Costa Do Sol yirukanye umutoza wananiwe gusezerera Rayon Sports

0 25-04-2018 - saa 08:44, Manzi Rema Jules

Costa do Sol yo muri Mozambique yamaze kwirukana Fabio Costas wari Umutoza Mukuru nyuma yo gusezererwa na Rayon Sports mu majonjora ya nyuma ya CAF Confederation Cup.

Rayon Sports iyobowe na Ivan Minnaert yanditse amateka igera mu matsinda ya CAF Confederation Cup ku nshuro ya mbere isezereye Costa do Sol ku giteranyo cy’ibitego bitatu kuri bibiri mu mikino yombi.

Abayobozi ba Costa do Sol ntibigeze bishimira kubona ikipe yabo yahabwaga amahirwe isezererwa muri iri rushanwa byatumye bafata icyemezo cyo gutandukana n’Umunya-Argentine, Leonardo Costas, wari wahawe kuyitoza mu Ugushyingo umwaka ushize.

Uretse gusezererwa na Rayon Sports mu marushanwa nyafurika, iyi kipe ntihagaze neza muri shampiyona iwabo kuko iri ku mwanya wa karindwi n’amanota umunani mu mikino itanu.

Ibinyamakuru byo muri Mozambique byanditse ko icyemezo cyo kwirukana uyu mutoza cyafashwe na Perezida wa Costa do Sol, Amosse Chicualacuala, ku wa Mbere nimugoroba ariko babanza kumuha umwanya wo gusezera ku bakinnyi kuri uyu wa Kabiri ari nabwo byatangajwe ko atakiri umutoza mukuru.

Umutoza wa Costa do Sol, Leonardo Fabio Costas, yirukanywe nyuma yo gusezererwa na Rayon Sports muri CAF Confederation Cup
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza