IGIHE

Yagurishije inkweto, asaba umubyeyi we 1000 ngo aze kureba Aruna muri Table Tennis- Inkuru idasanzwe ya Ebonge Shukuru

0 17-05-2024 - saa 10:43, Jah d'eau Dukuze

Muri BK Arena hakomeje kubera imikino nyafurika ya Table- Tennis, aho kuva kuri uyu wa kane tariki ya 16 Gicurasi 2024 hatangiye gukinwa amajonjora yo gushaka itike yo gukina imikino Olimpike izabera i Paris muri Nyakanga uyu mwaka.

Iyi mikino yo gushaka itike yo kujya i Paris ikaba iri gukinwa n’abakinnyi 26 mu bagabo na 24 mu bagore bava mu bihugu 15 bitarimo Misiri mu gihe kandi aba batarimo Umunya Nigeria Quadri Aruna, numero ya mbere muri Afurika uheruka gutwarira igikombe muri BK Arena.

Uyu Aruna Quadri akaba ari we wari inkuru kuri uyu wa kane, nyuma yo kumenya ko hari umwana w’imyaka 12 usanzwe ukina umukino wa Table Tennis mu Rwanda, wemeye gufata urugendo rwo kuva i Rubavu akaza i Kigali ngo ashobore kurebesha amaso uyu mu “Star” muri iri rushanwa.

Umunya-Nigeria Aruna Quadri ni we wegukanye igikombe cya Afurika muri Table-Tennis kuwa kabiri w'iki cyumweru
Numero ya mbere muri Afurika Aruna we ntabwo ari mu bakinnyi bari gushaka itike y'imikino olimpike kuko yayibonye kubera uyu mwanya

Ebonge Shukuru usanzwe akinira Ubumwe Table Tennis y’iwabo mu ntara y’Uburengerazuba, ngo yamenye ko u Rwanda ruzakira iyi mikino nyafurika muri Werurwe uyu mwaka, maze ahita atangira kubika amafaranga yazamuzana i Kigali kuko yumvise ko mu bakinnyi bazaza harimo uwo yemera Aruna Quadri.

Ati: “Mbere yo kuza nabanje gukoteza amafaranga ngenda nyabika gusa ntiyuzura biba ngombwa ko ngurisha inkweto zange za Butterfly bari baranguriye mbona amafaranga aruzuye nza i Kigali.”

Ebonge Shukuru avuga ko yageze i Kigali asigaranye amafaranga 100 gusa ni ko gutira telefone ngo ahamagare Mama we amubwira ko ageze i Kigali ngo amwoherereza itike imukura Nyabugogo imujyana ahabera imikino.

Yakomeje agira ati: “Nageze ino(muri gare) mpamagara Mama mpita mukupa kuko yari atangiye kumbwira ibintu bibi, gusa ndongera ndamuhamagara ndabimubwira neza anyoherereza igihumbi. Ubwo nahise nshaka imodoka iza i Remera ndayifata ndahaza.”

Ebonge Shukuru asanzwe ari we mwana uza imbere y'abandi mu mukino wa Tennis mu Rwanda
Nyuma yo kumenya ibyo kuza kwe byabaye ngombwa ko Federasiyo imucumbikira ngo akurikirane iyi mikino

Uyu mwana watangiye gukina Table-Tennis akiri muto akaba ngo ku munsi wa mbere byararangiye araye ku muntu bahuriye i Remera akabona aramuzi, maze bukeye abo muri Federasiyo baza kumutwara aho abandi bari kurara muri Hiltop ngo azashobore kureba Aruna neza.

“Icyatumye nza i Kigali ni ukuza kureba Aruna Quadri. Nari mbizi ko ari umunyafurika wa mbere urusha abandi. Bityo ndamukunda kubera ko ari we munyafurika wa mbere urusha abandi. Nange numva naba uwa mbere ku isi nkaba nagera ku byo Aruna yagezeho”.

Ebonge yatangiye gukina Table Tennis mu mwaka wa 2018 aho kuri ubu ari we numero ya mbere mu bakiri bato muri uyu mukino mu Rwanda dore ko anamaze kwegukana ibikombe bibiri muri Cadet bya GMT na Ambassador Cup.

Abayobozi bo mu ishyirahamwe ry’umukino wa Tennis mu Rwanda, ndetse n’umutoza we muri Ubumwe Table Tennis Club bakaba baratunguwe no kumva ko uyu mwana yaje i Kigali gusa bavuga ko bigaragaza urwego akundaho umukino wa Tennis.

Aba bikaba byararangiye bamuhuje na Aruna Quadri aho yamuhaye igikoresho asanzwe akoresha (Racket) ikintu Ebonge Shukuru avuga ko cyamushimishije cyane.

Shukuru afite inzozi zo kuzaba numero ya mbere ku isi mu mukino wa Table Tennis
Uyu munsi hakinwe imikino y'amajonjora yo gushaka itike yo kwitabira imikino Olimpike
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza