Imyitozo ngororamubiri yahinduye ubuzima bwa benshi ndetse ni nk’iturufu simusiga n’umuti ufite ubudahangarwa bwo guhangana n’indwara za hato na hato zadukira imibiri ya benshi kuva ku bakiri bato kugeza ku basaza n’abakecuru b’imvi z’uruyenzi.

Siporo zifite ibanga ryihariye kuko kuva mu bworo bw’ikirenge kugeza ku mutwe w’umuntu hafite uburyo hitabwaho mu gusigasira ubudahangarwa bw’umubiri uzirana n’amavunane, umubyibuho ukabije n’indwara z’urudaca.

Abahanga mu by’imyitozo ngororamubiri bagaragaza ko mu by’ingenzi bikwiye guhabwa agaciro harimo gukomeza amaguru kuko bifasha ibindi bice kudasusumira no guhorana itoto.

Umutoza w’Imyitozo Ngororamubiri muri Cali Fitness, Habumugisha Arnaud King, yatangarije IGIHE ko siporo zo gukomeza amaguru ari ingenzi kuko iki gice ari nk’imizi umubiri uhagazeho.

Yagize ati “Siporo zo gukomeza amaguru ni ingirakamaro kuko usanga abenshi bagerageza kwitoza ariko bakabangamirwa no kugira ibiro byinshi ku gice cyo hejuru. Umuntu ufite mu matako hakomeye akagira impfundiko zoroshye bishobora kumutera ikibazo cy’amavi kimwe n’ufite mu gatuza hanini n’amaguru yoroshye yibasirwa n’umugongo.”

Siporo zo gukomeza amaguru ni iza bose

Habumugisha avuga ko abantu bo mu byiciro bitandukanye barimo abagore, abagabo n’abakibyiruka batangiye guha agaciro imyitozo ngororamubiri.

Yagize ati “Abenshi batangiye gusobanukirwa n’imyitozo y’amaguru by’umwihariko abatugana muri Cali Fitness. Amaguru ni nk’imizi, mu gihe igiti kidafite imizi ntaho kiba gihagaze, uracyurira ukagwa; iyo ufite amaguru adafite imitsi ikomeye ukunda kurwara amavi, kugwa buri mwanya no kugira ibibazo by’umugongo. Umuntu agomba kugira imikaya iringaniye kuko ariryo shingiro ry’umubiri wubakitse. Ushaka kubaka agatuza kanini ahera ku maguru kuko ariryo fatizo.”

Habumugisha yagaragaje ko siporo zikomeza amaguru ari nk’urukingo ku ndwara zitandukanye zirimo izifata mu mavi n’umugongo. Yagize ati "Ibi bituma umuntu atagira ikibazo cy’amavi akiri muto atabitewe n’imvune ahubwo ari ukubera imitsi idakora neza kubera kubura imyitozo. ”

Siporo zo gukomeza amaguru zigabanyije mu bice bitanu, aho muri buri cyose uzikora agirwa inama yo kubisubiramo nibura mu byiciro bitatu, buri cyose agikora inshuro 12, abanje gufata akaruhuko k’amasegonda 40 na 60.

Ibyiciro by’imyitozo y’amaguru birimo Squat aho umuntu uyikora aba ateruye ibiro runaka mu ntoki, agerageza gusutama buhoro buhoro, yirinda guheta umugongo, agatuza agasa n’ukarega. Icya kabiri ni Leg Extension, ifasha gukomeza amatako hifashishijwe ‘Leg Extension Machine’; gikurikirwa na Stiff dead lift ifasha gukomeza impfundiko.

Habumugisha Arnaud King utoza abagana muri Cali Fitness akora imyitozo yo kubaka amaguru
Imyitozo ya 'Squat' ikorwa muri ubu buryo

Ibindi bice birimo Calf raise na yo ifasha gukora imbwana ; mu gihe icya nyuma ari Walk lunges ifasha kurambura imikaya y’amaguru aho akaguru kamwe ugashyira imbere, ikirenge kirambaraye hasi mu gihe akaguru kaba kari inyuma, ivi riri hasi.

Imyitozo y'amaguru ifasha uyikora kubaka ubudahangarwa bw'umubiri uzirana n'uburwayi

Abakora siporo zo gukomeza amaguru nta ndyo yihariye bategekwa, ariko batanga inama ko bakwiye kwiyitaho bamenya indyo ibakwiriye yiganjemo vitamini n’izindi ntungamubiri zikomeza imitsi.

Habumugisha utoza abakorera siporo muri Cali Fitness yabihuguriwe mu Buholandi mu gihe cy’amezi atandatu, ahakura impamyabushobozi y’uwabigize umwuga.

Uyu musore w’imyaka 26 watangiye gutoza mu 2009, ari mu bafasha abagana Cali Fitness, iherereye mu Kabuga ka Nyarutarama hafi ya Hotel Villa Porto Fino ku muhanda werecyeza i Kinyinya.

Abubatse amaguru bazirana n'indwara zo mu mavi n'izifata umugongo
Iyi gym ifite ibikoresho bigezweho bigenewe siporo zitandukanye
Cali Fitness ikora mu minsi yose y'icyumweru
Cali Fitness ikorera mu nyubako iherereye mu Kabuga ka Nyarutarama hafi ya Hotel Villa Porto Fino


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved