U Buyapani bwasezeranyije inkunga Karate yo mu Rwanda

1 12-02-2018 - saa 11:05, Manzi Rema Jules

Ambasaderi w’u Buyapani mu Rwanda, Takayuki Miyashita, yasezeranyije abakinnyi b’umukino njyarugamba wa karate inkunga mu iterambere ryawo nyuma yo kwishimira urwego rwiza bagezeho mu irushanwa rya Japan Ambassador’s Cup 2018 mu mpera z’icyumweru gishize kuri Petit stade i Remera.

Abakinnyi basaga 250 bari mu makipe 21 akomoka mu bice bitandukanye by’igihugu, kuwa Gatandatu yahurire mu irushanwa ngarukamwaka rya Japan Ambassador’s Cup ritegurwa na Ambasade y’u Buyapani mu Rwanda ifatanyije n’Ishyirahamwe ry’umukino wa Karate (Ferwaka).

Muri iri rushanwa, ryaryoheye abarikurikiranye barimo na Ambasaderi w’u Buyapani mu Rwanda,Takayuki Miyashita, abakinnyi bahanganaga hakurikijwe ibiro byabo, abafite ibyenda kungana bagahura hagati yabo.

Mu bagabo bafite munsi y’ibiro 60, Ntwali Fiston yegukanye umudali wa zahabu akurikirwa na Niyomugabo Fils David watahanye uwa silver naho Nsengiyumva Fulgence yegukana uwa bronze.

Mu bafite munsi y’ibiro 67, Irakoze Sylvain yegukanye umudali wa zahabu ahigitse Usengimana Omar watahanye uwa silver mu gihe Mugabe Christophe yatahanye uwa Bronze.

Ambasaderi Takayuki yatangaje ko yishimiye cyane urwego umukino wa karate ugezeho mu Rwanda, kuba ukinwa hose mu gihugu kandi akaba ukunzwe.

Yasezeranyije abawukina ko azakomeza gukora ibishoboka byose kugira ngo igihugu cy ekibatere inkunga bihereye ku bikoresho bikenewe.

Yagize ati “Karate ni umukino njyarugamba ukomoka mu Buyapani niyo mpamvu tuwutera inkunga. Ndishimye cyane kuba karate ari umwe mu mukino ukunzwe cyane hano ndetse nkaba numvise ko hari abawukina basaga ibihumbi bitatu mu Rwanda. Nzakora uko nshoboye mbatere inkunga haba mu kubashakira abatoza bazazamura ubumenyi bwabo ndetse no kubaha ibikoresho bigezweho.”

Yavuze ko ku bijyanye n’abatoza, hari abamaze kuboneka bo mu rubyiruko rw’Abayapani b’abakorerabushake biteguye kuza bakigisha Abanyarwanda naho ku bikoresho hakaba hari ikibuga cyabugenewe cyo gukiniraho uyu mukino (karate tatami mats) gifite agaciro ka miliyoni zisaga 45 Frw Leta y’u Buyapani yamaze kwemera ndetse kizaza mu gihe cya vuba.

Perezida w’Ishyirahamwe ry’umukino wa Karate, Theogene Uwayo, nyashimiye cyane u Buyapani u buryo bubaba hafi mu guteza imbere uyu mukino mu buryo butandukanye, by’umwihariko n’inkunga batanga mu gutegura irushanwa rya Japan Ambassador’s Cup.

Uretse mu bagabo bari munsi y’ibiro 60 na 67, hanarushanyijwe abari munsi y’ibiri 75 umudali wa zahabu wegukanwa na Munyeshyaka Vincent, akurikirwa na Kuradusenge Jean Damascene; Rutayisere Jules aba uwa gatatu.

Mu cyiciro cy’abagabo barengeje ibiro 75, Ngarambe Vanily yahigitse bagenzi be, akurikirwa na Niyonzima Jackson naho Muhizi Bernard aba uwa gatatu.

Abafana batari benshi bari bitabiriye iri rushanwa, banasusurukijwe n’umwe mu Bayapani bakorera mu Rwanda wakoze imyiyereko izwi nka ‘kata’.

Irushanwa rya Japan Ambassador’s Cup 2018 ryakiniwe kuri Petit stade i Remera.
Ibikombe byatanzwe mu irushanwa rya Japan Ambassador’s Cup 2018
Abakinnyi bagaragaje ko umukino wa karate umaze gutera imbere mu Rwanda
Ambasaderi w’u Buyapani mu Rwanda,Takayuki Miyashita na Munyabagisha Valens uyobora Komite Olempike
Ambasaderi w’u Buyapani mu Rwanda,Takayuki Miyashita
Abitwaye neza mu irushanwa rya Japan Ambassador’s Cup 2018 n'abayobozi mu ifoto y'urwibutso
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
DEM 2018-02-12 03:32:53

Wallah iyi nta nkunga irimo. Itandukaniye hehe se na’amapingu Kadafi yahaye u Rwanda nanubu akaba ajya abafunga iyo bakoze amanyanga ! Yabababababaabba . Japan namwe najyaga mbemera ariko wapi. Bazazane Fuso na AG100 Suzuki n’ibindi ndetse na Ndayihatsu wenda naho bya Karate byo wapi.

Kwamamaza