IGIHE

FERWAFA yisanze mu rindi bara! AS Kigali WFC yahawe amanota y’umukino utararangiye

0 25-01-2023 - saa 08:28, Ntare Julius

Amezi agiye kuba abiri Ikipe ya Freedom WFC yo mu Karere ka Gakenke igifite icyizere ko ishobora kurenganurwa ku mukino wa Shampiyona y’Abagore yatewemo mpaga na AS Kigali WFC.

Tariki ya 3 Ukuboza 2022, Freedom Women FC yaterewe mpaga y’ibitego 4-0 kuri Stade ya Kigali na AS Kigali y’abagore mu mukino wari uw’Umunsi wa gatandatu wa Shampiyona y’Icyiciro cya Mbere.

Mu gitondo cy’uwo munsi ni bwo Ikipe ya Freedom Women FC yinjiye mu modoka ya tagisi nto yo mu bwoko bwa Hiace yerekezaga mu Mujyi wa Kigali igiye gukina umukino w’Umunsi wa gatandatu wa Shampiyona na AS Kigali y’Abagore.

Iyi kipe yari yitwaje abakinnyi 16 barimo ababanza mu kibuga 11 n’abasimbura batanu barimo umunyezamu wa kabiri.

Umukino watangiye saa Sita z’amanywa, ugera ku munota wa 40 AS Kigali ifite ibitego 4-0. Nyuma y’iminota ibiri gusa, haje kuvuka ikibazo cy’umunyezamu wa Freedom WFC, Uwamahoro Chantal, wagize ikibazo cy’ukuboko nyuma yo kugongana n’umukinnyi wa AS Kigali ntibyakunda ko akomeza umukino nyuma yo kwitabwaho n’abaganga, biba ngombwa ko asimburwa.

Mu gihe iki cyemezo cyafatwaga, umunyezamu w’umusimbura Nyinawumuntu Shamim yarishyushyaga yitegura kwinjira, igihe yegeraga ku musifuzi wa kane, yamusabye icyangombwa cyerekana ko ari umukinnyi wa Freedom Women FC. Uyu yagiye kugishaka mu ibahasha irimo ibindi byangombwa biri kumwe n’ibya bagenzi be, asanga umutoza wungirije Muragijimana Vincent wari wazanye n’ikipe kubera ko umukuru Cyuzuzo yari arwaye, yibeshye, kitari mu bindi ahubwo yacyibagiriwe mu Karere ka Gakenke.

Perezida wa Freedom WFC, Hakuzimana Sadi Corneille, yitabaje ‘internet’ ngo arebe ko yakibona kuri e-mail aho FERWAFA yamwoherereje ibyangombwa by’abakinnyi be bose, gusa mu minota yari yahawe na Komiseri w’Umukino, Kagabo Ahmed, irangira bidakunze.

Uyu muyobozi yagize ikibazo cya telefoni ye ngendanwa ‘internet’ yagendaga gahoro cyane kugeza ubwo ubu buryo bufashe ubusa. Hakubitiyeho no kuba harasibwe ubutumwa bwose bwa WhatsApp ye aho yari afite amafoto y’ibyangombwa by’abakinnyi be bose. Ibi byatumye bemera bahebera urwaje bayoboka inzira y’ibiganiro.

Abatoza n’abayobozi ba Freedom WFC basabye abasifuzi ko babadohorera bakaganira n’abakinnyi ba AS Kigali WFC kuko Nyinawumuntu basanzwe bamuzi ariko ibi na byo biba iby’ubusa kuko umusifuzi yababwiye ko ari bukurikize amategeko, niba umukinnyi adafite ikarita yerekana ko yemerewe gukina amarushanwa ya FERWAFA, atari bukine.

Uburyo bwa gatatu bwari ukwerekana urutonde rwifashishijwe ku mukino wabanjirije uyu aho Freedom Women FC yakinnye na APAER WFC kuko uyu Nyinawumuntu Shamim yari kuri uru rutonde, ibi na byo umusifuzi arabyanga.

Umusifuzi wo hagati yasabye Freedom WFC ko niba umunyezamu wayo w’umusimbura afite umuziro utuma atakina uyu mukino hakifashishwa umukinnyi usanzwe akina hagati mu kibuga.

