IGIHE

Lionel Messi yegukanye Ballon d’Or ya karindwi

0 29-11-2021 - saa 23:52, Eric Tony Ukurikiyimfura

Rutahizamu w’Ikipe y’Igihugu ya Argentine na Paris Saint-Germain, Lionel Messi, yegukanye Ballon d’Or ya 2021 nyuma yo gutorwa nk’umukinnyi mwiza wahize abandi muri uyu mwaka mu bihembo bya France Football byatangiwe muri Théâtre du Châtelet i Paris kuri uyu wa Mbere.

Lionel Messi w’imyaka 34, yegukanye iki gihembo ku nshuro ya karindwi nyuma yo gutwara icya 2009, 2010, 2011, 2012, 2015 na 2019.

Iki gihembo yagihawe nyuma yo kugira amezi 12 meza aho yatwaye Copa America ari kumwe na Argentine muri Nyakanga ubwo yasozaga irushanwa anganya ibitego bine na Neymar ndetse yaratanze indi mipira itanu yavuyemo ibitego kuri bagenzi be.

Amezi atatu mbere yaho, uyu mukinnyi wahoze muri FC Barcelone, yari yaregukanye Copa del Rey yabaye igikombe cya 34 n’icya nyuma muri iyi kipe yo muri Espagne yatandukanye na yo mu mpeshyi.

Rutahizamu wa Bayern Munich, Robert Lewandowski, wahabwaga amahirwe yo kwegukana iki gihembo mu mwaka ushize, ariko ntigitangwe kubera COVID-19, ni we wabaye uwa kabiri mu gihe Jorginho wa Chelsea yabaye uwa gatatu.

Cristiano Ronaldo ugwa Lionel Messi mu ntege mu bamaze gutwara Ballon d’Or nyinshi, aho afite eshanu, kuri iyi nshuro yabaye uwa gatandatu mu bakinnyi 30.

Umukinnyi watwaye Ballon d’Or mu bagore ni Umunya-Espagne Alexia Putellas w’imyaka 27, akaba asanzwe akinira FC Barcelone.

Mu bindi bihembo byatanzwe, rutahizamu w’umwaka yabaye Umunya-Pologne Robert Lewandowski, umunyezamu mwiza aba Gianluigi Donarumma wa PSG n’u Butaliyani mu gihe umukinnyi mwiza ukiri muto yabaye Umunya-Espagne Pedri w’imyaka 19 ukinira FC Barcelone.

Uko abakinnyi bakurikiranye mu bagabo:

  • 1)Lionel Messi (Paris Saint-Germain, Barcelone & Argentine)
  • 2) Robert Lewandowski (Bayern Munich & Pologne)
  • 3) Jorginho (Chelsea & U Butaliyani)
  • 4) Karim Benzema (Real Madrid & U Bufaransa)
  • 5) N’Golo Kante (Chelsea & U Bufaransa)
  • 6) Cristiano Ronaldo (Manchester United & Portugal)
  • 7) Mohamed Salah (Liverpool & Misiri)
  • 8) Kevin De Bruyne (Manchester City & U Bubiligi)
  • 9) Kylian Mbappe (Paris Saint-Germain & U Bufaransa)
  • 10) Gianluigi Donarumma (Paris Saint-Germain & U Butaliyani)
  • 11) Erling Haaland (Borussia Dortmund & Norvège)
  • 12) Romelu Lukaku (Chelsea & U Bubiligi)
  • 13) Giorgio Chiellini (Juventus & U Butaliyani)
  • 14) Leonardo Bonucci (Juventus & U Butaliyani)
  • 15 ) Raheem Sterling (Manchester City & U Bwongereza)
  • 16) Neymar (Paris Saint-Germain & Brésil)
  • 17) Luis Suarez (Atlético Madrid & Uruguay)
  • 18) Simon Kjaer (AC Milan & Danemark)
  • 19) Mason Mount (Chelsea & U Bwongereza)
  • 20) Riyad Mahrez (Manchester City & Algeria)
  • =21) Bruno Fernandes (Manchester United & Portugal)
  • =21)Lautaro Martinez (Inter Milan & Argentine)
  • 23) Harry Kane (Tottenham & U Bwongereza)
  • 24) Pedri (Barcelone & Espagne)
  • 25) Phil Foden (Manchester City & U Bwongereza)
  • =26) Nicolo Barella (Inter Milan & U Butalitani)
  • =26) Ruben Dias (Manchester City & Portugal)
  • =26) Gerard Moreno (Villarreal & Espagne)
  • =29) Cesar Azpilicueta (Chelsea & Espagne)
  • =29) Luka Modric (Real Madrid & Croatia)
Lionel Messi yegukanye Ballon d’Or ku nshuro ya karindwi
Umunya-Espagne Alexia Putellas yatwaye Ballon d'Or ya 2021 mu bagore
Robert Lewandowski yahembwe nka rutahizamu w'umwaka
Umunyezamu Donarumma ni we wahize abandi mu 2021
Pedri w'imyaka 19 ni we mukinnyi muto witwaye neza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza