IGIHE

Mugiraneza Jean Baptiste ‘Migi’ yasinye mu ikipe yo muri Tanzania

2 10-07-2019 - saa 15:25, Eric Tony Ukurikiyimfura

Uwahoze ari kapiteni wa APR FC, Mugiraneza Jean Baptiste ‘Migi’ yashyize umukono ku masezerano y’imyaka ibiri muri Kinondoni Municipal Council F.C. yo muri Tanzania, iri no gukina irushanwa rya CECAFA Kagame Cup riri kubera mu Rwanda.

KMC FC iri mu itsinda rya mbere hamwe na Rayon Sports, Tout Puissant Mazembe yo muri Repubulika Iharanira Demokarasi ya Congo na Atlabara FC yo muri Sudani y’Epfo.

Iyi kipe isinyishije Mugiraneza nyuma y’iminsi mike adafite ikipe kuko yirukanwe na APR FC mu mpera z’ukwezi gushize.

Migi asubiye muri Tanzania yabayemo imyaka ibiri akinira Azam FC hagati ya 2015 na 2017, mbere yo kwerekeza muri Gor Mahia FC yo muri Kenya. Yakinnyeho umwaka umwe asubira muri APR FC.

Uyu kapiteni wungirije mu ikipe y’igihugu ‘Amavubi’, yafashije Azam FC kwegukana CECAFA Kagame Cup ya 2015 no kugera mu ijonjora rya kabiri rya CAF Confederation Cup ya 2015/16.

Mugiraneza uvuka ku Mumena, yakuriye mu makipe y’abato ya Kiyovu Sports mbere yo kwerekeza muri La Jeunesse FC, ikipe nshya yari imaze gushingwa ku Mumena mu ntangiriro ya za 2000, itozwa na Rwasamanzi Yves na Kayiranga Jean Baptiste wari uhagaritse gukina muri Rayon Sports.

Iyi kipe yaje kuzamuka mu cyiciro cya mbere, Migi ayikinira kugeza aguzwe na Kiyovu Sports, abengukwa na APR FC yerekejemo mu 2007. Yayimazemo imyaka umunani, ayihesha ibikombe bitandatu bya shampiyona, bine by’Amahoro na bibiri bya CECAFA Kagame Cup, ajya muri Tanzania mu mpeshyi ya 2015.

Muri Mutarama 2018 ni bwo Migi yasubiye mu ikipe y’Ingabo z’u Rwanda, ayifasha gutwara shampiyona ya 2017/18 na Super Cup 2018. Gusa yisanze mu bakinnyi 16 basezerewe ubwo ubuyobozi bwa APR FC bwakoraga impinduka zikomeye nyuma yo kutegukana igikombe na kimwe mu mwaka ushize w’imikino.

KMC Migi yerekejemo, muri CECAFA Kagame Cup uyu mwaka imaze kubonamo inota rimwe yakuye kuri Atlbara FC banganyije igitego 1-1 ku Cyumweru, mu gihe yaraye itsinzwe na TP Mazembe igitego 1-0.

Iyi kipe izahagarira Tanzania muri CAF Confederation Cup ya 2019/20, izasoza imikino yo mu itsinda A rya CECAFA Kagame Cup ku wa Gatandatu, yisobanura na Rayon Sports mu mukino uzabera kuri Stade ya Kigali i Nyamirambo.

Mugiraneza Jean Baptiste yasinyiye KMC yo muri Tanzania
Mugiraneza Jean Baptiste yari yagarutse muri APR FC batandukanye mu kwezi gushize
Migi ni umwe mu bakinnyi 16 APR FC yasezereye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Friends 2019-07-10 10:41:47

Nkurikije igihe yatangiriye gukina ndabona atagiye kuyikinira ahubwo ari ukuyitoza ngirango! Ni Bogota wa 2!!!

2
Eric 2019-07-10 09:46:11

Congz MIGI komeza utsinde abafana ba APR Fc turagushyigikiye

Kwamamaza