Abatoza b’iyi kipe yo mu Gakenke bakomeje kumutakambira bamubwira ko uwo bizeye wakozeho ibisa n’ibyo ari Uwimana Grace usanzwe akina nka rutahizamu nyamara basanga afite imvune y’ukuboko asanzwe akinana, yagiriye mu myitozo, akaba yari ayimaranye ukwezi n’icyumweru. Ibi na byo biba impfabusa.

Nyuma y’uko ubu buryo bwa gatatu bwanze, ubuyobozi bwa Freedom Women FC bwabwiye abasifuzi ko ibitari byageragejwe mbere bitakunda ahubwo umukino wahagarara bakemera gutsindwa ibitego 4-0.

Abasifuzi bahamagaye ba kapiteni b’amakipe yombi, Manishimwe Joseline wa Freedom Women FC na Nibagwire Sifa Gloria wa AS Kigali Women FC, uyu usanzwe ari na Kapiteni w’Ikipe y’Igihugu y’Abagore, bemeza ko umukino uhagararira ku munota wa 42.

Mu rugendo rusubira mu Gakenke, imodoka igitsimbura, igeze mu Nyakabanda mu Karere ka Nyarugenge, ‘internet’ ya telefoni ngendanwa ya Perezida Hakuzimana yaje kumukundira, icyangombwa cy’umusimbura Nyinawumuntu kiraboneka. Byari ibyishimo ariko byaje imburagihe kuri Freedom WFC.

Icyo gihe aganira na IGIHE, Perezida wa Freedom Women FC, Hakuzimana Sadi Corneille, yatangaje ko nyuma y’ibyababayeho bagiye gutegereza raporo ya Komiseri w’umukino, Kagabo Ahmed, hanyuma bakazagira icyo bavuga nyuma ya yo.

Amategeko yarahonyowe

Ingingo ya 38 y’amategeko agenga amarushanwa ya FERWAFA iteganya ko umukino watangiye uhagarikwa n’ibiza cyangwa ikindi cyose cyaje kitateguwe, nk’imvura nyinshi yabuza abakinnyi guhumeka neza, kuzura amazi kw’ikibuga, imvura nyinshi yasiba imirongo y’ibibuga, imvura nke ishobora kuzamo inkuba nyinshi, igihu gishobora kubudikira ikibuga, urubura rushobora kurengera ikibuga n’amatara ashobora kuvaho ku kibuga mu gihe umukino wabaye mu masaha y’ijoro.

Ibindi birimo gusenyuka kwa stade, kwikanga ubugizi bwa nabi bushobora gukorerwa ku kibuga n’ibindi bitateganyjwe. Hiyongeraho kuba umubare w’abakinnyi bashobora guhabwa amakarita y’imituku, ikipe igasigarana abari munsi ya barindwi.
Kuri uyu mukino nta na kimwe mu biza cyagaragaye kuko watangiye neza ukaza guhagarikwa ku munota wa 42 kubera umunyezamu wagize imvune.

Ingingo ya 29 y’itegeko rya FERWAFA rigenga amarushanwa, rigena ko FERWAFA ishyikiriza amakipe urutonde rw’abakinnyi bemerewe kugaragara ku mukino.
Rigira riti: ‘’Umukinnyi wemerewe gukoreshwa n’ikipe ni umukinnyi ugaragara ku rutonde rutangwa na FERWAFA kandi abatoza b’ikipe bakarwakira bakanarusinyaho mbere y’uko umukino utangira.’’

Dushingiye kuri iri tegeko, risobanura neza ko yaba komiseri w’umukino cyangwa umusifuzi ari bo bagombaga kuzana urutonde rw’abakinnyi ba Freedom WFC bagombaga kwifashishwa kuri uyu mukino, atari amakipe kubera ko atari yo amenya abakinnyi bafite imiziro kuko bafatirwa ibihano muri Komisiyo y’imisifurire, iy’amarushanwa n’iy’imyitwarire byose bigashyikirizwa komisiyo y’Ubunyamabanga ari na bwo bushyira hanze urutonde ntakuka rw’abemerewe gukina umukino bujuje ibisabwa byose.

Ingingo ya 30 y’amarushanwa ya FERWAFA mu gika cya mbere yo ivuga ko abakinnyi bagaragara ku rutonde ntakuka rw’abari bukine umukino ari abafite imiziro kuko baba batanzwe na FERWAFA.

