IGIHE

Lionel Messi ayoboye urutonde rw’abakinnyi 100 ba mbere bakomeye ku Isi

2 10-09-2019 - saa 09:34, Eric Tony Ukurikiyimfura

Umunya-Argentine, Lionel Messi, ukinira FC Barcelone ni we uyoboye urutonde rw’abakinyi bakomeye muri uyu mwaka mushya, FIFA 20, rushyirwa hanze n’ikigo cya EA Sports ku bufatanye n’Ishyirahamwe ry’Umupira w’Amaguru ku Isi (FIFA).

Uru rutonde rwashyizwe ahagaragara kuri uyu wa Mbere, rugaragaza ko Lionel Messi ari we mukinnyi uhagaze neza kurusha abandi n’amanota 94.

Umunya-Portugal, Cristiano Ronaldo wa Juventus ari ku mwanya wa kabiri na 93 aho akurikiwe na Neymar ukinira Paris Saint-Germain ari uwa gatatu n’amanota 92.

Uru rutonde rukorwa hashingiwe ku bushobozi bw’umukinnyi n’uko yitwara mu kibuga hagendewe ku mwanya akinaho.

Ku bakinnyi bataha izamu, harebwa ibitego atsinda, imipira aha bagenzi be, uburyo arema imbere y’izamu bushobora kubyara ibitego, ubuhanga bwo gucenga, imbaraga akoresha n’ibindi bitandukanye.

Kuri ba myugariro, harebwa imipira yambuye abakinnyi bahanganye, imipira yo mu kirere yatanze abandi bakinnyi n’ubundi buryo bushobora gutuma agaragara nk’umukinnyi mwiza w’inyuma.

Abatoza batandukanye, abashakira amakipe abakinnyi babigize umwuga n’abafana bazwiho kureba imikino myinshi itandukanye, bose hamwe bagera ku 9,000 ni bamwe mu bitabazwa mu gutanga amanota agenderwaho hakorwa uru rutonde.

Amanota aba bakusanyije, ashyikirizwa abayasuzuma bagera kuri 300, bareba mu bice 35 bitandukanye, buri mukinnyi agahabwa amanota hagendewe ku ijanisha.

Arjen Robben uheruka gusezera umupira w’amaguru, Medhi Benatia na Luis Filipe bari muri uru rutonde mu mwaka ushize, ariko ubu ntibagaragara muri FIFA 20.

Mesut Ozil, Alexis Sanchez, Riyad Mahrez, Ivan Perisic, Diego Costa, Cesar Azpilicueta, Vincent Kompany, Gareth Bale, Andres Iniesta, Gonzalo Higuain na Gianluigi Buffon na bo ntibari muri aba bakinnyi 100 ba mbere.

Abakinnyi 10 ba mbere muri FIFA 20:

  1. Lionel Messi - FC Barcelone: 94
  2. Cristiano Ronaldo - Juventus: 93
  3. Neymar Jr. - PSG: 92
  4. Eden Hazard - Real Madrid: 91
  5. Kevin De Bruyne - Manchester City: 91
  6. Jan Oblak - Atlético de Madrid: 91
  7. Virgil van Dijk - Liverpool: 90
  8. Mohamed Salah - Liverpool: 90
  9. Luka Modric - Real Madrid: 90
  10. Marc-André ter Stegen - FC Barcelone: 90
Lionel Messi ayoboye urutonde rw’abakinnyi 100 bakomeye ku Isi
Cristiano Ronaldo wari imbere ya Messi mu mwaka ushize, yabaye uwa kabiri
Neymar ni we mukinnyi wa gatatu mu bakomeye ku Isi nk'uko urutonde rwa FIFA 20 rubigaragaza
Kylian Mbappé yabuze mu 10 ba mbere, aza ku mwanya wa 11
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
G William 2019-09-10 06:27:19

Nimutwereke urutonde rwose uko arabakinyi 100

2
Ferecien 2019-09-10 05:54:00

messi ni umuhanga nabatamwemera sinzi icyo bazemera pe gusa kubayobora nibinunguye kuko arabikwiye rwose

Kwamamaza