:
- Dushobora kugira abakinnyi bakomeye ba Volleyball ikibura ni ukubaka ubunyamwuga

Kwamamaza