Igira iti "Abakinnyi bagaragara ku rutonde rwifashishwa ku mukino, FERWAFA iba yatanze ni abakinnyi baba bujuje ibisabwa byose n’amategeko kugira ngo bemererwe gukina."

Iri tegeko risobanura ko umukinnyi wese ugaragara ku rutonde ruri bwifashishwe ku mukino agomba kuba yakorewe ubugenzuzi mbere na komiseri ndetse n’abasifuzi bashingiye ku rutonde rwatanzwe na FERWAFA, basanga yujuje ibisabwa akabanza mu kibuga cyangwa akicara ku ntebe y’abasimbura.

Aha bigaragara neza ko urutonde rutangwa na FERWAFA, komiseri n’abasifuzi batarwitwaje kuri uyu mukino ndetse n’ubugenzuzi mbere y’umukino nta bwakozwe kuko iyo buza gukorwa ntabwo ikibazo cy’umunyezamu udafite icyangombwa cyari kugaragara hagati mu mukino.

Ingingo ya 30 y’amarushanwa ya FERWAFA mu gika cya gatatu kandi igena ko abakinnyi bemerwa nk’abafite ibyangombwa iyo banditse muri ’Système’ ya FERWAFA yitwa "FIFA Connect".

Igira iti "Abakinnyi bazabarwa nk’abafite ibyangombwa ari uko bamaze kwandikwa muri Système ya FERWAFA yitwa FIFA Connect ibemerera gukina nk’abujuje ibisabwa.’’

Iri tegeko risobanura neza ko umukinnyi uri muri ‘FIFA Connect’ wese yemerewe gukina amarushanwa ya FERWAFA n’iyo yaba nta karita afite muri ako kanya.
Kumubuza gukina amarushanwa ya FERWAFA ni ukubusanya n’iri tegeko.

Indangamuntu si bwo bwenegihugu ahubwo ni icyangombwa kiranga ubwenegihugu.

Amategeko ya FERWAFA avuga ko umukinnyi wanditse muri FIFA Connect aba afite uburenganzira bwo gukina amarushanwa y’iri shyirahamwe

FERWAFA yakoze ikosa ryo gutera mpaga umukino watangiye

Igika cya kabiri cy’Ingingo ya 38 y’amategeko agenga amarushanwa ya FERWAFA kivuga ko amanota atatu abarwa iyo umukino warangiye mu buryo bukurikije amategeko [iminota 90 n’iy’inyongera], mu masaha 48 ibyavuye mu mukino bihita byemezwa mu buryo ntakuka.

Mu gihe ikipe itakinnye iterwa mpaga y’ibitego 3-0 n’amanota atatu.

Iri tegeko rivuguruzanya n’icyemezo cya FERWAFA kuko niba yemera ko umukino wabaye itari kuwuha amanota atatu n’ibitego 4-0 kandi utararangiye.

Igika cya kabiri cy'ingingo ya 38 y'amategeko agenga marushanwa ya FERWAFA giteganya ko umukino uhabwa amanota atatu ari uko warangiye byemewe n'amategeko

Iyo umukinnyi adafite icyangombwa ku kibuga hari icyo CAF iteganya

Mu ngingo ya 39 y’amategeko agenga amarushanwa ya CAF mu gika cya mbere, iyi Mpuzamashyirahamwe yo ku Mugabane wa Afurika igena ko amakipe yombi yaba iyasuye n’iyasuwe agomba kwerekana ibyangomwa biranga abakinnyi ba yo.

Mu gika cya kabiri cy’iri tegeko, CAF igena ko mu gihe ikipe yasuye ititwaje ibyangombwa hashobora kwitabazwa ubundi buryo burimo no kwifotozanya n’umukinnyi cyangwa abakinnyi badafite ibyangombwa.

Rigira riti "Ku ikipe yasuye iyo yabuze icyangombwa yemererwa gukina umukino niba ari umukinnyi umwe cyangwa benshi hanyuma ibyo bigakorwa habanje gufatwa amafoto n’abasifuzi cyangwa Komiseri.’’

"Nyuma y’umukino aya mafoto ahabwa umusifuzi akayohereza aherekejwe na raporo atanga mu bunyamabanga bwa CAF.’’

