IGIHE

Mashami yasabye imbabazi abanyarwanda, ashyira mu majwi ubuyobozi ku gutuma Amavubi atitwara neza

2 20-08-2019 - saa 14:23, Eric Tony Ukurikiyimfura

Mashami Vincent wamaze kugirirwa icyizere cyo kongera gutoza Amavubi mu mwaka umwe, yavuze ko hari ibyo atarumvikana na Minisiteri y’Umuco na Siporo kugira ngo ashyire umukono ku masezerano mu gihe kandi yasabye imbabazi abanyarwanda ko ikipe ayoboye ititwaye neza mu marushanwa aheruka.

Ibi yabitangaje mu kiganiro yagiranye na Radio Rwanda kuri uyu wa Kabiri, aho yavuze ko impande zombi zamaze kumvikana, hasigaye kwemeza ingingo zimwe na zimwe ziri mu masezerano mbere y’uko asinywa.

Ati” Nk’uko mwambyumvise ejo, ibiganiro byatangiye ku wa Gatanu n’ubu biracyakomeza ariko navuga ko byageze ku musozo n’ubwo ntarasinya ariko bisa n’ibyarangiye, nka 99% byararangiye, igisigaye ni ugushyiraho ikaramu. Amasezerano si ikinyamakuru usoma ngo uhite usinya haba harimo ibintu byinshi uba ugomba kuganiraho n’umukoresha wawe.”

Mashami yasabye imbabazi abanyarwanda ko Amavubi atagaragaje isura nziza y’igihugu

Abajijwe icyatumye atagira umusaruro mwiza mu mwaka umwe yari afitemo ikipe y’igihugu ubushize, aho yanganyije imikino ibiri muri itanu yakinnye, indi akayitsindwa bigatuma Amavubi adakina CAN 2019, Mashami yavuze ko u Rwanda rwari mu itsinda rikomeye ariko yirinda kugira byinshi avuga yahuye na byo nk’imbogamizi.

Ati” Uko byagenze si ko twabyifuzaga, twagize intangiro mbi uhereye muri Centrafrique. Itsinda ntabwo ryari ryoroshye n’ubwo tutakwisuzugura ariko ni ikipe itanga icyizere.”

“Ibibazo umuntu ahura na byo ni byinshi mu kazi ariko ntabwo byose wakwicara hano kuri micro nk’uku ngo ubivuge, ntabwo byabura ariko ntabwo byakabaye urwitwazo kuko umupira ukinirwa mu kibuga kandi biganirwaho n’impande bireba.”

Mashami yasabye imbabazi abanyarwanda ko ikipe yari abereye umutoza itabashije kubahesha isura nziza ku ruhando mpuzamahanga mu mikino iheruka gukina.

Ati” Twakongera kwisegura ku banyarwanda ko tutabahaye isura nziza ariko urebye ibibazo ikipe yacu yagiye ihura na byo, urebye umukinnyi ku wundi, urebye ukuntu yasoje imikino twari turimo ngira ngo ni ikipe mu by’ukuri njye ntatinya kuvuga ko yatsinda uwo ari we wese ariko mu gihe tuyiteguye birushijeho.”

Mashami yasabye imbabazi abanyarwanda nyuma y'uko Amavubi atitwaye neza mu mwaka yamaze ayatoza

Uburyo Amavubi ategurwamo ntibihagije

Amavubi amaze amezi atanu nta mukino uwo ari wo wose akina nyuma yo gutsindwa na Côte d’Ivoire ibitego 3-0 muri Werurwe.

Iyi kipe iheruka umukino wa gicuti muri Kanama 2016 ubwo yatsindwaga na Sénégal ibitego 2-0 mbere yo guhura na Mozambique mu gushaka itike y’Igikombe cya Afurika cya 2017.

Mashami yavuze ko uburyo ikipe y’igihugu itegurwamo atari bwiza n’ubwo ngo na none atari bubi bigendanye n’izindi nshingano Minisiteri y’Umuco na Siporo iyifite mu nshingano zayo, iba ifite.

Ati” Ntabwo navuga ngo uburyo dukoreramo, uburyo duhamagaramo abakinnyi, uburyo duteguramo ikipe ngo ni bwiza cyane, ariko na none ntabwo ari bubi cyane urebye wenda n’izindi gahunda igihugu cyacu muri rusange cyangwa se Minisiteri ireberera imikino yose inshingano iba ifite, ntabwo biba byoroshye kwita ku mikino yose ngo abantu babyakire kimwe.”

