IGIHE

Qatar 2022: Amavubi yakoreye amateka kuri Seychelles ayisezerera ku bitego 10-0 mu mikino yombi (Amafoto)

6 10-09-2019 - saa 21:23, Eric Tony Ukurikiyimfura

Ikipe y’igihugu y’u Rwanda ‘Amavubi yabonye intsinzi y’amateka mu mikino yo gushaka itike y’Igikombe cy’Isi, aho yasezereye iya Seychelles ku bitego 10-0 mu mikino yombi, ni nyuma yo kuyitsinda ibitego 7-0 mu mukino wo kwishyura wabereye kuri Stade ya Kigali ku mugoroba wo kuri uyu wa Kabiri.

Amavubi yari yatsinze umukino ubanza wabereye muri Seychelles ku wa Kane w’icyumweru gishize, ku bitego 3-0.

Kuri uyu wa Kabiri, umutoza w’Amavubi, Mashami Vincent yongeye kwitabaza ikipe yabanjemo mu mukino ubanza mu gihe kapiteni Haruna Niyonzima ikibazo cye cy’ibyangombwa kitarakemuka.

Amavubi yatangiye umukino ari hejuru, yafunguye amazamu ku munota wa 16, ku ishoti rikomeye ryatewe na Bizimana Djiahad nyuma y’uko Hakizimana Muhadjiriri yari amaze guhana ikosa ryakorewe kuri Kagere Meddie.

Uburyo bumwe Seychelles yabonye, ni ubwo ku munota wa 13, aho Labrosse Brandon yacenze abakinnyi batatu bo hagati b’Amavubi, atanga umupira kuri mugenzi we, Vigoot Gerrick na we wateye ishoti rikomeye rica ku ruhande rw’izamu nyamara yari asigaranye n’umunyezamu Kimenyi Yves.

Amavubi yahushije uburyo bwinshi cyane ku bakinnyi basatira izamu, yabonye igitego cya kabiri ku munota wa 27 gitsinzwe na Meddie Kagere n’umutwe mbere y’uko Tuyisenge Jacques atsinda igitego cya gatatu nyuma y’amasegonda make ubwo abakinnyi b’inyuma ba Seychelles bananirwaga gukiza izamu ryabo.

Tuyisenge wari uyoboye bagenzi be muri uyu mukino, yatsinze igitego cya kane ku munota wa 33 nyuma yo guherezwa na Omborenga Fitina mu gihe nyuma y’iminota ibiri yangiwe igitego cyashoboraga kuba icya gatatu cye.

Amavubi yihariye umukino, yagarutse mu gice cya kabiri n’ubundi ari hejuru, atsindirwa igitego cya gatanu na Meddie Kagere ku munota wa 52 nyuma yo guherezwa na Imanishimwe Emmanuel mu gihe nyuma y’iminota ine, Mukunzi Yannick yatsinze icya gatandatu n’umutwe ku mupira wari uvuye muri koruneri yatewe na Bizimana Djihad.

Kuba Amavubi yari amaze kwizera gukomeza no gushimisha abafana, byatumye Mashami akuramo Mukunzi Yannick na Rwatubyaye Abdul basimbuwe na Niyonzima Olivier ‘Sefu’ na Manzi Thierry kugira ngo atangire gutegura umukino wo gushaka itike ya CHAN 2020 u Rwanda ruzahuramo na Ethiopia mu byumweru bibiri biri imbere.

Habura iminota 11, Hakizimana Muhadjiri yatsindiye Amavubi igitego cya karindwi ku mupira wahinduwe na Tuyisenge Jacques.

Impinduka za nyuma ku ruhande rw’Amavubi, zabaye ubwo Sugira Ernest yasimburaga Meddie Kagere mu minota ya nyuma.

Iminota 90 yarangiye nta kipe yongeye kureba mu izamu, Amavubi asezerera Pirates ya Seychelles ku bitego 10-0 mu mikino.

U Rwanda rukomeje mu ijonjora rya kabiri, aho amakipe 40 yo muri Afurika azagabanywa mu matsinda 10 azamenyekana mu minsi iri imbere.

Amavubi yaherukaga gutsinda imikino ibiri (mu rugo no hanze) mu gushaka itike y’igikombe cy’Isi ubwo yahuraga na Mauritania mu 2008.

Iyi ni yo ntsinzi ikomeye ikipe y’u Rwanda ibonye muri iyi mikino nyuma ya 3-0 yatsinze Seychelles mu mukino ubanza na Mauritania mu 2008.

Ikipe y'u Rwanda 'Amavubi iririmba indirimbo yubahiriza igihugu
Abasimbura b'Amavubi
Mashami Vincent n'abo bafatanya baririmba indirimbo yubahiriza igihugu
Abahagaze: Kagere, Rwatubyaye, Omborenga, Kimenyi, Tuyisenge na Imanishimwe. Abunamye: Bayisenge, Bizimana, Mukunzi, Muhire na Hakizimana
Umutoza wa Seychelles Jan Mak n'abo bakorana, mbere y'umukino
Mu minota ya mbere, Tuyisenge Jacques yahushije igitego asigaranye n'umunyezamu Barra Romeo
Bizimana Djihad yishimira igitego cya mbere cy'Amavubi
Abakinnyi bagenzi be barimo Mukunzi na Tuyisenge bahise bajya kubyinana na we, bishimira iki gitego cya mbere
Kagere Meddie yishimira igitego cya kabiri cy'Amavubi
Nyuma y'amasegonda make, kapiteni Tuyisenge Jaques yatsinze igitego cya gatatu
Tuyisenge na Bizimana Djihad bishimira igitego cya gatatu cy'u Rwanda
Tuyisenge yangiwe igitego cyashoboraga kuba icya gatatu cye mu gice cya mbere
Umupira Kagere yateresheje umutwe wagiye hejuru y'izamu
Kagere nyuma yo guhusha uburyo bwanyuze hejuru y'izamu
Bizimana Djihad atera umupira wa koruneri
Mukunzi Yannick yatsinze igitego cya gatandatu kuri koruneri
Gen. Kabarebe James, umujyanama wa Perezida Kagame mu by'umutekano akaba n'Umuyobozi w'icyubahiro wa APR FC, yarebye uyu mukino
Minisitiri wa Siporo n'Umuco Nyirasafari yari mu bayobozi barebye uyu mukino
Umunya-Misiri Salaheldini Hesham wari ushinzwe kugenzura imyitwarire y'abasifuzi
Uwahoze ari Perezida wa Rayon Sports, Muvunyi Paul yari mu barebye uyu mukino
Abafana b'Amavubi bari babukereye
Perezida wa FERWAFA, Sekamana Jean Damascene, Minisitiri w'Urubyiruko Mbabazi Rosemary na Minisitiri wa Siporo n'Umuco Nyirasafari Esperance bagiye gushimira Amavubi ubwo umukino wari urangiye
Ba Minisitiri bombi bashimira umutoza Mashami Vincent
Amavubi yashimiwe nyuma yo gusezerera Seychelles

Amafoto: Usanase Anitha

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
rwema cov 2019-09-12 04:05:08

ikigragara nuko Ministre azi akazike pe, nakomeze abahe morale. uzikuva mukibuga abayobozi bakagusanga aho nyine bakagushimira. kand nambere yamatch yarabasuye. nagerageze turebe ko twasubira kugira byabihe byiza byaba Gatete Jimmy. kuja muri CAN 2021 TUBITEGURE NOW. KEEP IT UP MINISTER

2
joh 2019-09-11 02:04:17

Well done. Gusa haracyari kare cyane, turusheho kwitegura neza rirya jonjora ryamatsinda, niho basore mugomba kugaragariza abanyarwanda umusaruro nyawo. Gusa as a team, all is possible. Congs #AMAVUBI.

3
mugema 2019-09-11 01:17:49

amavubi atarimo abanyamahanga arashoboye, nishimiye abantu bafashe iki cyemezo. Nyamara DE GAULE hari icyo yasize

4
Kagwa 2019-09-11 00:24:07

Ikipe amavubi yatsinze se koko...😂

5
Hi 2019-09-10 22:55:38

Mwashije ikibonobono. Ngaho muzabikore no mwayo matsinda mugiye kujyamo. Nibura murangize muri mumakipe 2 yambere

6
Seba 2019-09-10 15:01:27

Amavubi ari kutwinga natwe Imana yatwibutse kbs

Kwamamaza