IGIHE

Lionel Messi yasingije Cristiano Ronaldo n’ikipe ya Juventus

0 14-03-2019 - saa 13:23, Eric Tony Ukurikiyimfura

Nyuma yo gufasha ikipe ya Juventus de Turin gusezerera Atlético Madrid muri 1/8 cya UEFA Champions League mu mukino wabaye ku wa Kabiri, Lionel Messi yavuze ko Cristiano Ronaldo yagize ijoro ridasanzwe kuri uwo munsi.

Lionel Messi na we yaraye afashije ikipe ye ya FC Barcelone gusezerera Olympique Lyonnais yo mu Bufaransa muri iri rushanwa, bayitsinda ibitego 5-1, umukino yatsinzemo ibitego bibiri, anatanga imipira ibiri yavuyemo ibindi bitego kuri bagenzi be.

Ubwo yari abajijwe n’itangazamakuru uko yakiriye kuba Cristiano Ronaldo yaratsinze ibitego bitatu kuwa Kabiri, bombi bakageza agahigo ko gutsinda ibitego bitatu mu mukino umwe (hat-trick) umunani muri iyi mikino ihuza amakipe yabaye aya mbere iwayo i Burayi, Messi yavuze ko ibyo Ronaldo na Juventus bakoze bidasanzwe.

Ati “Ndatekereza ko ibyabaye kuri Cristiano Ronaldo n’ikipe ya Juventus ntabwo bisanzwe. Numvaga Atlético ishobora kubakomerera, ariko Juventus yarabigaranzuye na Cristiano yagize ijoro ry’agatangaza atsinda ibitego bitatu.”

Ubwo yari amaze gufasha Juventus gukomeza muri ¼, Cristiano Ronaldo na we yavuze ko iyi kipe yamuguze kugira ngo ayifashe kugera ku byo itakoze mu myaka yabanje.

Ati “Niyo mpamvu Juventus yanzanye hano, ngo nyifashe gukora ibyo batakoze mbere. Uba ugomba kwitwara gutya niba ushaka kwegukana Champions League”.

Juventus ya Ronaldo na FC Barcelone ikinamo Lionel Messi zishibora gutomborana muri ¼ ubwo hazaba hamenyekana uko amakipe azahura mu cyiciro gikurikira kuri uyu wa Gatanu.

Cristiano Ronaldo amaze gutsinda ibitego 124 mu mikino yose yakinnye muri UEFA Champions League mu gihe Lionel Messi we amaze gutsinda ibitego 108 muri iri rushanwa.

Lionel Messi na we yigaragaje mu mukino basezereyemo Lyon, agira uruhare mu bitego bine
Messi yavuze ko ibyo Ronaldo na Juventus bakoze bidasanzwe
Ronaldo yafashije Juventus gusezerera Atletico Madrid kuwa Kabiri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza