IGIHE

Ishyirahamwe ry’abahagarariye u Rwanda mu mikino Olempiki ryabonye abayobozi bashya (Amafoto)

1 6-10-2019 - saa 15:55, Eric Tony Ukurikiyimfura

Sharangabo Alex usanzwe ari Umunyamabanga Mukuru wa Komite Olempiki y’u Rwanda ni we watorewe kuba Umuyobozi w’Ishyirahamwe Nyarwanda ry’abahagarariye igihugu mu mikino Olempiki.

Kuri uyu wa Gatandatu ni bwo habaye inama yabereyemo amatora yo kuzuza imwe mu myanya ya Komite Nyobozi y’iri shyirahamwe, ku cyicaro cya Komite Olempiki kuri Stade Amahoro i Remera.

Sharangabo Alex ni we watorewe kuba Umuyobozi w’iri Shyirahamwe Nyarwanda ry’abahagarariye igihugu mu mikino Olempiki, aho yagize amajwi atandatu atsinze Shyaka Patrick wagize amajwi atatu.

Undi mwanya watorewe ni uwa Visi Perezida, aho hamamajwe Rudasingwa Jean Marie Vianney nk’umukandida rukumbi ndetse agirirwa icyizere 100%, atorwa ku majwi icyenda.

Nyuma yo gutorerwa kuyobora iri shyirahamwe, Sharangabo Alex, yabwiye IGIHE ko intego yaryo igamije guteza imbere abahagarariye u Rwanda mu mikino Olempiki itandukanye no kubafasha guteza imbere impano z’abandi bakinnyi.

Ati ”Ni Ishyirahamwe rimaze gihe ariko ryasaga n’iryasubiye inyuma gato mu mikoranire, ariko ubu bimeze neza. Duhura rimwe buri mezi atatu, aho ubu icyo tugamije cyane ari uguhura no kongera kumenyana nk’abahagarariye u Rwanda, tukagira imishinga iteza siporo imbere.”

Sharangabo yakomeje avuga ko no mu bindi bihugu byose haba amashyirahamwe y’abakinnye imikino Olempiki, aho kuri ubu bagiye gukora cyane kugira ngo n’iryabo ritere imbere.

Ati ”Icyo tugamije ni ugushyira hamwe imishinga iteza imbere abakinnye imikino Olempiki yaba abacyuye igihe cyangwa abagikina no kwegera abagikina ngo tubereke inzira nziza. Mu bindi bihugu hasanzwe amashyirahamwe nk’aya, ashyigikirwa n’ishyirahamwe Mpuzamahanga ry’abakinnye imikino Olempiki.”

Rudasingwa Jean Marie Vianney watorewe kuba Visi Perezida ni umwe mu bakinnyi batatu bahagarariye u Rwanda bwa mbere mu mikino y’Isi mu 1983 n’imikino Olempiki yabereye mu Mujyi wa Los Angeles mu 1984.

Yavuze ko mu byo bagiye gukora harimo gufasha abagikina ubu ibyo bo batigeze bafashwa ubwo bari bakiri mu kibuga.

Ati ”Tuzaba dusabwa kurinda abana babyiruka bakina imikino ngororamubiri cyangwa n’indi mikino Olempiki ibyatubayeho, tukagerageza kubafasha ibyo abandi batadufashije kugira ngo dufatanye n’igihugu guteza imbere siporo.”

Rudasingwa yasabye abagikina gukunda no guha agaciro umurimo bakora kuko ari byo bizabafasha kugera ku rwego rwiza.

Ati ”Ubutumwa nabaha ni uko mu bintu byose ukora iyo ubihaye agaciro, ukabyitangira, ukabyitaho utera imbere. Iyo ugize Imana ukabona impano, wiyipfusha ubusa kuko igihe ntikigaruka.”

Mukasakindi Claudette wakinnye Imikino Olempiki ya 2012 na 2016, yabwiye IGIHE ko afite intego yo kwitabira n’iya 2020 izabera i Tokyo mu Buyapani.

Ati ”Kugira ngo uboneke muri iyi mikino ntibiba byoroshye kuko bisaba kubikorera n’imbaraga nyinshi cyane. Ndumva amezi asigaye nshobora kuzagerageza gushaka ibihe byatuma nitabira imikino Olempiki y’umwaka utaha izabera i Tokyo.”

U Rwanda rwatangiye kwitabira imikino Olempiki mu 1984, ariko nta mudali rurabona mu nshuro icyenda zishize. Nkundabera Jean de Dieu yatwawe uw’Umuringa mu mikino y’abafite ubumuga yabareye i Athène mu 2004.

Kugeza ubu Muhitira Félicien ni we wamaze kwizera kuzakina imikino Olempiki izabera i Tokyo mu Buyapani mu mwaka utaha.

Sharangabo Alex yatorewe kuyobora Ishyirahamwe ry'abaserukiye u Rwanda mu mikino Olempike
Rudasingwa Jean Marie Vianney yagizwe Visi Perezida w'Ishyirahamwe ry’abahagarariye u Rwanda mu Mikino Olempiki
Nyirabarame Epiphanie ni umwe mu banyamuryango b'iri shyirahamwe ry'Abanyarwanda bakinnye Imikino Olempiki
Mukasakindi Claudette afite intego yo gukina Imikino Olempiki ya 2020, ikaba iya gatatu yitabiriye
Kajuga Robert ni umwe mu bitabiriye iyi nama yabereyemo amatora
Abakinnye imikino Olempiki bemerewe kongera ijambo 'OLY' ku mazina yabo

Amafoto: Uwihanganye Hardi

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kamili 2019-10-07 01:25:41

urabona ukontu babarebesheje inyuma ukagirango n’abagizi ba nabi bari guhishwa amasura yabo

Kwamamaza