IGIHE

Skol yashyikirije Rayon Sports amacumbi y’abakinnyi azayifasha gutwara igikombe Nyafurika (Amafoto)

5 14-06-2019 - saa 20:17, Eric Tony Ukurikiyimfura

Ku mugoroba wo kuri uyu wa Gatanu tariki ya 14 Kamena 2019 ni bwo ubuyobozi bwa Rayon Sports bwashyikirijwe amacumbi y’abakinnyi bubakiwe n’uruganda rw’ibinyobwa rwa Skol rutera inkunga iyi kipe kuva mu 2014, hanishimirwa igikombe cya shampiyona iyi kipe yegukanye ku nshuro ya cyenda muri uyu mwaka w’imikino 2018/19.

Ni umuhango wabereye ku cyicaro cya Skol mu Nzove nyuma y’imyitozo ya nimugoroba ikipe yakoreye ku kibuga yubakiwe n’uyu muterankunga wayo, aho igikoreraho kuva muri Nzeri 2017 ubwo cyatahwagwa ku mugaragaro.

Rayon Sports yashyikirijwe amacumbi azajya yakira abakinnyi 40, aho ari inzu ebyiri zigerekeranye. Inzu yo hasi ifite imiryango itatu, aho harimo umuryango wa mbere ugizwe n’igitanda kimwe gishobora kuryamamo abantu babiri kizajya kiryamwamo n’umutoza, undi muryango urimo ibitanda by’abakinnyi ndetse n’umuryango uzajya ukorerwamo inama y’ikipe iri kwitegura umukino.

Inzu yo hejuru igizwe n’imiryango ine irimo ibitanda bine muri buri muryango. Amagodora (matelas) ari kuri ibi bitanda byose byo mu nzu, afite imyenda ikoze mu birango bya Skol. Uretse amacumbi, hamuritswe kandi aho abakinnyi bazajya bogera, aho bazajya bahindurira imyenda, ivuriro rito ndetse n’igikoni kizajya gitunganyirizwamo ibyo abakinnyi bazajya barya mu gihe bari mu Nzove.

Umuyobozi w’uruganda rw’ ibinyobwa rwa Skol, Ivan Wulffaert, yashimiye ubuyobozi bwa Rayon Sports bukurikirana ubuzima bwa buri munsi bw’ikipe, avuga ko amacumbi bahawe azabafasha gukora imyitozo kabiri buri munsi badasubiye iwabo, bakabasha kwegukana igikombe cyo ku rwego rwa Afurika.

Ati "Ndashimira abantu mwese muri hano by’umwihariko abakinnyi bazanye igikombe hano. Ndashimira kandi komite iyoboye Rayon Sports irimo Paul Muvunyi, kuba akomeje gufata neza Rayon Sports. Aya macumbi azajya abamo abakinnyi 40, aho bashobora gukora imyitozo mu gitondo, bakarira hano, nimugoroba bakongera gukora imyitozo ndetse bakazabasha gutwara igikombe cyo ku rwego rwa Afurika.”

Umuyobozi wa Skol yongeye kwibutsa abakinnyi ba Rayon Sports ko nta gitsinagore kizaba cyemerewe kwinjira mu macumbi yabo.

Ati” Rayon Sports ifite amategeko igenderaho, ariya macumbi nta bagore bemerewe kuyageramo. Hari ahafite igitanda gishobora kwakira abantu babiri ariko ni aho Perezida w’ikipe na kapiteni bashobora kuruhukira. “

Umuyobozi wa Rayon Sports, Muvunyi Paul, yashimiye Ubuyobozi bwa Skol bwabaye hafi y’ikipe, abafana b’ikipe n’abakinnyi bitanze kugeza Rayon Sorts yegukanye igikombe, avuga ko aya macumbi koko azabafasha.

