Espagne yirukanye umutoza habura amasaha ngo igikombe cy’Isi gitangire

2 13-06-2018 - saa 12:43, Manzi Rema Jules

Julen Lopetegui wari Umutoza w’Ikipe ya Espagne ndetse witeguraga kuyiyobora mu mikino y’Igikombe cy’Isi gisigaje amasaha make ngo gitangire, yirukanywe azira amakuru yatangajwe ko azahita aba umutoza wa Real Madrid nikirangira.

Nyuma y’uko kuri uyu wa Kabiri Real Madrid itangaje ko Julen Lopetegui azahita asimbura Zinedine Zidane igikombe cy’Isi nikirangira, abayobozi b’Ishyirahamwe ry’Umupira w’Amaguru muri Espagne bagaragaje uburakari bukomeye by’umwihariko Perezida waryo, Luis Rubiales wabifashe nk’agasuzuguro ku ikipe y’igihugu kuba bitangajwe mbere y’iri rushanwa.

Mu kiganiro n’abanyamakuru kuri uyu wa Gatatu, Rubiales yatangaje ko bitashobokaga ko uyu mutoza akomeza kuyobora ikipe y’igihugu irimo abakinnyi bakinira amakipe atandukanye harimo n’abo azatoza umwaka utaha, akaba ariyo mpamvu bafashe icyemezo cyo kumusezerera.

Yagize ati “Byabaye ngombwa ko dutandukana n’umutoza w’ikipe y’igihugu kandi turamwifuriza amahirwe masa. Ikipe y’igihugu ya Espagne ni iy’Abanya-Espagne bose, twamenye ko agiye kugenda mbere y’iminota itanu gusa ngo atangazwe nk’Umutoza wa Real Madrid.”

Bigitangira guhwihwiswa ko uyu mutoza ashobora kuza kwirukanwa, abakinnyi bamwe by’umwihariko aba Real Madrid bayobowe na Sergio Ramos bari basabye ubuyobozi ko bamureka kuko ariwe wateguye ikipe kandi bamufitiye icyizere cyo kubafasha kwitwara neza gusa ubusabe bwabo ntibwigeze bugabwa agaciro.

Lopetegui yatangiye gutoza mu 2003, ari Umutoza wungirije mu Ikipe y’Igihugu ya Espagne y’Abatarengeje imyaka 17, atoza abatarengeje imyaka 19, 20 na 21 mbere yo kwerekeza muri Porto yaje kuvamo muri Nyakanga 2016.

Biteganyijwe ko Fernando Hierro wahoze akinira Real Madrid akaba asanzwe ashinzwe tekinike mu ikipe y’igihugu ariwe uhita afata inshingano zo gutoza iyi kipe mu mikino y’igikombe cy’Isi kigomba gutangira kuri uyu wa Kane tariki 14 Kamena ariko Espagne ikazakina umukino wa mbere ku wa Gatanu ihura na Portugal.

Muri iri rushanwa iyi kipe iri mu ya mbere ahabwa amahirwe yo gutwara igikombe iheruka mu 2010, ikaba iri mu itsinda B hamwe na Portugal, Maroc na Iran.

Julen Lopetegui yirukanywe ku mwanya w’Umutoza Mukuru w’Ikipe y’Igihugu ya Espagne, amasaha make mbere y’uko gitangira
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
ndutiye emmanuel kissy 2018-06-13 10:40:34

espagne igiye guhita itaha

2
Y250 2018-06-13 07:48:39

Iyi nayo ndabona ubwo iraza kuviramo mu matsinda, nk uko izindi zagiye zibitwara zabigenzaga ku gikombe cy isi gikurikiyeho!!

Kwamamaza