“Ntabwo nabura kuvuga ko bidahagije, hakenewe izindi mbaraga ziyongeraho. Kugira ngo igihugu kizamuke mu mupira w’amaguru cyangwa ngo kigire aho kigera, ntabwo bireba Minispoc gusa cyangwa FERWAFA cyangwa umutoza, cyangwa abakinnyi, ni ikintu cyagutse.”

Mashami asanga uburyo ikipe y'igihugu itegurwamo budahagije

Mashami yitezweho iki uhereye kuri Seychelles?

Mashami azatangira aka kazi ke ku mukino u Rwanda ruzakirwamo na Seychelles tariki ya 2 Nzeri mu ijonjora rya mbere ryo gushaka itike y’Igikombe cy’Isi cya 2022 kizabera muri Qatar mu gihe umukino wo kwishyura uzabera mu Rwanda tariki ya 10 Nzeri.

Nyuma yo guhura na Seychelles, ikipe y’igihugu izahura kandi na Ethiopia mu ijonjora rya nyuma ryo gushaka itike ya CHAN 2020, rizakinwa hagati ya tariki ya 20 n’iya 22 Nzeri (mu mikino ibanza) mu gihe iyo kwishyura izaba hagati ya tariki ya 18 n’iya 20 Ukwakira 2019.

Mu gushaka itike y’igikombe cya Afurika cya 2021 kizabera muri Cameroun, u Rwanda ruri mu itsinda F, aho imikino ibiri ibanza izakinwa mu Ugushyingo uyu mwaka.

Uyu mutoza avuga ko bishoboka ko Amavubi yagira umusaruro mwiza n’ubwo yatinze gutegurwa kuko kugeza ubu hasigaye iminsi 12 ngo Amavubi akine na Seychelles.

Ati” Byose birashoboka gusa nyine mu mupira nta nzira ngufi ibamo, ibintu byose ni ukubitegura. Ntabwo byoroshye, ni umusozi wo kurira gusa nyine nta kidashoboka, ni inshingano zitoroshye, ubu dusigaje iminsi irindwi, nta shampiyona dufite, ntabwo wamenya ngo abakinnyi bari he, bari muri pre-season kandi pre-season ni pre-season umuntu aba ari kubaka umubiri uretse abakinnyi bakina hanze bo bamaze iminsi batangiye shampiyona.”

“Biragoye kuba wakwizeza abantu ko ugiye kuzana intsinzi ariko na none ntabwo wavuga ngo twamaze gutsindwa, tugomba kugenda tukihagararaho nk’abagabo. Dufite abakinnyi bashoboye, icyo tugomba gukora ni ukugenda tukababa hafi, tukabaha ibyangombwa no kubashyigikira mu buryo bwose.”

Mashami avuga ko u Rwanda rwizeye kwitwara neza imbere ya Seychelles

Mashami avuga iki ku batumva uburyo hahamagarwa ikipe y’igihugu?

Iyo hahamagawe ikipe y’igihugu yitegura irushanwa runaka, bamwe bavuga ko hari abakinnyi birengagijwe nyamara bafite ubushobozi mu gihe hari n’abamagarwa ntibivugweho n’inzego zitandukanye z’abanyarwanda.

Umutoza w’ikipe y’igihugu Mashami avuga ko bigoye ko abantu bose babibona kimwe.

Ati” Ntabwo ushobora gushimisha abantu bose. Ntabwo twese twabona ibintu kimwe, bajye babyakira, mu bushishozi bwacu nk’abatoza nibo tuba twabonye.”

Mashami yavuze ko nta gihindutse, guhera tariki ya 23 ikipe y’igihugu ‘Amavubi’ izaba yatangiye umwiherero wo kwitegura umukino ubanza izakirwamo na Seychelles mu ijonjora ribanza ryo gushaka itike y’Igikombe cy’Isi cya 2022 kizabera muri Qatar.

Amavubi atarahamagarwa, azakina na Seychelles mu minsi 12 iri imbere
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
van 2019-08-21 00:14:57

amavubi arananiwe kbsa mashami ararengana ... mwakwivugurura mukongeramo abanyamahanga bacye bashoboye wenda twazagera kure # ibi mbivuze nkurikije kure hashoboka ubwo twajyaga muri Tunisia muri can , twari dufite abanyamahanga kdi kiriya gihe ikipe yaratsindaga bitari nkubu.

2
jahsin 2019-08-20 13:22:57

Ibyo uvuga nibyo Kandi nizere ko bazaguha match 2 zokwitegura. Ikindi ushatse wazagira Usengimana Faustin Capt kuko ikibuga akiyobora neza. Komeza umukurikirane.

Kwamamaza