Kiyovu Sports ikomeje imyitozo ikarishye yitegura kwihorera kuri Rayon Sports yayimanuye muri shampiyona y’umwaka ushize.

Uyu mukino wahagurukije abafana b’impande zombi n’ubundi badasanzwe bajya imbizi, uzabera kuri stade ya Kigali ku Cyumweru tariki 15 Ukwakira 2017 saa 15h30.

Kuri uyu wa Gatatu, IGIHE yasuye imyitozo ya Kiyovu Sports yakoreye ku Mumena kuva saa 14h30 kugera saa 17h00, umutoza Cassa Mbungo André yibandaga ku gutyaza ubusatirizi bwe buyobowe na Vino Ramadhan na Sebanani Emmanuel.

Abafana batari bake bari baje kureba iyi myitozo, gusa mu biganiro byabo icyo bagarukaho cyane ni uburyo bifuza kwihimura kuri Rayon Sports yari yabatsinze ibitego 2-1 ku mukino wa nyuma wa shampiyona y’umwaka ushize bituma bamanuka mu cyiciro cya kabiri nubwo baje kugaruka kubera Isonga FC yasezeye.

Uburakari bw’Abayovu ahanini bunashingira ku buryo abakunzi ba Rayon Sports nyuma yo kuyimanura mu cyiciro cya kabiri bagiye ku Mumena [ikibuga Kiyovu Sports yakiriraho] bacukura imva bashyiraho n’umusaraba bavuga ko bashyinguye umukeba atazagaruka ukundi.

Mu kiganiro yagiranye n’itangazamakuru nyuma y’imyitozo, Umutoza Cassa Mbungo André yunze mu ry’abafana avuga ko ari umukino ashaka gutsinda ariko anongeraho ko n’ikipe bazahura itoroshye.

Yagize ati “Ni amanota atatu dushaka kimwe n’uko nabo bayakeneye. Turategura ibyacu kandi dushaka kuzitwara neza tugashimisha abakunzi ba Kiyovu Sports twizera ko bazaba banaje ari benshi.”

Cassa yavuze ko kugeza ubu nta kibazo cy’imvune cyangwa umukinnyi udahari afite bose barimo gukora imyitozo kandi bafite ishyaka ryo kwitangira ikipe yabo.

Imyitozo yo kuri uyu wa Gatatu niyo yari iya nyuma abafana bemerewe kureba kuko iyo kuri uyu wa Kane no kuwa Gatanu izakorwa imiryango y’ikibuga ifunze cyangwa iyi kipe igahindura aho iyikorera mu rwego rwo kwirinda ko hagira abatasi bo kwa mukeba baza kubiga nk’uko Cassa yabivuze.

Yagize ati “Tuzakora nta bafana bahari n’abanyamakuru cyangwa se [abanyamakuru] muze musange hano nta muntu urimo ntimumenye aho twakoreye kuko hari imyitozo ntakoresha ubu.”

Uretse ubukeba hagati y’aya makipe, ni amwe mu yahoze afite abafana benshi ndetse ahangana cyane gusa mu myaka ya vuba ntabwo byagenze neza ku ruhande rwa Kiyovu Sports kuko yabaye insina ngufi imyaka ikaba igiye kuba irindwi itarabasha gutsinda Rayon Sports na rimwe mu mikino ya shampiyona.

Kiyovu Sports ifite ibikombe bitatu bya shampiyona kuva mu 1964, mu myaka 21 ishize yahuye na Rayon Sports ifite ibikombe bya shampiyona umunani, inshuro 41 muri shampiyona yatsinze eshanu gusa itsindwa 22 naho izindi 14 baranganya.

Ku munsi wa Mbere wa shampiyona Kiyovu Sports yitwaye neza itsinda Musanze FC igitego 1-0 cya Vino Ramadhan mu gihe Rayon Sports yanganyije na AS Kigali 1-1 bituma iri ku mwanya wa cyenda ku rutonde rw’agateganyo rwa shampiyona.

Mu yindi mikino ikomeye itegerejwe cyane Mukura VS na yo itararangije neza umwaka ushize.Yatangiye itsinda Kirehe FC; tariki 13 Ukwakira izaba yakiriye Police FC ya Seninga Innocent yatsinzwe na Etincelles FC ku mukino wa mbere naho APR FC izasure Marines FC i Rubavu tariki 14 Ukwakira.

Imikino yose iteganyijwe:

Kuwa Gatanu tariki 13 Ukwakira 2017
Mukura VS vs Police FC (Huye Stadium, 15:30)

Kuwa Gatandatu tariki 14 Ukwakira 2017

Marines Fc vs APR Fc (Umuganda Stadium, 15:30)
Espoir Fc vs Etincelles Fc (Rusizi Stadium, 15:30)
AS Kigali vs Miroplast Fc (Kigali Stadium, 15:30)
Sunrise Fc vs Gicumbi Fc (Nyagatare, 15:30)
Amagaju Fc vs Kirehe Fc (Nyagisenyi, 15:30)

Ku Cyumweru tariki 15 Ukwakira 2017

Rayon Sports Fc vs SC Kiyovu (Kigali Stadium, 15:30)
Musanze Fc vs Bugesera Fc (Stade Ubworoherane, 15:30)

Abazamu ba Kiyovu Sports, Ndoli Jean Claude na Nzeyimana Djihad barangije imyitozo
Bakoze imyitozo ikomeye y'ingufu
Cassa Mbungo yasabye abakunzi ba Kiyovu Sports kuzaza ari benshi ku mukino wa Rayon Sports
Habyarimana Innocent wavuye muri APR FC ni umwe mu bitezwe kuri uyu mukino
Imyitozo y'uyu munsi yibanze ku kuboneza mu rushundura
Kalisa Rachid ntabwo azabasha gukinira Kiyovu Sports kubera ibibazo by'ibyangombwa
Sebanani Emmanuel witezweho ibitego
Sebanani, Kalisa na kapiteni Kakule Mugheni bakora imyitozo


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved