IGIHE

Ulimwengu yegukanye igihembo cy’umukinnyi w’ukwezi wa Rayon Sports (Amafoto)

1 14-06-2019 - saa 21:12, Eric Tony Ukurikiyimfura

Rutahizamu w’ikipe ya Rayon Sports, Ulimwengu Jules, yatangajwe nk’umukinnyi witwaye neza kurusha abandi muri Gicurasi 2019, mu muhango wabaye ku mugoroba wo kuri uyu wa Gatanu ugahurizwa hamwe no gushyikiriza iyi kipe amacumbi y’abakinnyi no kwishimira igikombe cya shampiyona yegukanye.

Iki gikorwa cyo guhemba abakinnyi ba Rayon Sports buri kwezi cyatangijwe n’Itsinda ry’abafana rya ‘March Generation’ giterwa inkunga n’uruganda rwa Skol.

Kuri uyu wa Gatanu tariki ya 14 Kamena 2019 nibwo hahembwe umukinnyi witwaye neza mu kwezi gushize kwa Gicurasi, igikorwa cyari giteganyijwe kuri uyu wa Gatatu, ariko gihurizwa hamwe n’umuhango wo gushyikiriza iyi kipe amacumbi y’abakinnyi no kwishimira igikombe cya shampiyona yegukanye.

Igihembo giherekejwe n’ibahasha y’amafaranga ibihumbi 100 Frw, ibendera na furari by’ikipe, byashyikirijwe Ulimwengu Jules wahigitse bagenzi be barimo myugariro Manzi Thierry wegukanye icya Werurwe ndetse na rutahizamu Michael Sarpong wegukanye icyo muri Mutarama.

Ulimwengu ni umwe mu bakinnyi Rayon Sports imaze iminsi igenderaho mu bataha izamu, byongeye kandi akaba ari we watsinze ibitego byinshi muri shampiyona, 20, ku nshuro ya mbere yari aje mu bahatanira iki gihembo kuva ageze muri iyi kipe muri Mutarama aguzwe muri Sunrise FC.

Nyuma yo gushyikirizwa igihembo n’umuyobozi wa Skol, Ivan Wulffaet wari kumwe n’umuyobozi w’ikipe, Paul Muvunyi, Ulimwengu yashimiye abafana na bagenzi be bakinana.

Igihembo cy’ukwezi guheruka (Mata) cyegukanywe na Mugheni Kakule Fabrice, ubwo yari ahanganye na Mutsinzi Ange na rutahizamu Michael Sarpong.

Iki gikorwa kiba buri kwezi mu rwego rwo gutera ingabo mu bitugu abakinnyi ba Rayon Sports bitwaye neza, hashishikarizwa n’abandi gukomeza gukora cyane kuko aribyo bikomeza guha ikipe kwitwara neza mu mikino ikina yose.

Rayon Sports yatwaye shampiyona y’uyu mwaka w’imikino wa 2018/19, yitwaye neza mu mukino ubanza wa 1/8 cy’igikombe cy’Amahoro aho yatsinze Marines FC iwayo igitego 1-0 mu mukino wabereye i Rubavu kuri uyu wa Kane.

Karim ushinzwe imenyekanishabikorwa muri Skol ni we wari uyoboye gahunda muri uyu muhango
Ulimwengu agitangazwa nk'umukinnyi w'ukwezi, abafana bagiye kumukuraho aho yari yicaye
Ulimwengu yaraye afashije Rayon Sports kuva i Rubavu, atsinda igitego rukumbi cyabonetse mu mukino batsinzemo Marines FC mu gikombe cy'Amahoro
Ulimwengu ashyikirizwa igihembo n'umuyobozi w'ikipe Muvunyi Paul na Ivan Wulffaert uyobora Rayon Sports
Uyu mukinnyi w'imyaka 21 yashyikirijwe ibahasha y'ibihumbi 100 Frw, furari n'ibendera by'ikipe
Ulimwengu watsinze ibitego 20 muri shampiyona yashimiye abakinnyi bagenzi be n'abafana
Ulimwengu ahabwa ibendera rya Rayon Sports
Ni ku nshuro ya mbere Ulimwengu yegukanye igihembo cy'umukinnyi w'ukwezi muri Rayon Sports kuva ayigezemo muri Mutarama, avuye muri Sunrise FC
Uyu mukinnyi yafashije Rayon Sports kwegukana igikombe cya shampiyona y'uyu mwaka
Muri ibi birori, Queen Cha yataramiye abari babyitabiriye
Bamwe bafataga amashusho ya Queen Cha ari kuririmba
Queen Cha aririmba Aba Rayon, indirimbo yahimbiye iyi kipe papa we abereye umuganga

Amafoto: Ntare Julius

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
sembagare john 2019-06-15 05:08:45

ulimwengu ndamuzi numwana mwiza ,mwibuka kera i Nyanza tujyana kwishuli .twaliganye.abavuga KO Ali umurundi baratubeshya.aliko ubundi wamugani kuki Rayon ikunda abacanshuro

Kwamamaza