IGIHE

Tidiane Koné yageze mu Rwanda ahiga kubabaza Rayon Sports

0 30-09-2019 - saa 12:23, Eric Tony Ukurikiyimfura

Rutahizamu w’Umunya-Mali, Tidiane Koné wahoze muri Rayon Sports, yasesekaye i Kigali mu ijoro ryakeye, aje gusinyira Gasogi United izatangira gukina mu cyiciro cya mbere muri uyu mwaka w’imikino wa 2019/20.

Ahagana saa 01:10 ni bwo Tidiane Koné yasohotse mu kibuga cy’indege cya Kigali yambaye umupira w’umuhondo n’ipantalo y’umukara.

Uyu mukinnyi w’imyaka 31, yavuze ko yishimiye kugaruka mu Rwanda nyuma yo kuhava muri Mutarama umwaka ushize ubwo yerekezaga mu ikipe ya NAPSA Stars yo mu cyiciro cya mbere muri Zambia.

Ati” Nishimiye kugaruka mu Rwanda, ni ahantu nishimira kuko abantu baho baritonda ndetse maze kuhagira inshuti nyinshi. Ndi umukinnyi w’umupira, nje gushaka ubuzima bwanjye, nibigenda neza niteguye kwitwara neza.”

Abajijwe niba yiteguye guhura na Rayon Sports yakiniye ubwo aheruka mu Rwanda, Kone yirinze kugira byinshi atangaza, ariko avuga ko Imana nibishaka azababaza iyi kipe yakiniye.

Ati” Numvise ko umunsi wa mbere tuzakina na Rayon Sports. Ni umupira uzarusha undi azatsinda. Ntabwo nje hariya kwirebera amabara gusa, nzanywe no guhesha ishema umwenda w’ikipe yange. Insh’Allah nzabababaza”.

Tariki ya 1 Werurwe 2017, ni bwo Tidiane Koné yakinnye umukino we wa mbere muri Rayon Sports, ayitsindira igitego, atanga n’undi mupira wavuyemo icya Nsengiyumva Moustapha ubwo batsindaga Espoir FC ibitego 2-0 muri Shampiyona.

Uyu wakiniye AC Djoliba y’iwabo muri Mali, ntiyishimiwe n’umutoza Karekezi Olivier, arekurwa na Rayon Sports muri Mutarama umwaka ushize nyuma yo kuyitsindira ibitego bitandatu.

Asanze muri Gasogi United abandi banyamahanga barimo Manase Mutatu Mbedi ukomoka muri Repubulika Iharanira Demokarasi ya Congo, Umunya-Cameroun Athassi Fabrice Merlin n’umunya-Liberia Herron Scarla Berrian wahoze muri Kiyovu Sports.

Gasogi United FC itozwa na Guy Bukasa, yaherukaga kugura kandi Mudeyi Abdul wakiniraga Espoir FC na Kaneza Augustin wakiniraga Sorwathe FC, Cyuzuzo Ally wakiniraga Kirehe FC, Muganza Isaac wavuye muri Etincelles, Yamini Salumu wavuye muri Kiyovu Sports na Dusabe Jean Claude ‘Nyakagezi’ wakiniraga Amagaju FC.

Mu mukino wayo wa mbere muri Shampiyona y’icyiciro cya mbere, Gasogi United izakira Rayon Sports ku Cyumweru tariki ya 5 Ukwakira saa 15:00 kuri Stade Amahoro.

Tidiane Koné yageze mu Rwanda mu ijoro ryakeye
Koné aje gusinyira Gasogi United izakina icyiciro cya mbere uyu mwaka
Tidiane Koné yavuze ko yiteguye kubabaza Aba Rayon ku Cyumweru
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza