Mugabo Gabriel wakiniraga Rayon Sports yasinye muri KCB SC yo muri Kenya

1 7-11-2018 - saa 15:21, Ngabo Roben

Mugabo Gabriel wakinaga muri ba myugariro ba Rayon Sports, yamaze gusinya amasezerano y’imyaka ibiri muri KCB SC yo mu cyiciro cya mbere muri Kenya.

Mu gitondo cyo kuri uyu wa Gatatu, nibwo Kenya Commercial Bank Sports Club (KCB SC), yasinyishije uyu myugariro w’umunyarwanda nyuma y’ibiganiro byari bimaze amezi abiri.

Mugabo yahisemo gusinyira iyi kipe itozwa n’Umunya-Kenya, Wazito Frank Ouna, kuko yari hafi kugera ku musozo w’amasezerano ye na Rayon Sports, yari kuzarangira tariki 4 Ukuboza 2018.

Uyu mukinnyi umaze ibyumweru bibiri i Nairobi muri Kenya, biteganyijwe ko agaruka mu Rwanda kuri uyu wa Gatanu ngo yimuke mbere yo kujya gutangira imyitozo n’imikino ya gicuti ibanziriza shampiyona ya Kenya izatangira tariki 8 Ukuboza 2018.

Nubwo atashimye kwemeza aya makuru, yatangaje ko ari hanze y’u Rwanda kandi KCB SC iri mu makipe baganiriye.

Mugabo yabwiye IGIHE ati “Nibyo ntabwo ndi mu Rwanda ariko ibyo nagiyemo ntabwo nabitangaza. KCB SC iri mu makipe yanyifuje kandi twaravuganye ariko ibyo kuyisinyira ntacyo nabivugaho kuko ndacyafite amasezerano na Rayon Sports.”

Bivugwa ko Wazito utoza KCB SC yashimye Mugabo mu mikino itatu Rayon Sports yakinnye na Gor Mahia FC muri CAF Confederation Cup no muri CECAFA Kagame Cup 2018.

KCB SC yakirira imikino yayo kuri ‘Nairobi City Stadium’ yasinyishije Mugabo nyuma y’abandi batatu; Baraka Badi, Michael Kibwage na Bernard Mang’oli, bavanye muri AFC Leopards na Sofapaka FC.

Mugabo wavutse tariki 10 Ugushyingo 1990 yakiniye amakipe atandukanye arimo; Marines FC, Mukura VS Police FC n’ikipe y’igihugu y’u Rwanda, Amavubi.

Mugabo yari akiniye Rayon Sports imyaka ibiri
KCB SC yamushimye mu mikino itatu Rayon Sports yakinnye na Gor Mahia FC
Mugabo Gabriel yasinye amasezerano y'imyaka ibiri muri KCB SC
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
KIKI 2018-11-07 07:46:42

Amahirwe masa Gaby,uzahirwe kabisa.Gusa mbonye ko gukina muri gikundiro uba wishakiye amahirwe yo kujya hanze y’u Rwanda.Uzagire ibihe byiza kandi Imana izakurinde

Kwamamaza