Ati "Skol yarakoze kutuba hafi muri uyu mwaka, abafana namwe mwarakoze kujya za Kirehe, Rusizi, Rubavu n’ahandi kugeza shampiyona irangiye ndetse n’abakinnyi bitanze. Niba abakinnyi baratwaye shampiyona tutazi aho batashye, nibazajya baba hano murumva abo bantu bazajya bakora imyitozo kabiri ku munsi tunabakurikirana, bazaba bahagaze gute? Turashaka igikombe cya CAF kandi tuzagitwara. “

Ivan Wulffaert uyobora Skol yashyikirije umuyobozi wa Rayon Sports urufunguzo mu rwego rwo kugaragza ko aya macumbi afunguwe ku mugarago mu gihe umuyobozi wa Rayon Sports, na we yamushyikirije igikombe cya shampiyona iyi kipe yegukanye, amushimira uruhare uru ruganda rwagize ngo ikipe icyegukane.

Abari bitabiriye uyu muhango mu Nzove, basusurukijwe n’umuhanzi Queen Cha, akaba umukobwa wa Mugemana Charles, umuganga wa Rayon Sports, waririmbye indirimbo zirimo Aba Rayon yahimbiye iyi kipe.

Rayon Sports yatwaye shmpiyona izahagararira u Rwanda muri CAF Champions League 2018/19 izatangira muri Kanama ndetse irashaka kwegukana igikombe cy’Amahoro cy’uyu mwaka, aho yatsinze Marines FC igitego 1-0 mu mukino ubanza wa 1/8 wabereye i Rubavu kuri uyu wa Kane.

Umuyobozi w’uruganda rwenga ibinyobya ‘Skol Brewery Ltd Rwanda’, Ivan Wullfaert, ashyikiriza urufunguzo rw'amacumbi Umuyobozi wa Rayon Sports, Muvunyi Paul
Uru rufunguzo rwatanzwe mu rwego rwo gufungura ku mugaragaro amacumbi Skol yageneye abakinnyi ba Rayon Sports
Ibyumba birimo amacumbi y'abakinnyi ba Rayon Sports. Matelas zifite imyenda iriho ibirango bya Skol
Hari ahari igitanda no hejuru
Icyumba cyahariwe umutoza mukuru
Umuyobozi wa Rayon Sports na we yashyikirije umuyobozi wa Skol igikombe cya shampiyona
Umuyobozi wa Skol Ivan Wilffuaert acugusa champagne muri ibi birori byo kwishimira igikombe cya cyenda cya shampiyona Rayon Sports yegukanye
Muvunyi Paul uyobora Rayon Sports ashyikiriza abafana champagne
Muhawenimana Claude uyobora abafana ba Rayon Sports yabanje gusogongera kuri iyi champagne ya Skol mbere yo kuyishyikiriza abandi
Irambona Eric na Rutanga Eric bari bahagarariye abandi bakinnyi muri uyu muhango, bashyikiriza umuyobozi wa Skol igikombe
Mazimpaka Andre, Rutanga na Irambona bifotoza bafite igikombe cya shampiyona Rayon Sports yegukanye
Queen Cha yasusurukije abari bitabiriye uyu muhango wabereye mu Nzove
Queen Cha aririmba Aba Rayon, indirimbo yahimbiye iyi kipe papa we abereye umuganga

Amafoto: Ntare Julius

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
lolo 1 2019-06-16 13:48:47

hhhhhh sarpong azakagutura tu iki si igitanda ni injyana muntu

2
mugabo 2019-06-15 06:33:44

ndabona ari pavillon za chuk sarpong azakavuna agwire mazimpaka

3
mugabo 2019-06-15 03:15:07

biriya bitanda mubibasubize mumenye ko abakinnyi baryama neza iwabo icumbi ni sawa ariko ibitanda abafana babyigurira sarpong yazahanuka akagwira mazimpaka akabyuka akambakamba kwa kundi abikora akora celebration

4
emmy 2019-06-15 00:06:14

Byari uburyohe!

5
wapi 2019-06-14 15:13:18

aba bakinnyi bazaryama kuri utu dutanda ntibazavunika imigongo. amacumbi aciriritse peeee

Kwamamaza