"Mu gihe hari ikipe itanze ikirego, cya cyangombwa itagendanye icyoherereza Komisiyo y’Imisifurire ikagereranya amafoto yafatiwe ku kibuga n’ari ku cyangombwa hanyuma iyo komisiyo ikabona gufata umwanzuro."

"Ikipe yakiriye ntabwo irebwa n’iyi ngingo kuko itegetswe gushaka icyangombwa mbere y’uko umukino utangira.’’

Iri tegeko risabanura neza ko kuzana ibyangombwa ku kibuga ku makipe ari itegeko, ariko rihaga amahirwe ikipe yasuye mu gihe yabyibagiwe.

Urugero rwa hafi ni mu mukino wo gushaka itike ya CHAN 2023 wahuje u Burundi bwakiriye Djibouti kuri Stade ya Benjamin Mkapa mu Mujyi wa Dar-Es- Salaam muri Tanzania tariki ya 24 Nyakanga 2022.

Kuri uyu mukino, abakinnyi b’Intamba ku Rugamba bibagiwe ibyangombwa bibemerera gukina imikino ya CAF. Ubwo umukino wari hafi gutangira barabishatse barabibura, basanga babyibagiriwe i Bujumbura.

Mbere y’umukino, ikipe yose y’u Burundi yifotozanyije na Komiseri w’uyu mukino, Umunyarwanda Nshimiyimana Alexis Redemptus, Ubwo Djibouti yari imaze gutsinda umukino kuri penaliti 4-2, Nshimiyimana yohereje raporo iherekejwe na ya foto muri CAF.

Mu igenzura ryakozwe na CAF yasanze abakinnyi b’u Burundi bose bari muri ‘systeme’ ndetse bemerewe na CAF gukina amarushanwa yayo.

Ubu buryo bureba gusa ikipe yasuye kuko itabwirwa gusubira mu rugo ngo izane ibyangombwa. Iyo bibaye ku ikipe iri mu rugo igihe umukino uteganyijwe gutangira kikagera itarerekana ibyangombwa by’abakinnyi bay o ihita iterwa mpaga.

U Burundi bwahawe aya mahirwe nubwo ari bwo bwari bwakiriye kuko bwakiririye iw’abandi, muri Tanzania, bwabanje gukora urugendo.

Ingingo ya 39 y’amategeko ya CAF iha amahirwe ya nyuma ikipe yasuye iyo ititwaje ibyangombwa

Kuri mpaga yatewe Freedom WFC, FERWAFA yishe iri tegeko ndetse no gufata icyemezo ko ikipe iterwa iyi mpaga kubera ko umukinnyi adafite icyangombwa kandi yanditse muri ‘Systeme ya FIFA Connect’.

Kudasobanukirwa amategeko kwabayeho kwatumye Freedom WFC ihebera urwaje kugeza n’ubu amezi abiri arirenze AS Kigali WFC yandikiwe mpaga y’ibitego 4-0 yatanzwe mu buryo butavugwaho rumwe.

Yaba FERWAFA itarahaye komiseri n’abasifuzi urutonde rw’abakinnyi bagombaga kwifashishwa kuri uyu mukino kandi byanditse mu mategeko, yaba Komiseri utarakoze igenzura mbere y’umukino ko ibyangombwa by’abakinnyi byuzuye, yaba umusifuzi wahagaritse umukino atakoze ibyasabwaga n’amategeko kubera ubumenyi buke bwayo, yaba Fredom WFC yahanwe igihe ntarengwa cy’amasaha 48 yo gutanga ikirego akayirengaho kubera kudasobanukirwa amategeko yarashoboraga kuyirenganura, aba bose barebwa n’amakosa yakozwe muri uyu mukino wahaye AS Kigali Women FC amanota atatu itayakwiriye.

Freedom WFC yatewe mpaga ku maherere izira ubumenyi buke bw'amategeko
AS Kigali yahise igira amanota 18 mu mikino itandatu nyuma yo gutera Freedom WFC mpaga itaravuzweho rumwe
Perezida wa Freedom WFC, Hakuzimana Sadi Corneille, aracyategereje ko FERWAFA iboherereza raporo yatanzwe na Komiseri nyamara ari ibanga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza