IGIHE

Beach Volley: Ikipe y’u Rwanda y’abagore yabaye iya munani muri All-African Games

0 19-08-2019 - saa 09:54, Eric Tony Ukurikiyimfura

Ikipe y’u Rwanda y’abagore mu mukino wa Beach Volleyball, ntiyahiriwe n’umunsi wa gatatu w’imikino nyafurika ya All-African Games ikomeje kubera muri Maroc kuko yatsinzwe imikino itatu yose yakinnye kuri iki Cyumweru bigatuma itahana umwanya wa munani.

Ikipe y’u Rwanda igizwe na Mukandayisenga Bénitha na Munezero Valentine yabanje gutsindwa n’iya Misiri amaseti 2-0 (21-8 na 21-14) mu mukino wa ¼ wabaye mu gitondo.

Yakurikijeho umukino yahuyemo n’iya Namibia mu guhatanira umwanya hagati y’uwa gatanu n’uwa munani, itsindwa amaseti 2-0 (21-17 na 21-17).

Ibi byatumye aba banyarwandakazi bakinira hagati y’umwanya wa karindwi n’uwa munani maze na bwo bongera gutsindwa na Nigeria amaseti 2-0 (21-15 na 22-20).

Mu cyiciro cy’abagabo, ikipe y’u Rwanda igizwe na Ntagengwa Olivier na Akumuntu Kavalo Patrick yatomboye guhura n’iya Ghana muri ¼, umukino uzakinwa kuri uyu wa Kabiri.

Indi mikino iteganyijwe muri ¼ irimo uzahuza Namibia n’Ibirwa bya Maurice, Kenya na Nigeria mu gihe Mozambique izisobanura na Maroc.

Ubwo iyi mikino Nyafurika ya All-African Games iheruka kuba mu 2015 muri Congo Brazzaville, u Rwanda rwatahanye imidali itanu irimo umwe wa Bronze wabonywe n’ikipe ya Beach Volleyball y’abagore.

U Rwanda rwatsinzwe na Misiri muri ¼ mbere y'uko ruhatanira imyanya
Mukandayisenga Benitha mu kirere, atera umupira
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza